អ្នកដឹកនាំការស្វែងរកបាននិយាយកាលពីថ្ងៃព្រហស្បតិ៍ថា បំណែកមួយនៃស្លាបយន្តហោះ ដែលរកឃើញនៅលើកោះមួយនៅភាគខាងលិចមហាសមុទ្រឥណ្ឌា គឺមិនទំនងជាបំប្លែងការស្វែងរកនៅបាតសមុទ្រសម្រាប់យន្តហោះម៉ាឡេស៊ី ដែលបាត់ខ្លួននៅភាគខាងត្បូងមហាសមុទ្រឥណ្ឌានោះទេ។
ក្រុមអ្នកស៊ើបអង្កេតសុវត្ថិភាពអាកាសកំពុងតែពិនិត្យមើលកម្ទេចកម្ទីយន្តហោះ ដែលបានរកឃើញនៅលើកោះជិត Madagascar ដើម្បីមើលថា តើវាជាផ្នែកមួយនៃជើងហោះហើរម៉ាឡេស៊ី MH 370 ដែលបាត់ខ្លួននៅថ្ងៃទី៨ ខែមីនា ឆ្នាំមុន មែនឬមិនមែន?
ប្រធានស្នងការការិយាល័យសុវត្ថិភាពដឹកជញ្ជូនអូស្ត្រាលី លោក Martin Dolan ដែលដឹកនាំការស្វែងរកបាតសមុទ្របាននិយាយថា ប្រសិនបើការរកឃើញបានបង្ហាញថា នេះជាផ្នែកមួយនៃយន្តហោះដែលបាត់មែននោះ វានឹងស្របជាមួយនឹងទ្រឹស្តីថា យន្តហោះដែលបានបាត់ខ្លួននោះ បានធ្លាក់ក្នុងរង្វង់តំបន់ស្វែងរកផ្ទៃដី ១២០,០០០គីឡូម៉ែត្រការ៉េភាគនិរតីនៃប្រទេសអូស្ត្រាលី។ Dolan ប្រាប់ The Associated Press ថា “វាមិនបានធ្វើឲ្យយើងបញ្ឈប់ការស្វែងរកនៃតំបន់នាពេលបច្ចុប្បន្ននោះទេ ប្រសិនបើរឿងនេះត្រូវបានផ្សារភ្ជាប់ជាមួយនឹងយន្តហោះ MH370 មែននោះ” ។ “វាអាចទៅរួចទាំងស្រុងថា របស់ម្យ៉ាងអាចអណ្តែតចេញពីតំបន់នៃការស្វែងរកបច្ចុប្បន្នរបស់យើង”។
ការស្វែងរកនៅបាតសមុទ្រ ដែលសហការឧបត្ថម្ភដោយប្រទេសអូស្ត្រាលី និងប្រទេសម៉ាឡេស៊ីនោះ មកទល់ពេលនេះបានស្វែងរកក្នុងផ្ទៃដី៥៥,០០០គីឡូម៉ែត្រការ៉េនៃបាតសមុទ្រ ។
ប្រទេសម៉ាឡេស៊ី បញ្ជូនក្រុមសម្រាប់ការផ្ទៀងផ្ទាត់។
រដ្ឋមន្ត្រីក្រសួងដឹកជញ្ជូនម៉ាឡេស៊ី បាននិយាយកាលពីថ្ងៃពុធថា ប្រទេសម៉ាឡេស៊ី បានបញ្ជូនក្រុមមួយដើម្បីផ្ទៀងផ្ទាត់ថា តើបំណែកនៃយន្តហោះដែលបានផុសឡើងនៅលើកោះមួយក្នុងមហាសមុទ្រឥណ្ឌានេះ អាចជាផ្នែកមួយនៃយន្តហោះម៉ាឡេស៊ី MH370 ឬក៏យ៉ាងណា។ ការផុសឡើងនៃបំណែកយន្ដហោះដ៏អាថ៌កំបាំងនៅលើកោះប្រទេសបារាំង La Reunion នេះបានជំរុញឲ្យមានការរំពឹងទុកថា វាអាចជាផ្នែកមួយនៃយន្តហោះដែលបានបាត់នោះ។
រដ្ឋមន្ត្រីក្រសួងដឹកជញ្ជូនលោក Liow Tiong Lai ប្រាប់អ្នកយកព័ត៌មានក្នុងទីក្រុងញូវយ៉កថា កម្ទេចកម្ទីអ្វីក៏ដោយដែលបានរកឃើញ ចាំបាច់ត្រូវផ្ទៀងផ្ទាត់បន្ថែមទៀតមុនពេលដែលយើងអាចបញ្ជាក់បន្ថែមថា តើវាជារបស់ MH370 មែន ឬក៏មិនមែន”។ លោកបានបន្ថែមថា ដូច្នេះយើងបានបញ្ជូនក្រុមមួយដើម្បីធ្វើការស៊ើបអង្កេតលើបញ្ហានេះ ហើយយើងសង្ឃឹមថា យើងអាចសម្គាល់វាបានឆាប់តាមដែលអាចធ្វើទៅបាន។
បំណែកប្រវែងពីរម៉ែត្រនេះដែលហាក់ដូចជាផ្នែកមួយនៃស្លាបយន្តហោះ ត្រូវបានរកឃើញដោយក្រុមអ្នកសម្អាតឆ្នេរសមុទ្រ។ ក្រុមមន្ត្រីដឹកជញ្ជូនផ្លូវអាកាសរបស់បារាំង បានបើកការស៊ើបអង្កេតចូលទៅក្នុងកន្លែងដែលកម្ទេចកម្ទីនេះផុសឡើង។
គ្មានផ្នែកណាមួយនៃយន្តហោះត្រូវបានគេរកឃើញនោះទេ ចាប់ពីពេលនោះមក។ អាជ្ញាធរម៉ាឡេស៊ី បានប្រកាសនៅខែមករាថា មនុស្សទាំងអស់នៅលើយន្តហោះត្រូវបានសន្មតថា បានស្លាប់។ យន្តហោះនេះបានបាត់ខ្លួននៅពេលយប់នៅលើសមុទ្រចិនខាងត្បូង ខណៈកំពុងធ្វើដំណើរចេញពីទីក្រុងគូឡាឡាំពួរ ទៅកាន់ទីក្រុងប៉េកាំង ជាមួយមនុស្សចំនួន ២៣៩នាក់នៅក្នុងយន្តហោះ៕
AP/AFP
ស្លាបយន្តហោះដែលរកឃើញ នឹងមិនផ្លាស់ប្តូរការស្វែងរកនៅបាតសមុទ្រចំពោះជើងហោះហើរ MH370 នោះទេ
0 Comments