គណបក្សកាន់អំណាចរបស់ប្រទេសកូរ៉េខាងជើងបានឲ្យដឹងនៅថ្ងៃសុក្រថា ខ្លួននឹងរៀបចំសមាជដ៏ធំបំផុតក្នុងរយៈពេលប៉ុន្មានទសវត្សរ៍មកនេះនៅខែឧសភាឆ្នាំក្រោយ។
គណបក្សកម្មករបាននិយាយនៅក្នុងសេចក្ដីជូនដំណឹងពិសេសមួយដែលផ្សព្វផ្សាយដោយប្រព័ន្ធសារព័ត៌មានរបស់រដ្ឋថា សមាជលើកទី៧របស់ខ្លួននឹងត្រូវប្រឈមមុខជាមួយនឹងភារកិច្ចដ៏ធ្ងន់ធ្ងរចំពោះការកសាងប្រទេសជាតិឲ្យរីកលូតលាស់។ ទោះបីជាយ៉ាងណាក៏ដោយវាមិនបានបញ្ជាក់លម្អិតពីអ្វីដែលនឹងត្រូវពិភាក្សានោះទេ។
ក្រុមអ្នកវិភាគកូរ៉េខាងត្បូងបាននិយាយថា មេដឹកនាំកូរ៉េខាងជើង គីម ជុងអ៊ុន អាចនឹងប្រើប្រាស់សមាជនេះ ដើម្បីរុះរើក្រុមមន្ត្រីគណបក្ស ជំរុញការក្តោបក្តាប់របស់លោក និងបង្ហាញពីការផ្លាស់ប្ដូរគោលនយោបាយ។
ចាប់តាំងពីឡើងកាន់អំណាចបន្ទាប់ពីការស្លាប់របស់ឪពុករបស់គាត់នៅចុងឆ្នាំ ២០១១ លោក គីម បានកំពុងតស៊ូ ដើម្បីស្ដារសេដ្ឋកិច្ចដ៏រ៉ាំរ៉ៃនៃប្រទេសរបស់លោក និងដោះស្រាយជាមួយនឹងការប្រឈមមុខដាក់គ្នាជាអន្តរជាតិលើកម្មវិធីនុយក្លេអ៊ែរ និងមីស៊ីលរបស់កូរ៉េខាងជើង។
គួរបញ្ជាក់ថា គណបក្សកម្មករបានប្រារព្ធធ្វើសមាជរបស់ខ្លួនជាលើកចុងក្រោយក្នុងឆ្នាំ ១៩៨០ នៅពេលដែលឪពុករបស់លោក គីម គឺលោក គីម ជុងអ៊ីល បានបង្ហាញខ្លួនជាលើកដំបូងក្នុងឆាកនយោបាយដែលវត្តមានរបស់លោកគឺអះអាងពីការជំនួសតំណែងឪពុករបស់ខ្លួនគឺស្ថាបនិកកូរ៉េខាងជើង គីម អ៊ីលស៊ុង៕
កូរ៉េខាងជើងនឹងរៀបចំសមាជធំបំផុតក្នុងរយៈពេលប៉ុន្មានទសវត្សរ៍ចុងក្រោយនេះ
0 Comments