អត្រាអ្នកបោះឆ្នោតខ្ពស់ បង្ហាញពីភាពរីករាយ និងសិទ្ធិនយោបាយរបស់ប្រជាពលរដ្ឋកម្ពុជាក្នុងការពង្រឹងប្រព័ន្ធនយោបាយសេរីពហុបក្ស

ភ្នំពេញ ៖ គណបក្សប្រជាជនកម្ពុជា បានចេញសេចក្តីថ្លែងការណ៍កាលពីល្ងាចថ្ងៃទី២៩ ខែកក្កដា ឆ្នាំ២០១៨ ដោយគូសបញ្ជាក់ថា គណបក្សប្រជាជនកម្ពុជាសម្តែងសេចក្តីសោមនស្សរីករាយតាមរយៈសេចក្តីប្រកាសបណ្តោះអាសន្នរបស់គជប ដោយបានដឹងថា ប្រជាពលរដ្ឋជាង៨២,១៧%នៃអ្នកបោះឆ្នោតដែលបានចុះឈ្មោះក្នុងបញ្ជីបោះឆ្នោត បានទៅបោះឆ្នោតនៅថ្ងៃទី២៩កក្កដា ឆ្នាំ២០១៨ដើម្បីបង្ហាញពីជំរើស និងឆន្ទៈរបស់ខ្លួន។

អត្រាអ្នកបោះឆ្នោតខ្ពស់បង្ហាញពីភាពរីករាយ និងសិទ្ធិនយោបាយរបស់ប្រជាជនកម្ពុជាក្នុងការពង្រឹងប្រព័ន្ធនយោបាយសេរីពហុបក្ស។

គណបក្សប្រជាជនកម្ពុជា បានកោតសរសើរចំពោះប្រជាជនកម្ពុជាទាំងអស់ ដែលបានចូលរួមបោះឆ្នោតនៅថ្ងៃទី២៩ ខែកក្កដានេះ ដើម្បីទ្រទ្រង់ប្រព័ន្ធនយោបាយ សេរីពហុបក្សនៅកម្ពុជា និងបានថ្លែងអំណរគុណចំពោះភ្នាក់ងារគណបក្ស,អ្នកសង្កេតការណ៍បោះឆ្នោតជាតិ និងអន្តរជាតិ មកពីបណ្តាអង្គការមិនមែនរដ្ឋាភិបាល,អង្គការសង្គមស៊ីវិល,អង្គការអន្តរជាតិ និងអង្គការបណ្តាញគណបក្សនយោបាយអន្តរជាតិមកពីប្រទេសចំនួន៥២ជុំវិញពិភពលោកដើម្បីធ្វើជាសាក្សីនៃប្រជាធិបតេយ្យពិតប្រាកដនៅកម្ពុជា។

លោកស៊ិក ប៊ុនហុក ប្រធានគណៈកម្មាធិការជាតិរៀបចំការបោះឆ្នោត(គជប)បានឲ្យដឹង បន្ទាប់ពីបិទបញ្ចប់ការិយាល័យបោះឆ្នោតនៅទូទាំងប្រទេសនោះថា ប្រជាពលរដ្ឋកម្ពុជាដែលបានអញ្ជើញទៅបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨មានចំនួន៦.៨៨៥.៧២៩នាក់ ស្មើនឹង៨២,១៧%នៃចំនួនអ្នកមានឈ្មោះក្នុងបញ្ជីបោះឆ្នោតសរុប ៨.៣៨០.២១៧នាក់។

គជប បានឲ្យដឹងថា ដំណើរការបោះឆ្នោតបានប្រព្រឹត្តទៅដោយប្រក្រតីមិនមានការរំខានអ្វីទេ ទាំងសុវត្ថិភាព ទាំងសន្តិសុខ ទាំងទឹកចិត្តរីករាយរបស់អ្នកបោះឆ្នោតម្នាក់ៗ។ មានការិយាល័យ១ចំនួនបានបិទមុនម៉ោង៣រសៀលដោយសារអ្នកមានឈ្មោះក្នុងបញ្ជីបោះឆ្នោតក្នុងការិយាល័យនោះបានមកបោះឆ្នោតអស់ និងការិយាល័យភាគច្រើនបានបិទនៅម៉ោង៣រសៀលថ្ងៃដដែល។

គជប បន្តទៀតថា បើគ្មានពាក្យបណ្តឹងទេ គជប នឹងប្រកាសលទ្ធផលបណ្តោះអាសន្ននៅថ្ងៃទី១១ខែសីហា ឆ្នាំ២០១៨ និងប្រកាសលទ្ធផលផ្លូវការនៅថ្ងៃទី១៥សីហា។ ជាមួយគ្នានេះ គណៈកម្មការរៀបចំការបោះឆ្នោតរាជធានីភ្នំពេញក៏បានចេញរបាយការណ៍បណ្តោះអាសន្តស្ដីពីចំនួនអ្នកបោះឆ្នោត ដែលបានមកបោះឆ្នោតនៅមណ្ឌលបោះឆ្នោតរាជធានីភ្នំពេញ ចំនួនអ្នកបោះឆ្នោតក្នុងបញ្ជីបោះឆ្នោតចំនួន៨៦៦.២៦៥នាក់ ក្នុងនោះអ្នកដែលបានមកបោះឆ្នោតមានចំនួន៦៩៣.៦៩៩នាក់ស្មើនឹង៨០,០៨%។ចំនួនអ្នកបោះឆ្នោតទូទាំងប្រទេស មានការកើនឡើងយ៉ាងខ្លាំងលើសពីឆ្នាំ២០១៣ដែលមានតែ៦៩,៦១%តែប៉ុណ្ណោះ។ ចំណែកគណបក្សនយោបាយក៏មានការកើនឡើងដែរបើប្រៀបធៀបទៅនឹងឆ្នាំ២០១៣ ដែលមានត្រឹមតែ៨គណបក្ស នៅពេលឆ្នាំ២០១៨នេះមានគណបក្សចំនួន២០ចូលរួមប្រកួតប្រជែងក្នុងការបោះឆ្នោតនេះ៕