ភ្នំពេញ ៖ គ្រឿងអលង្ការធ្វើអំពីមាស និងផ្លាកទីន ដែល គិតជាទឹកប្រាក់ប្រមាណជាង៥០ម៉ឺនដុល្លារ ត្រូវក្រុមចោរគាស់ទ្វារតូបប្រមូលយកទៅអស់ ខណៈដែល ក្នុងផ្សារត្រូវបានគេផ្តាច់ប្រព័ន្ធកាមេរ៉ានិងភ្លើងបំភ្លឺពេលយប់ ចោលអស់។
អំពើគាស់ទម្លុះទម្លាយនេះបាន បង្កការភ្ញាក់ផ្អើលកាលពីវេលាម៉ោងជាង៧ព្រឹក ថ្ងៃទី១៤ ខែវិច្ឆិកា ឆ្នាំ២០១៨។
នៅតូបលក់គ្រឿងអលង្ការយីហោ ហាងមាស ផ្លាកទីន នៅផ្សារសាមគ្គី ផ្លូវម៉ៅសេទុង សង្កាត់ផ្សារដេប៉ូទី៣ ខណ្ឌទួលគោក។
សមត្ថកិច្ចបានចុះទៅធ្វើការស្រាវជ្រាវភ្លាមៗផងដែរ តែអ្វីដែលធ្វើឲ្យគេហួសចិត្ត និងស្តីបន្ទោសខ្លាំងៗនោះ គឺប្រព័ន្ធកាមេរ៉ាសុវត្ថិភាពរាប់សិបគ្រឿងនៅគ្រប់តូបលក់គ្រឿងអលង្ការនិងនៅជុំវិញទីតាំងលក់មាសនោះ ត្រូវបានលោកប្រធានផ្សារដែលទើបឡើងថ្មីបញ្ជាឲ្យផ្តាច់អស់មិនអនុញ្ញាតឲ្យប្រើប្រាស់នៅពេលយប់នោះទេ សូម្បីតែភ្លើងក៏កាត់ផ្តាច់ដែរ។ ចំណែកក្រុមសន្តិសុខមិនឲ្យយាមនៅខាងមុខផ្សារទេគឺឲ្យយាមនៅតែក្នុងផ្សារប៉ុណ្ណោះ។
បុរសជាម្ចាស់ហាងឈ្មោះជា ធឿន អាយុ៤៥ឆ្នាំ បានឲ្យដឹងថា នៅម៉ោងប្រមាណ៧ព្រឹក គាត់បានមកបើកតូបរបស់ខ្លួន ដើម្បីលក់ដូរដូចសព្វដង ស្រាប់តែឃើញសោទ្វារតូបរបើកពេលចូលមើលបាត់គ្រឿងមាស និងផ្លាកទីន អស់រលីង។
ជនរងគ្រោះបានប្តឹងសមត្ថកិច្ចថា គ្រឿងមាស និងផ្លាកទីន ដែលត្រូវក្រុមចោរប្រមូលយកទៅអស់នោះ បើគិតជាទឹកប្រាក់ប្រមាណជាង៥០ម៉ឺនដុល្លារអាមេរិក។
មន្ត្រីប៉ូលិសខណ្ឌទួលគោកដែលចុះស្រាវជ្រាវករណីនេះ បានឲ្យដឹងថា ករណីគាស់តូបលក់គ្រឿងអលង្ការនេះ បន្ទាប់ពីសមត្ថកិច្ចចុះទៅត្រួតពិនិត្យមើលជាក់ស្តែងឃើញថា ក្រុមជនសង្ស័យបានប្រមូលយកតែគ្រឿងមាសនិងផ្លាកទីន។ ចំណែកគ្រឿងត្បូងមួយចំនួននៅដដែល ហើយចំនួនទឹកប្រាក់សមត្ថកិច្ចមិនទាន់ហ៊ានអះអាងថា អស់ប៉ុន្មាននោះទេ។
កន្លងមកនៅក្នុងផ្សារសាមគ្គីនេះ បានបំពាក់កាមេរ៉ាសុវត្ថិភាពពេញផ្សារនិងបើកប្រើប្រាស់ទាំងយប់ទាំងថ្ងៃរួមទាំងភ្លើងបំភ្លឺផងដែរ តែបច្ចុប្បន្ននេះប្រធានផ្សារដែលទើបចូលមកកាន់ដំណែងថ្មី មិនអនុញ្ញាតឲ្យបើកប្រើប្រាស់ពេលយប់នោះទេ គឺត្រឹមម៉ោង៦ល្ងាចឲ្យបិទទាំងអស់ ដោយលោកប្រធានផ្សារឈ្មោះថោង ថងអះអាងថា ការពារខ្លាចឆ្លងចរន្តកើតមានអគ្គីភ័យ។
សមត្ថកិច្ចជំនាញ បានហៅលោកប្រធានផ្សារ និងក្រុមសន្តិសុខដែលប្រចាំការយកទៅសាកសួរនៅអធិការដ្ឋានប៉ូលិសខណ្ឌទួលគោក ដើម្បីកំណត់មុខសញ្ញា៕
Source: Kampuchea Thmey Daily
0 Comments