ព្រះសីហនុ ៖ ស្ត្រីមានផ្ទៃពោះពីរនាក់ និងក្មេងប្រុសម្នាក់បានរងរបួសធ្ងន់ ខណៈពេលពួកគេជិះ ម៉ូតូឌុបគ្នា ហើយត្រូវរថយន្តក្មេងស្ទាវបើកបុកពីក្រោយយ៉ាងពេញទំហឹង។
ហេតុការណ៍នេះបានកើតឡើងនៅវេលាម៉ោងប្រមាណ៩និង៣០នាទីព្រឹកថ្ងៃទី៣០ ខែតុលា ឆ្នាំ២០១៥ នៅត្រង់ចំណុចផ្លូវ១០៨ (កែងមហោស្រពចាស់) ទល់មុខធនាគារកម្ពុជាសាធារណៈ និងសណ្ឋាគារកោះ តាគៀវ។
បើតាមសាក្សីនៅកន្លែងកើតហេតុជាច្រើននាក់បាននិយាយរៀបរាប់ប្រាប់ឲ្យដឹងថា មុនពេលកើតហេតុគេឃើញរថយន្តបង្កម៉ាកកាមរីបាឡែន បើកបរដោយក្មេងប្រុសម្នាក់យ៉ាងលឿន ក្នុងទិសដៅពីលិចទៅកើត។ លុះបើកបរមកដល់ចំណុចកើតហេតុក៏បានជ្រុលចង្កូតទៅបុកជនរងគ្រោះទាំង៣នាក់ ដែលកំពុងជិះម៉ូតូមួយគ្រឿងឌុបគ្នានៅខាងមុខ(គោលដៅស្របទិសគ្នា) យ៉ាងពេញទំហឹងបណ្ដាលឲ្យរងរបួសធ្ងន់ទាំងបីនាក់ក្នុងពេលនោះតែម្តង។ ជនរងគ្រោះទាំង៣នាក់ ក្រោយពេលកើតហេតុ ត្រូវបាន រថយន្តសាម៉ុយដឹកយកទៅកាន់មន្ទីរពេទ្យដើម្បីជួយសង្គ្រោះ ភ្លាមៗ ផងដែរ។
ក្រុមគ្រួសារសាច់ញាតិជនរងគ្រោះបានប្រាប់ឲ្យដឹងថា ស្ត្រីរងគ្រោះទី១.ឈ្មោះនឿន ស្រីប៉ាក អាយុ២៥ មានផ្ទៃពោះ៤ខែ, ទី២. ឈ្មោះ ហាស់ សាវឿន មានផ្ទៃពោះ ៨ខែ រួមនឹងក្មេងប្រុសអាយុ ៤ឆ្នាំម្នាក់រងរបួសធ្ងន់ផងដែរ។ ម៉ូតូជនរងគ្រោះម៉ាកសង់សេ១២៥ ពណ៌ខ្មៅពាក់ស្លាកលេខព្រះសីហនុ 1D-0897រងការខូចខាតជាដំណំ។ ចំណែករថយន្តបង្កម៉ាកកាមរី បាឡែន ពាក់ស្លាកលេខព្រះសីហនុ 2A 4158បើកបរដោយក្មេងស្ទាវម្នាក់សង្ស័យមិនទាន់គ្រប់អាយុ និងមិនមាន ប័ណ្ណបើកបរបើក។
បច្ចុប្បន្នទាំងរថយន្តបង្កហេតុ និងម៉ូតូជនរងគ្រោះត្រូវបានសមត្ថកិច្ចនាំយកទៅរក្សាទុកដើម្បីធ្វើការដោះស្រាយតាមផ្លូវច្បាប់។
សមត្ថកិច្ចប៉ូលិសបានធ្វើការអះអាងថា ភាគីរថយន្តកំពុងព្យាយាមធ្វើសម្របសម្រួលផ្ដល់សំណង់ដល់ជនរងគ្រោះតាមរយៈចេញថ្លៃព្យាបាល។ តែទោះជាយ៉ាងណាក៏ដោយជុំវិញបញ្ហាខាងលើនេះប្រជាពលរដ្ឋបានធ្វើការសំណូមពរទៅដល់មន្ត្រីប៉ូលិសចរាចរណ៍ក៏ដូចជាមន្ត្រីពាក់ព័ន្ធ ដែលជាអ្នកអនុវត្តច្បាប់មេត្តាធ្វើការពិនិត្យរឿងនេះឲ្យបានច្បាស់លាស់ពាក់ព័ន្ធនឹងអ្នកបើកបររថយន្តបង្កហេតុផង ដើម្បីមានវិធានការតាមផ្លូវច្បាប់ ពីព្រោះអ្នកបើកបររថយន្ត បង្កខាង លើនេះត្រូវបានគេអះអាងថា មិនទាន់គ្រប់អាយុក្នុងការបើកបរ និងមិនមានប័ណ្ណបើកនោះទេ៕
ក្មេងប្រុសម្នាក់បើករថយន្តបុកស្ត្រីមានផ្ទៃពោះចំនួន២នាក់ និងក្មេងប្រុសម្នាក់របួសធ្ងន់
0 Comments