ភ្នំពេញ ៖ លោក Hubert Boirard នាយកប្រតិបត្តិតំណាងកសិករ ប្រចាំអាស៊ី ប៉ាស៊ីហ្វិក នៃអង្គការមូលនិធិអន្តរជាតិសម្រាប់អភិវឌ្ឍន៍វិស័យកសិកម្ម IFAD បាន សម្ដែងក្ដីរីករាយ ចំពោះ ប្រជាកសិករ ឬសមាជិកសហគមន៍ ដែលស្ថិតនៅក្នុងកម្មវិធីរបស់គម្រោងមានប្រាក់ចំណូលកើនឡើង ជីវភាពគ្រួសារមានការរីកចម្រើន។
លោក Hubert Boirard ថ្លែងបែបនេះបានធ្វើឡើង នាព្រឹកថ្ងៃសុក្រ ៨រោច ខែកត្តិក ឆ្នាំច ព.ស ២៥៦២ ត្រូវនឹងថ្ងៃទី៣០ ខែវិច្ឆិកា ឆ្នាំ២០១៨ នៅក្នុងជំនួបជាមួយ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ពិភាក្សាការងារទាក់ទងរចនាសម្ព័ន្ធ តួនាទីរបស់អង្គការកសិករ និងសុំការគាំទ្រ កិច្ចសហការពីក្រសួង សម្រាប់ពង្រឹងភាពជាដៃគូរវាងវិស័យសាធារណៈ វិស័យឯកជន អង្គការសង្គមស៊ីវិល អង្គការកសិករ និងដៃគូអភិវឌ្ឍន៍នានា សំដៅរួមចំណែកអភិវឌ្ឍវិស័យកសិកម្ម និងកាត់បន្ថយភាពក្រីក្រនៅកម្ពុជា។
លោក Hubert បានជម្រាប លោករដ្ឋមន្ត្រីថា ក្នុងឱកាសដែលលោកបានអញ្ជើញចុះទៅពិនិត្យការងារគម្រោងដែលបាននិងកំពុងអនុវត្តនៅតាមបណ្ដាខេត្តគោលដៅ ឃើញថា ប្រជាកសិករ ឬសមាជិកសហគមន៍ដែលស្ថិតនៅក្នុងកម្មវិធីរបស់គម្រោងមានប្រាក់ចំណូលកើនឡើងគួរឲ្យកត់សម្គាល់ ជីវភាពគ្រួសារមានការរីកចម្រើន និងមានការសហការគ្នាល្អរវាងសមាជិកសហគមន៍។
លោកបានបញ្ជក់បន្ថែមថា ដើម្បីកែលំអ និងអភិវឌ្ឍសេដ្ឋកិច្ចគ្រួសារ ឲ្យមានការរីកចម្រើនបានមួយកម្រិតទៀត ទាមទារកិច្ចសហការពេញលេញពីគ្រប់តួអង្គពាក់ព័ន្ធ ជាពិសេសក្រសួងកសិកម្ម រុក្ខាប្រមាញ់ និងនេសាទ ជាមួយអង្គការ IFAD តែម្ដង។
ឆ្លៀតក្នុងឱកាសនេះ លោករដ្ឋមន្ត្រី បានថ្លែងអំណរគុណជូនចំពោះអង្គការ IFAD និង សហគមន៍អឺរ៉ុប ដែលបាននិងកំពុងជួយឧបត្ថម្ភ គាំទ្រទាំងហិរញ្ញវត្ថុ និងបច្ចេកទេសដើម្បីអភិវឌ្ឍប្រទេសកម្ពុជា ជាពិសេសអភិវឌ្ឍវិស័យកសិកម្មឲ្យមានការរីកចម្រើន ហើយលោកសង្ឃឹម និងជឿជាក់ថា អង្គការអន្តរជាតិនានាដែលជាដៃគូអភិវឌ្ឍ នៅកម្ពុជា នឹងបន្តគាំទ្រដើម្បីអភិវឌ្ឍប្រទេសកម្ពុជាឲ្យសម្រេចបានតាមចក្ខុវិស័យរបស់រាជរដ្ឋាភិបាល គឺចង់ប្រែក្លាយកម្ពុជាឲ្យទៅជាប្រទេសមានចំណូលមធ្យមកម្រិតខ្ពស់នាឆ្នាំ២០៣០។
លោករដ្ឋមន្ត្រីបានបញ្ជាក់ជូន លោក Hubert ថាក្រសួងនឹងរង់ចាំផ្ដល់កិច្ចសហការឲ្យអស់ពីលទ្ធភាពជាមួយអង្គការដើម្បីធ្វើយ៉ាងណាឲ្យគម្រោងទទួលបានជោគជ័យ។
នាពេលនេះ លោក រដ្ឋមន្ត្រីក៏បានកោតសរសើរ និងវាយតម្លៃខ្ពស់ចំពោះលទ្ធផលរបស់គម្រោងដែលសម្រេចបានក្នុងរយៈពេលកន្លងមក ហើយដើម្បីបង្កើនប្រសិទ្ធភាព នៃការអនុវត្តគម្រោងទទួលបានលទ្ធផលល្អប្រសើរបានមួយកម្រិតទៀត លោក រដ្ឋមន្ត្រី បានជូនសារគន្លឹះមួយចំនួនដូចជា ១-គួរសហការជាមួយដៃគូអភិវឌ្ឍដទៃទៀត ដើម្បីបង្កើតគម្រោងមួយដែលមានសក្ដានុពលគ្របដណ្ដប់ទៅលើសេចក្តីតម្រូវការចាំបាច់ក្នុងសហគមន៍កសិកម្ម។ ២-គួរបញ្ចូលបច្ចេកទេសកសិកម្មថ្មីសមស្របដែលកសិករអាចទទួលយកបាន និងរៀបចំផែនការដាំដុះឲ្យបានស្របតាមការប្រែប្រួលអាកាសធាតុ ស្ថានភាព និងគុណភាពដី ប្រភពទឹក ដើម្បីធ្វើការការប្រកួតប្រជែង និងឆ្លើយតបតម្រូវការទីផ្សារ។ ៣-ជួយពង្រឹងសមត្ថភាពក្នុងការផលិត និងការកែច្នៃឲ្យដល់ដៃប្រជាកសិករ និងវិស័យឯកជន ធ្វើយ៉ាងណាឲ្យភាគីទាំងពីរមានឱកាសសហការគ្នាផលិតឲ្យបានសមស្របតាមតម្រូវការ គុណភាព និងស្តង់ដារទីផ្សារ តាមរយៈការអនុវត្តកសិកម្មតាមកិច្ចសន្យា៕
Source: Kampuchea Thmey Daily
0 Comments