ចាងហ្វាងកាសែត New York Times បាននិយាយកាលពីថ្ងៃអាទិត្យថា លោកបានព្រមានលោក Donald Trump នៅក្នុងកិច្ចប្រជុំសេតវិមានថា ការវាយប្រហារខ្លាំងឡើងរបស់លោកប្រធានាធិបតីលើប្រព័ន្ធផ្សព្វផ្សាយព័ត៌មានគឺ “មានគ្រោះថ្នាក់និងខាតបង់ដល់ប្រទេសរបស់យើង ហើយនឹងនាំទៅរកអំពើហិង្សា”។
ប៉ុន្តែកិច្ចប្រជុំជាមួយលោក A.G. Sulzberger ដែលជាចាងហ្វាងកាសែតដ៏ល្បីល្បាញមួយនេះចាប់តាំងពីថ្ងៃទី១ខែមករាមកនោះគឺហាក់ដូចជាមានឥទ្ធិពលតិចតួចណាស់ក្នុងការជំរុញទំនាក់ទំនងឲ្យល្អប្រសើនិងបន្ធូរបន្ថយភាពតានតឹងរបស់លោក Trump ជាមួយនឹងសារព័ត៌មាន។
នៅលើ Twitter ប្រធានាធិបតីបានរិះគន់ចំពោះអ្វីដែលលោកហៅថាជា “អ្នកប្រឆាំង Trump នៅក្នុងឧស្សាហកម្មកាសែតដែលជិតដួលរលំ” ដោយហៅពួកគេថា “អ្នកមិនស្នេហាជាតិ!”។
កិច្ចប្រជុំរបស់លោកប្រធានាធិបតីជាមួយលោក Sulzberger បានធ្វើឡើងកាលពីថ្ងៃទី២០ខែកក្កដាក្រោយពេលមានសំណើពីសេតវិមានសម្រាប់អ្វីដែលហាក់ដូចជាកិច្ចប្រជុំជាទៀងទាត់ដើម្បីយល់ចិត្តគ្នា។
យោងតាមលោក Sulzberger បានឲ្យដឹងថា កិច្ចប្រជុំដែលរួមមានទាំងអ្នកកែសម្រួលទំព័របទវិចារណកថារបស់កាសែត Times លោក James Bennet ផងដែរនោះគឺបានរក្សាការសម្ងាត់តាមសំណើរបស់សេតវិមានរហូតដល់លោក Trump បានបង្ហោះ Twitter អំពីវានៅព្រឹកថ្ងៃអាទិត្យ។
លោក Trump បាននិយាយថា “មានកិច្ចប្រជុំដ៏ល្អនិងគួរឲ្យចាប់អារម្មណ៍មួយនៅសេតវិមានជាមួយលោក A.G. Sulzberger ។ បានចំណាយពេលជាច្រើននិយាយអំពីព័ត៌មានក្លែងក្លាយដែលកំពុងត្រូវបានផ្សព្វផ្សាយដោយប្រព័ន្ធផ្សព្វផ្សាយនិងនិងរបៀបដែលព័ត៌មានក្លែងក្លាយបានប្រែទៅជាពាក្យ “សត្រូវរបស់ប្រជាជន”។ សោកស្តាយមែន!”។
នៅក្នុងសេចក្តីថ្លែងការណ៍មួយដែលត្រូវបានចេញផ្សាយដោយកាសែត The Times នៅប៉ុន្មានម៉ោងក្រោយមក លោក Sulzberger បាននិយាយថា “ខ្ញុំបានប្រាប់គាត់ថា បើទោះបីជាពាក្យថា “ព័ត៌មានក្លែងក្លាយ” គឺមិនមែនជាការពិតនិងមានគ្រោះថ្នាក់ក៏ដោយ ខ្ញុំមានការព្រួយបារម្ភខ្លាំងជាងនេះទៅទៀតចំពោះគាត់ដែលចាត់ទុកអ្នកកាសែតថាជា សត្រូវរបស់ប្រជាជន។ ខ្ញុំបានព្រមានថា ភាសាលាបពណ៌នេះកំពុងរួមចំណែកដល់ការកើនឡើងនៃការគំរាមកំហែងប្រឆាំងអ្នកកាសែតនិងនាំទៅរកអំពើហិង្សា”។
លោក Sulzberger បានសន្និដ្ឋានថា “ខ្ញុំបានសុំឲ្យគាត់ពិចារណាឡើងវិញអំពីការវាយប្រហារខ្លាំងៗរបស់គាត់លើវិស័យសារព័ត៌មានដែលខ្ញុំជឿថាមានគ្រោះថ្នាក់និងខាតបង់ដល់ប្រទេសរបស់យើង”។
គួរបញ្ជាក់ថា ក្រៅពីការបញ្ជាក់ថាកិច្ចប្រជុំបានធ្វើឡើងនោះ សេតវិមានមិនបានផ្ដល់ព័ត៌មានលម្អិតឡើយ៕ AFP
Source: Kampuchea Thmey Daily
0 Comments