មិត្តភ័ក្ដិស្និទ្ធស្នាលរបស់នាងបានឲ្យដឹងថា ការវិលចូលប្រឡូកក្នុងវិស័យសិល្បៈជាថ្មី ក្រោយពីបាត់មុខសិល្បៈជាង២ឆ្នាំ ស៊ឹម ថៃណា បានរងនូវព័ត៌មានអាស្រូវបោកបក់ថា ប្រុសស្នេហ៍ដាក់បម្រាមការវិលចូលសិល្បៈ ព្រោះសម្ងំពពោះកូនផងដែរ។ គួររំលឹកថាដំណឹងដ៏រសើបនោះត្រូវបានស៊ឹម ថៃណាច្រានចោលដែរ ហើយជុំវិញការឡើងឆាកតន្ត្រីជាថ្មីរបស់ស៊ឹម ថៃណា កាលពី ពាក់កណ្តាលខែមុន បានក្លាយជាតម្រុយនៃការវិលចូលសិល្បៈជាថ្មីរបស់នាងដែរ។
ជុំវិញការធ្វើខួបកំណើតរបស់ពិធីករលោកម៉ាណូណា កញ្ញាស៊ឹម ថៃណា បានបង្ហាញវត្តមានដោយបើកចំហលែងគេចពីម៉ាស៊ីនថតរបស់អ្នកសារព័ត៌មានដូចមុនទៀត ហើយទាក់ទិនរឿងនេះ តារាចម្រៀងស៊ឹម ថៃណា បានបដិសេធ មិនធ្វើការបកស្រាយទេ ខណៈដែលនាងនិយាយតាមទូរស័ព្ទថា នាងកំពុងជាប់រវល់ខ្ញុំមិនអាចនិយាយបានទេ ទុកនាទីនេះឲ្យទស្សនិកជនវាយតម្លៃចុះ។
ប្រភពមិត្តភក្តិស្និទ្ធស្នាលនឹងកញ្ញាស៊ឹម ថៃណា បានឲ្យដឹងទៀតថា តារាចម្រៀងស៊ឹម ថៃណា កំពុងត្រៀមខ្លួនចេញបទចម្រៀងថ្មីៗនៅក្នុងផលិតកម្មក្នុងស្រុកមួយ ទោះយ៉ាងណាប្រភពនោះមិនបានបង្ហាញពីអត្តសញ្ញាណរបស់ផលិតកម្មដែលកញ្ញាស៊ឹម ថៃណា ត្រៀមខ្លួនជ្រកកោននោះទេ។
ពាក់ព័ន្ធរឿងនេះ ប្រភពមិត្តភក្តិស៊ឹម ថៃណា បានលើកឡើងទៀតថា រឿងនោះជារឿងសម្ងាត់សូម្បីមិត្តជិតដិត ខ្លះក៏មិនបានដឹងពីផលិតកម្មថ្មីនេះដែរ តែផលិតកម្មធំនោះគឺ ស្ថិតក្នុងចំណោមធំៗនៅកម្ពុជា ប៉ុន្តែមិនមែនផលិតកម្មកាលនាងធ្លាប់ច្រៀងនោះទេ។ ប្រភពនោះឲ្យដឹងទៀតថា មុនពេលចូលច្រៀងជាថ្មីនាងបានហ្វឹកហាត់ថែសម្រស់ និងសុខភាព ពិសេសការសម្រកគីឡូដែលពីមុនគីឡូឡើងខ្លាំង។ ប្រភពនោះនិយាយទៀតថា ទោះជាមិនបង្ហាញមុខជាញឹកញាប់នាងនៅតែច្រៀងពេលរាត្រីនៅក្លិបមួយចំនួនដែរ។
គេមិនដឹងថា ការបង្ហាញវត្តមានជាថ្មីរបស់តារាស្រីស៊ឹម ថៃណា រូបនេះអាចទាក់ទាញបានប៉ុន្មានភាគរយឡើងវិញទេ ព្រោះបច្ចុប្បន្ននេះមានតារាក្មេងៗស្រករក្រោយកើតមីដេរដាសកំពុងប្រជែងដណ្តើមទីផ្សារដ៏សន្ធឹកសន្ធាប់នោះ៕
ស៊ឹម ថៃណា ឃើញមុខឡើងវិញ
0 Comments