ភ្នំពេញ ៖ ការប្រកួតរវាងអ្នកប្រដាល់ លាស់ យីន ក្លឹបបង្ក្រាបគ្រឿងញៀនជាមួយ ជ័យ ប៊ុនសង់ក្លឹបអាជ្ញាធរជាតិអាវុធគីមីនៅលើសង្វៀន SEA-TV ល្ងាចថ្ងៃទី២៥ ខែមករា ឆ្នាំ២០១៥ ពុំមានអ្នកណាឈ្នះ អ្នកណាចាញ់ ដូចកាលពីជួបគ្នាលើកមុនទេ ពោលគឺស្មើពិន្ទុគ្នាក្រោយពីប្រកួតគ្នាប្រាំទឹកពេញនោះ។ ក្នុងស្ថានភាពប្រកួតគ្នា៥ទឹកនោះ ពួកគេព្យាយាមប្រើគ្រប់ស្នៀត ក្នុងបំណងផ្ដួលយកឈ្នះគ្នាទៅវិញទៅមក រហូតទាល់អស់កម្លាំងស៊ុហ្វរៀងៗខ្លួន។ ការប្រកួត២ទឹកចុងក្រោយ មានលក្ខណៈកាន់តែចុះខ្សោយ មិនមានផ្លែដូច៣ទឹកដំបូងនោះឡើយ។ ក្នុង៣ទឹកមុននោះ ទាំង លាស់ យីន ទាំងជ័យ ប៊ុនសង់ កញ្ជ្រោលដាក់គ្នាគ្មានបណ្ដាក់ដៃ បន្ធូរជើងនោះទេ គឺធ្វើយ៉ាងណាផ្ដួលគ្នាឲ្យបាន ប៉ុន្តែពួកគេសុទ្ធតែធ្លាប់ស្គាល់ និងដឹងពីល្បិចកលប្រកួតរៀងៗខ្លួន ទើបមិនអាចផ្ដួលគ្នាបានសម្រេច។
ហ៊ល ដារ៉ា អ្នកប្រដាល់ក្លឹបសាលវ័ន្ដកីឡា វាយឈ្នះអ្នកប្រដាល់ ងួន គា ក្លឹបតាឡីដំរីមានរិទ្ធិដោយពិន្ទុដាច់តែម្ដង បន្ទាប់ពីប្រកួត៥ទឹកពេញនោះ។ ការប្រកួតទឹកដំបូង ហ៊ល ដារ៉ា វាយរាងមើលស្រាល ងួន គា តែក្រោយពីមើលឃើញថា ងួន គា រឹងគួរសមនោះ ទើប ដារ៉ា បង្កើនការវាយរបស់ខ្លួនថែមទៀត។ តែយ៉ាងណា ងួន គា គេវាយចេញទៅលើដារ៉ាច្រើនណាស់ដែរ គ្រាន់តែការវាយចេញរបស់គេពុំមានប្រសិទ្ធភាពដូចការវាយចេញរបស់ ដារ៉ា នោះទេ។ ក្នុងការប្រកួត៥ទឹកនេះ ចៅក្រមទាំង៥សុទ្ធតែផ្ដល់ពិន្ទុឲ្យដារ៉ាឈ្នះដូចៗគ្នា។
ចំពោះការប្រកួតកាលពីពេលព្រឹកវិញនោះ អ្នកប្រដាល់ ហ៊ឹម សារ៉ាន់ សមាគមប្រដាល់ក្រសួងការពារជាតិប្រកួតឈ្នះ វ៉ាន់ ចាន់វ៉េត អ្នកប្រដាល់ក្លឹបកងពលធំអន្តរាគមន៍លេខ៣ដោយពិន្ទុទាំងវេទនា និងមានរបួសទៀតផង។
ក្នុងការប្រកួត៥ទឹក ទោះបីគេវាយគ្នាទៅវិញទៅមករហូតក៏ពិតមែន តែការវាយចេញរបស់សារ៉ាន់ ចំគោលដៅបានច្រើនជាង។ ទោះជាយ៉ាងនេះក៏ដោយ ក៏គេសង្កេតឃើញថា នៅទឹកទី៤ចាន់វ៉េត បញ្ចេញមួយកែងបានយ៉ាងល្អធ្វើឲ្យ សារ៉ាន់ មានរបួសចុងភ្នែកស្ដាំ។
មុខរបួសមិនធ្ងន់ប៉ុន្មានទេ គឺ សារ៉ាន់ អាចបន្តការប្រកួតរហូតដល់ចប់ទឹកទី៥ ដែលលទ្ធផលចុងក្រោយ ហ៊ឹម សារ៉ាន់ នៅតែឈ្នះពិន្ទុ វ៉ាន់ ចាន់វ៉េត ដាច់ដែរ ដោយចៅក្រមទាំង៥រូប គ្មាននណាមួយផ្តល់ពិន្ទុឲ្យ ចាន់ វ៉េត ឈ្នះនោះឡើយ។ ណា ម៉ូរ៉ាក់ អ្នកប្រដាល់ក្លឹបពន្លឺសាមគ្គីខេត្តបាត់ដំបងប្រកួតស្មើពិន្ទុជាមួយ គុន សំណាង អ្នកប្រដាល់ក្លឹបអាជ្ញាធរជាតិអាវុធគីមី បន្ទាប់ពីពួកគេព្យាយាមរកឱកាសផ្ដួលគ្នា៥ទឹកពេញនោះ។
ម៉ូរ៉ាក វាយប្រយោលល្អ ពិសេសស្នៀតកណ្ដាប់ដៃ និងទាត់តែពេលចូលកៀកគេចាញ់ជង្គង់សំណងដាច់តែម្ដង។ អ្នកប្រដាល់ទាំង២រូបនេះ ប្រកួតគ្នា៥ទឹកដោយគ្មាននរណាលើនរណាឡើយ ។ ទីបំផុតលទ្ធផលបានត្រឹមស្មើគ្នា ហើយពួកទាំងពីរត្រូវបានគណៈកម្មការបច្ចេកទេសប្រកាសផ្តល់ឱកាសឲ្យជួបជម្រះបញ្ជីគ្នាម្ដងទៀត។
សេក គឹមភាព អ្នកប្រដាល់ក្លឹបរដ្ឋសែនជ័យប្រកួតឈ្នះ ម៉ន ចាន់នី អ្នកប្រដាល់ក្លឹបការិយាល័យទី៥កងទ័ពជើងគោកដោយពិន្ទុទាំងប្រផិតប្រផើយ ក្នុងខណៈដែល ឈុន បញ្ញាក្លឹបរ៉ាហាប់ស្វាយប៉ាកសងសឹកជាមួយរិទ្ធកៅក្លឹបកងយោធពល ខេមរភូមិន្ទមិនបានសម្រេច ថែមទាំងត្រូវរិទ្ធ កៅវ៉ៃរាប់៨នៅទឹកទី២ចំនួន២លើកទៀតផង។
ឈុន បញ្ញា ចាញ់ពិន្ទិរិទ្ធ កៅម្ដងទៀត ហើយគេប្រកាសភ្លាមៗថានឹងរកឱកាសសងសឹកម្ដងទៀត។ រីឯ អាន សីហាក្លឹបមិត្តប៉ូលិសប្រកួតចាញ់ពិន្ទុវាយោ វ៉ាន់ឌីក្លឹបពន្លឺវិបុលរិទ្ធី។ ដោយឡែក ការប្រកួតជាលក្ខណៈមិត្តភាពអន្តរជាតិរវាងកម្ពុជានិងថៃ លើសង្វៀន SEA -TV ខេត្តកំពង់ស្ពឺយប់ថ្ងៃទី២៤ ខែមករានោះ អ្នកប្រដាល់កម្ពុជា ផុន ផាន់ណា ក្លឹបអប្សរាគុនខ្មែរប្រកួតចាញ់ពិន្ទុអ្នកប្រដាល់ថៃ Nop Pa Kao ដោយពិន្ទុដាច់តែម្ដង។
ក្នុងការប្រកួត៥ទឹកនោះ ផាន់ណា ចាប់ផ្ដើមជ្រាយតាំងពីទឹកទី៣ ខណៈដែលNop Pakao នៅតែរឹងមាំនោះ។ ផាន់ណា គ្រាន់តែដួលលើរេញរាប់ភ្លេច ពោលគឺទន់ជ្រាយមិនដូចពីមុននោះទេ។
ឯម ខ្លឹមខ្មៅ អ្នកប្រដាល់ក្លឹបឫទ្ធីពោធិ៍សែនជ័យបានផ្ដួលអ្នកប្រដាល់ថៃ OrRano ឲ្យសន្លប់នៅទឹកទី២។ ការប្រកួតលើកនេះ ខ្លឹមខ្មៅគេវាយបានល្អមែនទែន ដោយក្នុងទឹកទី២នេះគេបានប្រើជង្គង់អុកទៅលើ Or Rano ឲ្យទល់ផ្អក ហើយត្រូវអាជ្ញាកណ្ដាលរាប់៨ម្តង។ បន្ទាប់ពីបន្តការប្រកួតទៀតនោះ Or Rano ក៏ត្រូវ ខ្លឹមខ្មៅបញ្ចេញកែងមួយកែងត្រូវសៀតផ្កា ធ្វើឲ្យសន្លប់លែងក្រោក។
ចំណែកអ្នកប្រដាល់ជើងខ្លាំង រឿង សោភ័ណ្ឌ ក្លឹបមកុដរាជសីហ៍ ប្រកួតបានត្រឹមស្មើពិន្ទុជាមួយអ្នកប្រដាល់ថៃ Sen Sep ប៉ុណ្ណោះ។ អ្នកប្រដាល់ថៃ Sen Sepនេះ ខ្លាំងហើយរឹងមាំទៀត វាយត្រូវសោភ័ណ្ឌពេញៗនិងមានប្រៀបឈ្នះតាំងពីទឹក១ដល់ទឹកទី៤ថែមទៀត។
សោភ័ណ្ឌ បើកុំតែក្នុងទឹកទី៥ បានវាយកែងត្រូវ Sen Sepមួយកែងឲ្យដួលវិញនោះ ក៏ពិបាកបានស្មើដែរ។ ចំពោះការប្រកួតរវាងអ្នកប្រដាល់រួមជាតិនោះ បឺត សង្ឃឹម អ្នកប្រដាល់ក្លឹបរ៉ាហាប់ស្វាយប៉ាកផ្ដួល គង់ ហ៊ូវ អ្នកប្រដាល់ក្លឹបកងយោធពលខេមរភូមិន្ទនៅទឹកទី៤។
ថុល មករា អ្នកប្រដាល់ក្លឹបឃ្លាំងមឿងកីឡាសងសឹកជាមួយសោម វិឆ័យ អ្នកប្រដាល់ក្លឹបសាលវ័ន្ដកីឡាដោយយកឈ្នះបានវិញដោយពិន្ទុ។ ខុន រាជ អ្នកប្រដាល់ក្លឹបកងពលធំអន្តរាគមន៍លេខ៣បានផ្ដួលពុទ្ធ ឆាយរិទ្ធី អ្នកប្រដាល់ក្លឹបពុទ្ធសេរីវង្សឲ្យសន្លប់នៅទឹកទី៤៕
វិសិទ្ធ
0 Comments