ភ្នំពេញ ៖ មុខសញ្ញាចោរប្លន់ម៉ូតូចំនួនពីរនាក់ បានជួបសំណាងអាក្រក់ ខណៈពេលដែលពួកគេកំពុងធ្វើសកម្មភាពប្លន់ទៅលើស្ត្រីម្នាក់ ដែលកំពុងធ្វើដំណើរ។
យោងតាមសេចក្តីរាយការណ៍ពីលោកវរសេនីយ៍ទោ ម៉ៅ សឿត អធិការរងនគរបាលខណ្ឌច្បារអំពៅបានឲ្យដឹងថា កាលពីយប់រំលងអធ្រាត្រថ្ងៃទី២៩ ខែកក្កដានេះ មានស្ត្រីម្នាក់ជិះម៉ូតូម៉ាកicon ពណ៌ក្រហមលាយស បានធ្វើដំណើរតាមបណ្តោយផ្លូវជាតិលេខ១ក្នុងទិសដៅពីភ្នំពេញឆ្ពោះទៅកៀនស្វាយ។ លុះទៅដល់ភូមិក្តីតាកុយសង្កាត់វាលស្បូវ ខណ្ឌច្បារអំពៅ ក៏ស្រាប់តែមានជនសង្ស័យពីរនាក់ ជិះម៉ូតូស្កុបពីពណ៌សមកពីក្រោយ រួចធាក់ម៉ូតូស្ត្រីរងគ្រោះឲ្យដួល ហើយពួកវាបានស្ទុះទៅលើកម៉ូតូស្ត្រីរងគ្រោះដើម្បីជិះចេញ តែម៉ូតូអត់ឆេះ។ ភ្លាមៗនោះស្ត្រីរងគ្រោះ បានស្រែកឲ្យអ្នកភូមិនៅក្បែរចំណុចកើតហេតុជួយ ស្របគ្នានោះក៏មានអ្នកដំណើរនិងប្រជាពលរដ្ឋជួយព័ទ្ធចាប់បានម្នាក់និងម្នាក់ទៀតរត់ឡើងម៉ូតូរបស់វាគេចបាត់បន្សល់ទុកគ្នាវាម្នាក់ ត្រូវប្រជាពលរដ្ឋស្វាគមន៍នៅសល់តែដង្ហើមចង្រិត។
លោកអធិការងបន្តថា ជនសង្ស័យដែលចាប់បានឈ្មោះផៃ បុរីភេទប្រុសអាយុ២៨ឆ្នាំ និងម្នាក់ទៀតឈ្មោះបូ វិបុត្រ ភេទប្រុស អាយុ២៨ឆ្នាំ ពួកគេរស់នៅភូមិដើមចាន់ សង្កាត់ច្បារអំពៅទី២ ខណ្ឌច្បារអំពៅ ហើយឈ្មោះបូ វិបុត្រ នគរបាលតាមចាប់បានក្រោយ។ ដោយឡែកស្ត្រីរងគ្រោះក្នុងករណីប្លន់នេះបានចាកចេញទៅបាត់ ខណៈដែលប្រជាពលរដ្ឋកំពុងព្រួតគ្នាវាយទៅលើជនសង្ស័យម្នាក់នៅសល់តែដង្ហើមចង្រិត។
លោកអធិការរងបញ្ជាក់ថា ជនសង្ស័យម្នាក់ដែលប្រជាពលរដ្ឋវាយឲ្យរបួសនោះត្រូវបានបញ្ជូនទៅសង្គ្រោះនៅមន្ទីរពេទ្យបង្អែកច្បារអំពៅ និងម្នាក់ទៀតយកទៅសួរចម្លើយដើម្បីរៀបចំសំណុំរឿងបញ្ជូនទៅតុលាការចាត់ការតាមផ្លូវច្បាប់៕
Source: Kampuchea Thmey Daily
0 Comments