បន្ទាយមានជ័យ ៖ យោងតាមពាក្យបណ្ដឹងចុះថ្ងៃទី៧ ខែវិច្ឆិកា ឆ្នាំ២០១៥របស់ជនរងគ្រោះឈ្មោះ ហ៊ី ចាន់ដារ៉ា ហៅ ណោត ភេទប្រុស អាយុ៣៨ឆ្នាំ មុខរបរជាងភ្លើង រស់នៅភូមិក្បាលស្ពាន១ សង្កាត់/ក្រុងប៉ោយប៉ែត ខេត្តបន្ទាយមានជ័យ និងយោងតាមពាក្យបណ្ដឹងរបស់ជនរងគ្រោះឈ្មោះ ជឹប សុខារី ហៅ អ៊ិក ភេទប្រុស អាយុ៤១ឆ្នាំ មុខរបរលក់ដូរ រស់ភូមិបាលិលេយ្យ១ សង្កាត់/ក្រុងប៉ោយ ប៉ែត ខេត្តបន្ទាយមានជ័យ។
នៅយប់ថ្ងៃទី៦ ខែវិច្ឆិកា ឆ្នាំ២០១៥ និងថ្ងៃទី៧ ខែវិច្ឆិកា ឆ្នាំ២០១៥ជនរងគ្រោះទាំង២នាក់បានបាត់ទ្រព្យសម្បត្តិដោយសារចោរលួចគាស់ទម្លុះទម្លាយទ្វារបន្ទប់យកទ្រព្យសម្បត្តិដូចជា WIFIចំនួន១ដុំក្បាលកុំព្យូទ័រ ម៉ាកសាមសុង ចំនួន១គ្រឿង និងក្បាលម៉ាស៊ីនបំបែកកាំម៉េរ៉ាចំនួន១គ្រឿង ជាទ្រព្យសម្បត្តិរបស់ឈ្មោះ ជឹប សុខារី ហៅអ៊ិក ម៉ូទ័រស្វានធុនតូចចំនួន១គ្រឿង ម៉ូទ័រស្វានធុនធំចំនួន៣គ្រឿង ម៉ូទ័រកាត់ការ៉ូចំនួន២គ្រឿង និងខ្សែភ្លើងមួយចំនួនជារបស់ឈ្មោះហ៊ី ចាន់ដារ៉ា ហៅ ណោត ក្រោយពីទទួលបានពាក្យបណ្ដឹងហើយទើបនៅថ្ងៃទី៩ ខែវិច្ឆិកា ឆ្នាំ២០១៥ វេលាម៉ោង៨ព្រឹកកម្លាំងអាវុធហត្ថចំនួន៤នាក់ដឹកនាំដោយលោកវរសេនីយ៍ត្រី ជា ដា មេបញ្ជាការមូលដ្ឋានកងរាជអាវុធហត្ថក្រុងប៉ោយប៉ែតធ្វើការស្រាវជ្រាវរហូតឈានដល់ការឃាត់ខ្លួនបានជនសង្ស័យម្នាក់ជាមនុស្ស គ ភេទប្រុស អាយុប្រហែល៣០ឆ្នាំរស់នៅបណ្ដោះអាសន្នក្នុងស្ថានីយរថភ្លើងចាស់ ស្ថិតក្នុងភូមិប៉ោយប៉ែត សង្កាត់/ក្រុងប៉ោយប៉ែត ខេត្តបន្ទាយមានជ័យ។
ប្រជាពលរដ្ឋរស់នៅក្រុងប៉ោយប៉ែតបាននិយាយថា ជនសង្ស័យជាមនុស្ស គ នេះគឺជាជនដែលតែងតែធ្វើសកម្មភាពលួចយ៉ាងសកម្មបំផុតនៅក្រុងប៉ោយប៉ែត។ ក្រោយពីធ្វើការឃាត់ខ្លួនជនសង្ស័យរួចមកសមត្ថកិច្ចកងរាជអាវុធហត្ថបានដកហូតវត្ថុតាងរួមមានក្បាលអេក្រង់កុំព្យូទ័រ ម៉ាកសាមសុងចំនួន១គ្រឿង និងក្បាលម៉ាស៊ីនបំបែកក្បាលកាមេរ៉ាសុវត្ថិភាពចំនួន១គ្រឿង ត្រូវបានប្រគល់ឲ្យជនរងគ្រោះឈ្មោះ ជឹប សុខារី ហៅ អ៊ិក វិញ។ ចំណែកម៉ូទ័រស្វានតូចធំចំនួន៤គ្រឿងត្រូវបានប្រគល់ឲ្យឈ្មោះ ហ៊ី ចាន់ដារ៉ា ហៅណោត ជាម្ចាស់វិញ។ ជនសង្ស័យជាចោរគាស់ផ្ទះជាមនុស្ស គ ត្រូវបានសមត្ថកិច្ចអាវុធហត្ថខេត្តកសាងសំណុំរឿងបញ្ជូនទៅតុលាការចាត់ការតាមនីតិវិធីច្បាប់ហើយ៕
ជនសង្ស័យម្នាក់ជា មនុស្ស.គ ត្រូវសមត្ថកិច្ចឃាត់ខ្លួន
0 Comments