កីឡាករជនជាតិកាម៉េរ៉ូន Befolo Mbarga Privatសមាជិកក្លិបបាល់ទាត់អាស៊ីអឺរ៉ុប កំពុងតែបន្តឈរកំពូលតារាងអ្នករកគ្រាប់បាល់បញ្ចូលទីបានច្រើនជាងគេ គឺចំនួន១៦គ្រាប់ម្នាក់ឯងគិតត្រឹមប្រចាំសប្ដាហ៍ទី១១ នៃពានរង្វាន់ជម្រើសជើងឯកជាតិ (Metfone Cambodian League 2018) ក្រោយបន្តរកបានគ្រាប់បាល់នៅចុងសប្ដាហ៍កន្លងទៅ។
សរុបប្រកួតត្រឹម១១សប្តាហ៍មកនេះ ក្រុមសមាជិកទាំង១២អាចទាត់បញ្ចូលទីគ្នាបាន២៣៥គ្រាប់។ ចំណែក១៦ គ្រាប់របស់កីឡាករ Privat បានទាត់បញ្ចូលទីក្រុមវេស្ទើនភ្នំពេញ ៦គ្រាប់ បឹងកេត និងព្រះខ័នរាជស្វាយរៀង ២គ្រាប់ អង្គរថាយហ្គឺរ,វិសាខា,អគ្គស្នងការដ្ឋាននគរបាលជាតិ, ក្រសួងការពារជាតិ,សូលទីឡូអង្គរ និងអគ្គីសនីកម្ពុជា ១គ្រាប់ៗគ្រប់ក្រុម។ ក្រៅពីកីឡាករ Privat គេសង្កេតឃើញកីឡាករ Bisan George របស់ណាហ្គាវើល រកបានម្នាក់១៣គ្រាប់ តាមពីក្រោយ ហើយកីឡាករប្រេស៊ីល Maycon របស់បឹងកេត រកបាន១០គ្រាប់ កីឡាករនីហ្សេរីយ៉ា Julius Oiboh របស់បឹងកេត រកបាន៩គ្រាប់ កីឡាករកីឡាករកូរ៉េខាងជើង Cheo Myon Ho របស់វិសាខា រកបាន៨ គ្រាប់ កីឡាករនីហ្សេរីយ៉ា Bata របស់សូលទីឡូអង្គររកបានម្នាក់៧គ្រាប់តាមពីក្រោយ។ កីឡាករវ័យក្មេង សាន គឹមហេង រ៉ឹម ប៊ុនហៀង របស់ក្រសួងការពារជាតិ និងកីឡាករនីហ្សេរីយ៉ា Mathew Osa រកបាន៦គ្រាប់ម្នាក់។ ក្រៅពីនោះសុទ្ធតែអ្នករកគ្រាប់បាល់បានម្នាក់៥គ្រាប់ចុះក្រោម។
ពានរង្វាន់លីគកំពូលកម្ពុជា រដូវកាលនេះនឹងប្រើប្រាស់រូបមន្តប្រកួតសន្សំពិន្ទុវិលជុំចំនួន២ជើងដើម្បីស្វែងរកក្រុមខ្លាំងដែលមានពិន្ទុច្រើនជាងគេដណ្តើមជើងឯកប្រចាំឆ្នាំ។ ការប្រកួតចាប់ផ្តើមពីថ្ងៃទី៣ខែមីនា ដល់ថ្ងៃទី៣០ខែកញ្ញា ឆ្នាំ២០១៨ ដែលមានសមាជិកចំនួន១២ក្រុម។ ក្រុមជើងឯកនឹងទទួលបានកៅអីទៅចូលរួមប្រកួតក្នុងពានរង្វាន់ AFC Cup 2019, ពានរង្វាន់ Mekong Club Championship និងពានរង្វាន់ Singapore Cup ជាដើម។
តាមគម្រោងក្រោយបញ្ចប់រដូវកាលឆ្នាំ២០១៨ នេះទៅកីឡាករដែលរកគ្រាប់បាល់ច្រើនជាងគេបង្អស់នោះ គណៈកម្មការរៀបចំការប្រកួតនឹងប្រគល់ពានរង្វាន់ (ឬហៅថាស្បែកជើងមាស) ព្រមទាំងថវិកាលើកទឹកចិត្តចំនួន១.៥០០,០០០៛។ កីឡាករជនជាតិរ្វ៉ាន់ដា Autheire Kipson អតីតសមាជិកនៅក្លិបណាហ្គាវើលជាម្ចាស់ស្បែកជើងមាសឆ្នាំចាស់២០១៧ កន្លងទៅ៕
Source: Kampuchea Thmey Daily
0 Comments