ព្រះសីហនុ ៖ មានការភ្ញាក់ផ្អើលមួយបានកើតឡើង ខណៈពេលប្រទះឃើញសាកសពជនជាតិរុស្សីម្នាក់ ត្រូវគេអាករសម្លាប់ទម្លាក់ចោលក្នុងទឹកអូរយ៉ាងអាណោចអាធ័មបំផុត។ ហេតុការណ៍ប្រទះឃើញសពខាងលើនេះបានកើតឡើងនៅវេលាម៉ោងប្រមាណ១៥និង៣០នាទីរសៀល ថ្ងៃទី១៩ ខែកក្កដា ឆ្នាំ២០១៥ នៅត្រង់ចំណុចតាមបណ្ដោយផ្លូវតំបន់ស្ពានឆេះ ស្ថិតក្នុងភូមិលេខ៦ សង្កាត់លេខ៤ ក្រុង/ខេត្តព្រះសីហនុ។
ប៉ូលិសប៉ុស្តិ៍រដ្ឋបាលសង្កាត់លេខ៤បានឲ្យដឹងថា សពមានឈ្មោះ EONCHAROV DENIS ភេទប្រុស អាយុ៣១ឆ្នាំ ជនជាតិរុស្ស៊ី កាន់លិខិតឆ្លងដែនលេខ៧២៧៥៦៧៥៦២ ធ្វើនៅថ្ងៃទី១០ ខែកុម្ភៈ ឆ្នាំ២០១៤ ផុតកំណត់នៅថ្ងៃទី១០ ខែកុម្ភៈ ឆ្នាំ២០២៤ មានមុខរបរទេសចរណ៍។
ប៉ូលិសបានបន្តទៀតថា នៅលើខ្លួនប្រាណសពមានស្លាកស្នាមផ្នែកខាងក្រោយ ចាក់ដោយវត្ថុរឹងជាច្រើនកន្លែង និងបំពង់ក ត្រូវបានអារផ្តាច់។ នៅជុំវិញកន្លែងកើតហេតុប៉ូលិសបានរកឃើញកម្ទេចបែកបាក់ម៉ូតូជាច្រើនបំណែកផងដែរ ដែលអាចសង្ស័យថា ជនរងគ្រោះនៅក្នុងថ្ងៃកើតហេតុទំនងជាជិះម៉ូតូ ហើយត្រូវជនដៃដល់(មិនស្គាល់មុខ)ស្ទាក់ប្លន់សម្លាប់ តែទោះជាយ៉ាងណាក៏ដោយ ជុំវិញករណីខាងលើនេះរហូតមកដល់ព្រឹកថ្ងៃទី២០នេះ នៅមិនទាន់មានសមត្ថកិច្ចណាម្នាក់ ឬប៉ូលិសជំនាញខាងណាពិនិត្យសាកសព ធ្វើការអះអាងបញ្ជាក់ឲ្យបានច្បាស់លាស់នៅឡើយទេ គ្រាន់តែសន្និដ្ឋានជាជំហានដំបូងខុសៗគ្នាថា ជនរងគ្រោះអាចត្រូវគេអាករប្លន់ សម្លាប់យកម៉ូតូ និងសមត្ថកិច្ចខ្លះថា ករណីនេះអាចជារឿងគំនុំច្រើនជាងករណីប្លន់តែប៉ុណ្ណោះ។ បច្ចុប្បន្នសពជនរងគ្រោះត្រូវបានសមត្ថកិច្ចប៉ូលិសរៀបចំវេចខ្ចប់ប្រគល់ទៅស្ថានទូតរុស្ស៊ីប្រចាំនៅខេត្តព្រះសីហនុដើម្បីចាត់ចែងបន្ត។
គួរបញ្ជក់ផងដែរថា សន្តិសុខសុវត្ថិភាពនៅក្នុងខេត្តព្រះសីហនុនៅក្នុងខណៈពេលលោក ជូន ណារិន មកកាន់ជាមេស្នងការដ្ឋាននគរបាលខេត្តព្រះសីហនុ ដែលកន្លងមកល្បីល្បាញខាងបង្ក្រាប បទល្មើស ចាប់ចោរលួច ចោរឆក់ ចោរប្លន់ កាលដែលរូបគាត់នៅជាស្នងការរងនគរបាលរាជធានីភ្នំ ពេញនោះ សម្រាប់ខេត្តព្រះសីហនុនាពេលនេះ ថ្វីត្បិតតែគេសង្កេតឃើញមានការរៀបចំដាក់កម្លាំងយាម ល្បាតគ្រប់គោលដៅស្ទើរគ្រប់ដងផ្លូវទាំងយប់ទាំងថ្ងៃក៏ដោយ ប៉ុន្តែបទល្មើសនៃអំពើប្លន់ ប្រដាប់អាវុធនៅតែកើតមានដដែលជាដដែល ហើយក្រុមជនល្មើសទាំងនោះតែងតែមានឧកាសរត់ គេចខ្លួនបានដោយសុវត្ថិភាពរហូត ជាក់ស្ដែងដូចជាករណីប្លន់ប្រដាប់អាវុធអ្នកលក់មាសនៅផ្សារចិនបាញ់ជនរងគ្រោះឲ្យរបួសធ្ងន់ យកអស់លុយ និងមាសជាច្រើនតំឡឹង និងករណីប្លន់ប្រដាប់អាវុធដល់ក្នុងផ្ទះប្រជាពលរដ្ឋតំបន់ទំនប់រលកជាដើម ដោយទាំងពីរករណីនេះរហូតមកដល់ពេលនេះនៅមិនបានរកឃើញតម្រុយអត្តសញ្ញាណជនល្មើសនៅឡើយទេ។ ជាមួយគ្នានេះ ប្រជាពលរដ្ឋក្នុងខេត្តព្រះសីហនុបានសម្ដែងនៅការព្រួយបារម្ភយ៉ាងខ្លាំងចំពោះសុខសុវត្ថិភាពរបស់ពួកគាត់ និងធ្វើសំណូមពរទៅលោក ជូន ណារិន មេស្នងការដ្ឋាននគរបាលខេត្តព្រះសីហនុ មេត្តារឹតបន្តឹង បន្ថែមទៀតទៅលើមន្ត្រីក្រោមឱវាទរបស់ខ្លួន ធ្វើយ៉ាងណារុករកតាមចាប់ខ្លួនក្រុមជនល្មើសយកមកផ្ដន្ទាទោសឲ្យបាន ដើម្បីឲ្យសក្ដិសមនឹងភាពល្បីល្បាញដូចកាលដែលលោកធ្វើជាស្នងការរងរាជធានីភ្នំពេញ បើមិនអញ្ចឹងទេ ប្រជាពលរដ្ឋមិនមានជំនឿនោះឡើយ៕
បុរសជនជាតិរុស្ស៊ីម្នាក់ ត្រូវគេអាករសម្លាប់ទម្លាក់ចោលក្នុងទឹកអូរ
0 Comments