ទេសរដ្ឋមន្ត្រី ស៊ុន ចាន់ថុល បន្ត​ចុះ​ពិនិត្យមើល​ការដ្ឋាន​ កំពុង​ជួសជុល​ កំណាត់​ផ្លូវជាតិ​លេខ​៤១ លេខ​០៣ និង​លេខ​៣៣

កំពត ៖ នា​ថ្ងៃ​ចន្ទ ០៣​រោច ខែ​ទុតិយាសាឍ ឆ្នាំច សំរឹទ្ធិស័ក ព​.​ស​.២៥៦២ ត្រូវ​នឹង​ថ្ងៃទី​៣០ ខែកក្កដា ឆ្នាំ​២០១៨ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួង​សាធារណការ និង​ដឹកជញ្ជូន បាន​ដឹកនាំ​គណៈ ប្រតិភូ​ក្រសួង​មួយក្រុម រួមមាន មន្ត្រី​ជំនាញ​ពាក់ព័ន្ធ និង​តំណាង​ក្រុមហ៊ុន ស្ពាន​ថ្នល់​ចិន (CRBC) ចុះ​ពិនិត្យមើល​វឌ្ឍនភាព​ការដ្ឋាន​ជួសជុល កំណាត់​ផ្លូវជាតិ​លេខ​៤១ និង​កំណាត់​ផ្លូវជាតិ​លេខ​០៣ និង កំណាត់​ផ្លូវជាតិ​លេខ​៣៣ ក្នុងភូមិ​សាស្ត្រ​កែប និង ខេត្តកំពត ដែល​បាន​ទទួលរង​នូវ​ផលប៉ះពាល់​ដោយ​ជំនន់​ទឹក ភ្លៀង​នាពេល​កន្លងមក​។​

ថ្លែង​ទៅកាន់​ក្រុម​អ្នកសារព័ត៌មាន​នាឱកាស​នោះ ទេសរដ្ឋមន្ត្រី ស៊ុន ចាន់ថុល បាន​គូសបញ្ជាក់ថា ៖ ផ្លូវជាតិ​លេខ​៤១ កំពុង​សិក្សា​លទ្ធភាព និង​បច្ចេកទេស ដើម្បី​លើកកម្ពស់​គុណភាព ពី​ផ្លូវ​ប្រភេទ DBST ទៅជា​ផ្លូវ​បេតុង កៅស៊ូ AC ទាំងស្រុង សំដៅ​រក្សា​បាន​ភាព​យូរអង្វែង អាច​ទ្រ​ទម្ងន់​បាន​ប្រសើរ​ជាង​មុន និង​ចូលរួម​ចំណែក ក្នុងការ​សម្រួល​ដល់​ការ​ធ្វើដំណើរ​របស់​ប្រជាពលរដ្ឋ ព្រមទាំង​ការ​ដឹកជញ្ជូន​កាន់តែ​ប្រសើរ​មួយ​កម្រិត ទៀត។ ចំណែក​កំណាត់​ផ្លូវជាតិ​លេខ​០៣ ពី​ភ្នំពេញ​មក​បែក​គុ​ស ត្រូវបាន​បើក​ការដ្ឋាន​សាងសង់​ពង្រីក ដោយ​ក្រុមហ៊ុន​ចិន ពី​ពីរ​គន្លង​ទៅ​បួន​គន្លង​។

ផ្លូវជាតិ​លខ​០៣ ពី​បែក​គុ​សមក​ទី​រួម​ខេត្តកំពត បន្ត​ទៅដល់​វាលរិញ នឹងត្រូវ​លើកកម្ពស់​គុណភាព​ផ្លូវ​ពី​DBST​ទៅ​ផ្លូវ​បេតុង​កៅស៊ូ​AC សាងសង់​ដោយ​ក្រុមហ៊ុន​ចិន។ ​គម្រោង​ជួសជុល​ផ្លូវជាតិ​លេខ​០៤ ត្រូវ​ពង្រីក​ទទឹង​ពី ០៧​ម៉ែត្រ​ទៅ ១១​ម៉ែត្រ ក្រាល​កៅស៊ូ AC បន្ថែម​ពីលើ និង​លើក​កម្រិត​កម្ពស់​ផ្លូវ​ដែល​លេច​ទឹក តាម​តំបន់​មួយចំនួន​។

ទេសរដ្ឋមន្ត្រី ស៊ុន ចាន់ថុល ក៏បាន​បន្ថែមទៀតថា រាជរដ្ឋាភិបាល មាន​គម្រោង​លើកកម្ពស់​គុណភាព​ផ្លូវ​ខេត្ត ផ្លូវជាតិ ជាច្រើន​ទៀត​ទៅដល់​គ្រប់​ច្រកល្ហក ដើម្បី​ប្រជារាស្ត្រ​មានឱកាស​រក​ចំណូល​បន្ថែម ស្របតាម​គោលនយោបាយ​កាត់បន្ថយ​ភាពក្រីក្រ របស់​រាជរដ្ឋាភិបាល​។

ជាមួយគ្នានេះ ទេសរដ្ឋមន្ត្រី ស៊ុន ចាន់ថុល ក៏បាន​អំពាវនាវ​ដល់​បងប្អូន​ប្រជាពលរដ្ឋ ក្រុមហ៊ុន​ដឹកជញ្ជូន និង​អាជ្ញាធរ​ពាក់ព័ន្ធ​ទាំងអស់​ឱ្យ​គោរព​ច្បាប់​ចរាចរណ៍ និង​មិនត្រូវ​ដឹកជញ្ជូន​លើស​ទម្ងន់​កម្រិត​កំណត់ ដើម្បី​ចូលរួម​កាត់បន្ថយ​គ្រោះថ្នាក់​ចរាចរណ៍ ថែរក្សា​ហេដ្ឋារចនាសម្ពន្ធ​ស្ពាន​ថ្នល់ ដែល​ជា​សម្បត្តិ​ដ៏​មហាសាល របស់​ប្រទេសជាតិ​យើង​ឱ្យ​គង់វង្ស និង​ប្រើប្រាស់​ឱ្យ​បាន​យូរអង្វែង​។​

សូម​ជម្រាបជូន​ថា កាលពី​កន្លងទៅ ទេសរដ្ឋមន្ត្រី ស៊ុន ចាន់ថុល បាន​ណែនាំ​ឱ្យ​មន្ទីរ​ជំនាញ​ពាក់ព័ន្ធ​ធ្វើការ​ជួសជុល​កាយ​សម្រួល​បន្ទាន់​កំណាត់​ផ្លូវជាតិ​ទាំងនេះ ​មុន​ពេល​បោះឆ្នោត ដើម្បី​សម្រួល​ជា​បណ្ដោះអាសន្ន​ដល់​ការធ្វើដំណើរ​របស់ បងប្អូន​ប្រជាពលរដ្ឋ​ធ្វើដំណើរ​ទៅ​ចូលរួម​បោះឆ្នោត និង​ការធ្វើដំណើរ ព្រមទាំង​ដឹកជញ្ជូន​ផ្សេងៗ​ផងដែរ៕



Source: Kampuchea Thmey Daily