លោក លឹម គានហោ ៖ ក្រសួង នឹង​អនុវត្ត​គម្រោង (IAIP) ក្នុង​ខេត្ត​ចំនួន​៥ ដើម្បី​អាច​ឲ្យ​កសិករ ធ្វើការ​ស្រោចស្រព​ដំណាំ​ស្រូវ បាន​៣​ដង​ក្នុង​១​ឆ្នាំ

ភ្នំពេញ ​៖ លោក លឹម គានហោ រដ្ឋមន្ត្រីក្រសួង​ធនធានទឹក និង​ឧតុនិយម បាន​ជម្រាប​ទៅ​ភាគី គណៈប្រតិភូ​ធនាគារអភិវឌ្ឍន៍អាស៊ី (ADB) ថា ផែនការ ការងារ​យុទ្ធសាស្ត្រ​ថ្មី​របស់ ADB HQ លើ​វិស័យ​ទឹក​របស់​ប្រទេស​កម្ពុជា ក្រសួង​ធនធានទឹក និង​ឧតុនិយម នឹង​អនុវត្ត​គម្រោង Irrigated Agriculture Improvement Project (IAIP) ក្នុង​ខេត្ត​ចំនួន​៥ ដើម្បី​អាច​ឲ្យ​កសិករ ធ្វើការ​ស្រោចស្រព​ដំណាំ​ស្រូវ បាន​៣​ដង​ក្នុង​១​ឆ្នាំ​។

លោក លឹម គានហោ មាន​ប្រសាសន៍​បែបនេះ​បាន​ធ្វើ​ឡើង នៅក្នុង​ជំនួប​ពិភាក្សា​ការ​ងារ និង​រាយការណ៍​ជូន​លើ​ផែនការ ការងារ​យុទ្ធសាស្ត្រ​ថ្មី​របស់ ADB HQ លើ​វិស័យ​ទឹក​របស់​ប្រទេស​កម្ពុជា ជាមួយ គណៈប្រតិភូ​ធនាគារអភិវឌ្ឍន៍អាស៊ី (ADB) ដឹកនាំ​ដោយ​លោក Jiangfang Zhang Director of Environment, Natural Resources and Agriculture Division of the Southeast Asia Department និង​សហការី។

ក្នុង​ជំនួប​នោះ នា​ព្រឹក​ថ្ងៃទី​២៤ ខែវិច្ឆិកា ឆ្នាំ​២០១៨​នេះ លោក លឹម គានហោ រដ្ឋមន្ត្រីក្រសួង​ធនធានទឹក និង​ឧតុនិយម បាន រាយការណ៍​ជូន​លើ​ផែនការ ការងារ​យុទ្ធសាស្ត្រ​ថ្មី​របស់ ADB HQ លើ​វិស័យ​ទឹក​របស់​ប្រទេស​កម្ពុជា ថា ADB HQ និង​ក្រសួង​ធនធានទឹក និង​ឧតុនិយម នឹង​អនុវត្ត​គម្រោង Irrigated Agriculture Improvement Project (IAIP) ក្នុង​ខេត្ត​ចំនួន​៥​រួមមាន ខេត្តបាត់ដំបង ខេត្តកំពង់ចាម ខេត្តតាកែវ ខេត្តកំពង់ធំ និង​ខេត្តកំពត ដោយ​ធ្វើ​ទំនើបកម្ម ធ្វើការ​ជួសជុល​ស្តារ​ឡើង​វិញ និង​ធ្វើការ​កែលម្អ​លើ​ប្រព័ន្ធ​ធារាសាស្ត្រ​ក្នុង​ខេត្ត​ចំនួន​៥​នេះ ឲ្យ​ទៅជា​ប្រព័ន្ធធារាសាស្ត្រ​មាន​លក្ខណៈ​គ្រប់​ជ្រុងជ្រោយ ដែល​អាច​ស្រោចស្រព​បាន​ទាំង​រដូវប្រាំង និង​រដូវវស្សា ហើយ​អាចធ្វើ​ការស្រោចស្រព​ដំណាំ​ស្រូវ បាន​៣​ដង​ក្នុង​១​ឆ្នាំ​។



លោក រដ្ឋមន្ត្រី បន្តថា សាងសង់​ប្រព័ន្ធ​ប្រឡាយ​ជា​បេតុង ប្រវែង​៣៨១.២ គីឡូម៉ែត្រ សាងសង់​ទំនប់​អាង​ទឹកជា​បេតុង ប្រវែង​៦.៥​គីឡូម៉ែត្រ សាងសង់​ទំនប់​បង្ហៀរ​ខ្នាត​ធំ ប្រវែង​៨០០​គីឡូម៉ែត្រ បំពាក់​ស្ថានីយ​បូមទឹក ដើរ​ដោយ​ថាមពល​អគ្គិសនី​ខ្នាត​ធំ មាន​ក្បាល​បូម​៥ ចំនួន​២​កន្លែង ជា​ប្រភេទ Smart Pumping Systems​។

សាងសង់ Join Reservoir Operations (JOROP) ដើម្បី​ធានា​បាន​លើ​របប​ទឹក ឲ្យ​នៅតែ​ជា​ទឹក​រស់​ទាំង​រដូវវស្សា និង​រដូវប្រាំង​។ សាងសង់​មជ្ឈមណ្ឌល​ទិន្នន័យ​ទឹក​ដ៏​ទំនើប ដើម្បី​ធ្វើការ​គ្រប់ គ្រង បញ្ជា​ផ្សព្វផ្សាយ​ព្យាករណ៍​សំយោគ និង​យុទ្ធសាស្ត្រ​ដាក់​ផែនការ​ដំណោះស្រាយ និង​រក្សាទុក​លើ​ទិន្នន័យ​ទឹក​។ បំពាក់​បន្ថែម​លើ Hydrometers and AWSs​។ បំពាក់​សម្ភារ​ទំនើប​គ្រប់យ៉ាង​ទាំងអស់ ដែល​បម្រើ​ឲ្យ​ការ​បញ្ជា គ្រប់គ្រង និង​ដាក់​យុទ្ធសាស្ត្រ​ទឹក​ប្រកបដោយ​ប្រសិទ្ធភាព​ខ្ពស់ ក្នុង​លក្ខណៈ Real Time Forcasting​។ ដំឡើង​ប្រព័ន្ធ Doppler Radar តេ​ជោ​សែន​ទី​២ ថ្មី​១​ទៀត នៅ​ខេត្តកំពង់ធំ ដើម្បី​ជួយ​ដល់​ការ​ព្យាករ​គ្រប់គ្រង​ផ្សព្វផ្សាយ និង​សំយោគ​ទិន្នន័យ​ទឹក​ក្នុង​លក្ខណៈ Real Times​។ បំពាក់​សម្ភារ​គ្រប់យ៉ាង​ទាំងអស់ ក្នុង​មជ្ឈមណ្ឌល ហើយ​ធ្វើការ​បណ្តុះបណ្តាល​រយៈពេល​វែង លើ​ជំនាញ​ទាំងអស់​ដែល​បម្រើ​ឲ្យ​មជ្ឈមណ្ឌល​ទិន្នន័យ​ទឹក​ខាងលើ​។ គម្រោង IAIP ខាងលើ​ត្រូវ​ចំណាយ​ថវិកា អស់​ប្រមាណ​១៣៥​លាន​ដុល្លារ​៕

Source: Kampuchea Thmey Daily