ភ្នំពេញ ៖ អដ្ឋិធាតុ លោកវេជ្ជបណ្ឌិត បេអាត រិចឈ្នឺរ (Beat Richner) អតីតប្រធានមន្ទីរពេទ្យគន្ធបុប្ផា នឹងត្រូវដាក់តម្កល់ក្នុងចេតិយ ដែលទើបសាងសង់ថ្មី នៅខាងមុខមន្ទីរពេទ្យកុមារ គន្ធបុប្ផា នាខេត្តសៀមរាប សម្រាប់ឲ្យមហាជនគោរពបូជា នេះបើតាមការបញ្ជាក់របស់ លោក ដេនីស ឡូរ៉ង់ (Denis Laurent) អនុប្រធានមន្ទីរពេទ្យគន្ធបុប្ផា។
លោក Denis Laurent បានប្រាប់អ្នកសារព័ត៌មាន កាលពីថ្ងៃទី៣០ ខែវិច្ឆិកា ឆ្នាំ២០១៨ថា អដ្ឋិធាតុរបស់លោកវេជ្ជបណ្ឌិត បេអាត រិចឈ្នឺរ (Beat Richner) អតីតប្រធានមន្ទីរពេទ្យគន្ធបុប្ផា នឹងនាំពីប្រទេសស្វីសមកដល់ទឹកដីខេត្តសៀមរាប នៅថ្ងៃទី៥ធ្នូ ដើម្បីចំតម្កល់ទុក និងនិមន្តព្រះសង្ឃប្រមាណ៧០០អង្គ ដើម្បីបង្សុកូល តាមប្រពៃណីទំនៀមទម្លាប់ព្រះពុទ្ធសាសនាផងដែរ ហើយនៅព្រឹកថ្ងៃបន្ទាប់ ត្រូវនឹងថ្ងៃទី៦ ខែធ្នូ ឆ្នាំ២០១៨ ព្រះមហាក្សត្រ ព្រះករុណា ព្រះបាទ ព្រះបរមនាថ នរោត្តម សីហមុនី និងសម្តេចម៉ែ សម្តេចវររាជមាតាជាតិខ្មែរ នឹងយាងប្រទានភួងផ្កា និងគ្រឿងសក្ការៈបូជា នៅទីចេតិយ ដើម្បីឧទ្ទិសកុសលផលបុណ្យដល់ដួងវិញ្ញាណក្ខន្ធលោក លោកវេជ្ជបណ្ឌិត បេអាត រិចឈ្នឺរ ដែលអដ្ឋិធាតុរបស់លោកត្រូវបានដាក់តម្កល់ក្នុងចេតិយ ស្ថិតនៅខាងមុខមន្ទីរពេទ្យគន្ធបុប្ផា ខេត្តសៀមរាប ក្បែរសាលដែលលោកតែងតែប្រគំតន្ត្រីរៃអង្គាសប្រាក់សម្រាប់សង្គ្រោះកុមារកម្ពុជា។ ការចំណាយទៅលើការសាងសង់ចេតិយនេះ គឺបានមកពីកញ្ចប់ថវិកាសល់ពីពិធីបុណ្យសពរបស់លោក។
លោកវេជ្ជបណ្ឌិត បេអាត រិចឈ្នឺរ កើតនៅឆ្នាំ១៩៤៧ នៅប្រទេសស្វីស ហើយទទួលមរណភាព ក្នុងជន្មាយុ៧១ឆ្នាំ កាលពីថ្ងៃទី១៣ ខែមីនា ឆ្នាំ២០១៨ វេលាម៉ោង២ និង៤៥នាទី នៅក្នុងប្រទេសស្វីស។
ចំណែកមហាជននៅខេត្តសៀមរាប ក៏ដូចជានៅរាជធានីភ្នំពេញ បាននាំគោរពវិញ្ញាណក្ខន្ធ ដោយចាត់ទុកជាអ្នកមានគុណ ដូចជាទេវតា ដែលបានជួយកុមារ។
ការទទួលមរណភាពរបស់ លោកវេជ្ជបណ្ឌិត បេអាត រិចឈ្នឺរ គឺជាការបាត់បង់ដ៏ធំធេងមិនត្រឹមតែចំពោះក្រុមគ្រួសារប៉ុណ្ណោះទេ តែក៏ជាការបាត់បង់នូវធនធានមនុស្សដ៏សំខាន់មួយរូប ដែលបានលះបង់កម្លាំងកាយចិត្ត ស្ទើរពេញមួយជីវិត លើការងារមនុស្សធម៌ សម្រាប់ប្រជាជនកម្ពុជា តាមរយៈការបង្កើតមន្ទីរពេទ្យគន្ធបុប្ផា និងផ្តល់សេវាព្យាបាល ដោយពុំគិតថ្លៃសម្រាប់កុមារ ដែលបានរួមចំណែកយ៉ាងសំខាន់ ក្នុងការអភិវឌ្ឍន៍វិស័យសុខាភិបាល ក្នុងព្រះរាជាណាចក្រកម្ពុជា។
ប្រជាពលរដ្ឋកម្ពុជាទាំងអស់ បានសោកស្ដាយជាពន់ពេក ចំពោះគ្រូពេទ្យទេវតា ដែលបានទទួលមរណភាពនេះ ដោយបន្សល់ទុកនូវភាពសោកសៅសម្រាប់ប្រជាពលរដ្ឋខ្មែរ ដែលលោកបានជួយជីវិតកុមារកម្ពុជារាប់លាននាក់ ហើយគុណធម៌ដ៏ធំធេងទាំងនេះ ធ្វើឲ្យពលរដ្ឋកម្ពុជា មិនអាចបំភ្លេចបានឡើយ៕
Source: Kampuchea Thmey Daily
0 Comments