បាត់ដំបង ៖ នេះជាលើកទី២ហើយ នៅក្នុងសប្តាហ៍ចុងខែកក្កដានេះ ដែលមានករណីក្រុមចោរបានធ្វើសកម្មភាពគាស់ទម្លុះទម្លាយផ្ទះប្រជាពលរដ្ឋ ដោយប្រមូលយកនូវទ្រព្យសម្បត្តិ រួចគេចខ្លួនបានដោយសុវត្ថិភាព ខណៈដែលម្ចាស់ផ្ទះមានការធ្វេសប្រហែស តែបន្តិចដោយទុកផ្ទះចោលគ្មានមនុស្សនៅ។
ករណីគាស់ផ្ទះនេះបានកើតឡើងនៅវេលាម៉ោង៧និង២០នាទី យប់ថ្ងៃទី២៩ ខែកក្កដា ឆ្នាំ ២០១៨ នៅត្រង់ចំណុចភូមិត្រពាំងប្រលិត ឃុំសន្តិភាព ស្រុកសំពៅលូន ខេត្តបាត់ដំបង ដែលការធ្វើសកម្មភាពរបស់ជនមិនស្គាល់មុខនេះ គឺបន្ទាប់ពីមានករណីគាស់ទម្លុះទម្លាយយកទ្រព្យសម្បត្តិម្តងរួចមកហើយ កាលពីរសៀល ថ្ងៃទី ២៨ ខែកក្កដា ឆ្នាំ២០១៨ កន្លងទៅថ្មីៗនេះ នៅចំណុចភូមិតាស្តា ឃុំតាស្តា ស្រុកសំពៅលូន។
នៅក្នុងករណីនេះ ជនរងគ្រោះ ដែលជាម្ចាស់ផ្ទះមានឈ្មោះ ជុំ វទ្ធី ហៅប៉ែល ភេទប្រុសអាយុ៣៨ឆ្នាំ មុខរបរជាគ្រូបង្រៀនទាំងប្តី ទាំងប្រពន្ធ ដោយនៅវេលាខាងលើ ពួកគេមិនបាននៅផ្ទះទេ ដែលទំនងជាជាប់រវល់ក្នុងការងារបោះឆ្នោត លុះពេលត្រឡប់មកវិញត្រូវបានជនមិនស្គាល់មុខគាស់ទ្វារផ្ទះប្រមូលយកនូវទ្រព្យសម្បត្តិអស់មួយចំនួន យកទៅដោយសុវត្ថិភាព។
ទ្រព្យសម្បត្តិដែលបាត់បង់រួមមាន ៖ ប្រាក់រៀលអស់ចំនួន ៨៦ម៉ឺនរៀល ទូរទស្សន៍ទំហំ ៣២អ៊ីង ១ គ្រឿង ធុងបាស់ស្ពីកឃ័រ ១គ្រឿង និង ខ្សែ កប្លាទីន ១ខ្សែ ទម្ងន់ ២ជី។
ជុំវិញករណីចោរកម្ម ដែលបានកើតឡើងផ្ទួនៗគ្នា ក្នុងទឹកដីស្រុកសំពៅលូននេះដែរ លោកឧត្តមសេនីយ៍ត្រី ជេត វណ្ណនី ស្នងការរង ទទួលផែនយុត្តិធម៌ បានបញ្ជាក់ថា លោកបានដាក់កម្លាំងជំនាញ របស់ស្នងការដ្ឋាននគរបាលខេត្ត ចុះទៅកាន់តំបន់ខាងលើហើយ ដើម្បីធ្វើការសហការជាមួយនឹងកម្លាំងអធិការដ្ឋាន ក្នុងការវែកមុខរកជនសង្ស័យទាំង២ករណី ខាងលើនេះ៕
Source: Kampuchea Thmey Daily
0 Comments