ស្ទឹងត្រែង ៖ កម្លាំងសង្កាត់រដ្ឋបាលព្រៃឈើស្ទឹងត្រែង សហការជាមួយនគរបាលប្រឆាំងបទល្មើសសេដ្ឋកិច្ចខេត្ត ដឹកនាំដោយលោកហ៊ុន សំអឿន នាយរងសង្កាត់ស្ទឹងត្រែង ក្រោមការបញ្ជាផ្ទាល់ពីលោកលៀង សេង ប្រធានមន្ទីរកសិកម្មខេត្ត បានចុះបង្ក្រាបទូកដឹកឈើប្រភេទលេខមួយចំនួន២គ្រឿង កាលពីវេលាម៉ោង២១និង៣០នាទីយប់ កណ្ដាលអធ្រាត្រ ក្នុងដងទន្លេសេកុង ត្រង់ចំណុចក្រោមស្ពានសេកុង ទល់មុខក្រុងស្ទឹងត្រែង។
លោកហ៊ុន សំអឿន នាយរងសង្កាត់រដ្ឋបាលព្រៃឈើស្ទឹងត្រែងបានអោយដឹងថា ទូកដឹកឈើ៣ទៅ៤ងគ្រឿង ត្រូវបានគេលបលួចដឹកឈើប្រភេទលេខ១(កកោះស្រឡៅ) ចេញពីដងទន្លេសេកុង ចំណុចភូមិញ៉ឺន ស្ថិតក្នុងឃុំស្តៅ ស្រុកសេសាន ហើយកម្លាំងរបស់លោក បានសហការជាមួយនគរបាល ប្រឆាំងបទល្មើសសេដ្ឋកិច្ចខេត្តចុះប្រតិបត្តិការរយៈពេល២យប់រួចមកហើយ តែមិនត្រូវបានទទួលជោគជ័យនោះឡើយ ហាក់បីដូចមានអ្នករាយការណ៍អោយក្រុមឈ្មួញដឹងខ្លួនមុនបើកទូករត់គេបាត់អស់។
លោកនាយរងសង្កាត់បន្តទៀតថា នៅយប់ថ្ងៃទី៣០កក្កដា ត្រូវបានគេរាយកាណ៍ថាមានទូកដឹកឈើចំនួន៣គ្រឿង បានចុះពីចំណុចខាងលើ លោកក៏បានរៀបចំកម្លាំងដោយសម្ងាត់ ក្រោមបញ្ជាពីលោកលៀងសេង ប្រធានមន្ទីរកសិកម្មត្រៀមចាំនៅចំណុចក្រោមស្ពានសេកុង ហើយនៅវេលាម៉ោងខាងលើទូកដឹកឈើ បានចុះមកដល់ ត្រូវបានកម្លាំងចម្រុះ បង្ក្រាបបានចំនួន២គ្រឿង មួយទូកទៀតត្រូវបានគេពន្លិចចោលចូលទៅក្នុងទឹកបាត់។
លោកវរសេនីយ៍ឯកវ៉ាសុផាន់ នាយការិយាល័យប្រឆាំងបទល្មើខេត្តដែលរួមសហការជាមួយរដ្ឋបាលព្រៃឈើអស់៣ថ្ងៃបានបន្តថា ទូកឈើ២គ្រឿងរួមទាំងកម្មករ៤នាក់ ដែលសមត្ថកិច្ចបង្ក្រាបលោកបាន បញ្ជាអោយម្ចាស់ទូកដឹកឈើបើកមកកាន់ចំណុចកំពង់សាឡាង ដើម្បីធ្វើការប្រគល់ទៅអោយរដ្ឋបាលព្រៃឈើចាត់ការបន្ត។
បច្ចុប្បន្ន ទូកដឹកឈើទាំង២គ្រឿង ប្រមាណ៣០ទៅ៤០ម៉ែត្រគូប ដែលប្រភេទឈើលេខ១(កកោះស្រឡៅ) ត្រូវបានដឹកជញ្ជូនតាមគោយន្ត យកទៅរក្សាទុកនៅខណ្ឌរដ្ឋបាលព្រៃឈើខេត្តដើម្បីចាត់ការតាមនីតិវិធី។ ចំណែកកម្មករ៤នាក់ ដែលជាអ្នកស៊ីឈ្នួលអោយថៅកែដឹកឈើមិនត្រូវបានឃាត់ខ្លួននោះទេ៕
Source: Kampuchea Thmey Daily
0 Comments