ភ្នំពេញ ៖ ក្រសួងធនធានទឹកបានឲ្យដឹងថា ទឹកទន្លេមេគង្គ ក្នុងខេត្តស្ទឹងត្រែង បានជន់លិច ចូលតំបន់ទំនាបមួយចំនួនក្នុងសង្កាត់ចំនួន០៤ របស់ក្រុងស្ទឹងត្រែង ជាបណ្តើរៗហើយ ក្នុងនោះមានសង្កាត់ព្រះបាទ សង្កាត់ស្រះឫស្សី សង្កាត់ស្ទឹងត្រែង និងសង្កាត់សាមគ្គី។
ក្រសួងធនធានទឹកបានឲ្យដឹងថា គិតមកដល់ម៉ោង ១១ ព្រឹកថ្ងៃទី ៣០ ខែកក្កដា ឆ្នាំ ២០១៨ នេះ ទឹកទន្លេមេគង្គ ក្នុងខេត្តស្ទឹងត្រែង បានបន្តកើនឡើងដល់កម្ពស់ ១០,៨០ ម (កម្ពស់ប្រកាសឲ្យប្រុងប្រយ័ត្ន ១០,៧០ ម)។ ទឹកទន្លេបានលិចចូលតំបន់ទំនាបមួយចំនួនក្នុងសង្កាត់ចំនួន ០៤ របស់ក្រុងស្ទឹងត្រែង ជាបណ្តើរៗហើយ ក្នុងនោះមានសង្កាត់ព្រះបាទ សង្កាត់ស្រះឫស្សី សង្កាត់ស្ទឹងត្រែង និងសង្កាត់សាមគ្គី។
សូមរំលឹកថា កាលពីថ្ងៃទី២៩ ខែកក្កដា ឆ្នាំ២០១៨នេះ ក្រសួងធនធានទឹក និងឧតុនិយម បានបញ្ជាក់ឲ្យដឹងថា ដោយសារមានភ្លៀងធ្លាក់ ជាបន្តបន្ទាប់នៅតំបន់ផ្ទៃរងទឹកភ្លៀង របស់ទន្លេមេគង្គក្នុងប្រទេសថៃ និងប្រទេសឡាវ បានបង្កឲ្យទឹកទន្លេមេគង្គលើ ក្នុងប្រទេសកម្ពុជា បន្ដកើនឡើងជាបន្ដបន្ទាប់។
សេចក្ដីជូនដំណឹង ស្ដីពី ស្ថានភាពកម្ពស់ទឹកទន្លេ របស់ក្រសួងធនធានទឹក បានបញ្ជាក់ទៀតថា យោងតាមការព្យាករនៅថ្ងៃទី០២ ខែសីហា ឆ្នាំ២០១៨ ទឹកទន្លេមេគង្គលើ អាចកើនឡើងដល់៖ទន្លេមេគង្គស្ទឹងត្រែង ទឹកអាចកើនឡើងដល់ ១១.០៥ ម៉ែត្រ (កម្រិតប្រកាសឲ្យប្រុងប្រយ័ត្ន ១០.៧០ ម៉ែត្រ)។
ទន្លេមេគង្គក្រចេះ ទឹកអាចកើនឡើងដល់ ២១.៦៥ ម៉ែត្រ (កម្រិតប្រកាសឲ្យប្រុងប្រយ័ត្ន ២២.០០ ម៉ែត្រ)។ ទន្លេមេគង្គកំពង់ចាម ទឹកអាចកើនឡើងដល់ ១៤.៨០ ម៉ែត្រ (កម្រិតប្រកាសឲ្យប្រុងប្រយ័ត្ន ១៥.២០ ម៉ែត្រ)។ ជាមួយគ្នានេះ ក្រសួងធនធានទឹក អំពាវនាវឲ្យក្រសួង-ស្ថាប័ន អាជ្ញាធរដែនដីពាក់ព័ន្ធ និងបងប្អូនប្រជាពលរដ្ឋ ដែលរស់នៅតាមដងទន្លេមេគង្គលើ ជ្រាបជាព័ត៌មាន និងបង្កើនការយកចិត្តទុកដាក់ ប្រុងប្រយ័ត្នខ្ពស់ ដើម្បីចៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ៕
Source: Kampuchea Thmey Daily
0 Comments