មន្ត្រីជាន់ខ្ពស់អារ៉ាប់រួមម្នាក់បាននិយាយកាលពីថ្ងៃអង្គារថា កិច្ចពិភាក្សាដឹកនាំដោយអង្គការសហប្រជាជាតិដែលបានស្នើឡើងនៅក្នុងប្រទេសស៊ុយអ៊ែតគឺបានកត់សម្គាល់ជា “ឱកាសដ៏សំខាន់” មួយដើម្បីនាំសន្តិភាពទៅដល់ប្រទេសយេមែនបន្ទាប់ពីសង្គ្រាមអស់រយៈពេល៤ឆ្នាំ។
មតិយោបល់ពីប្រទេសអារ៉ាប់រួមដែលជាផ្នែកមួយនៃក្រុមចម្រុះគាំទ្ររដ្ឋាភិបាលដែលកំពុងប្រយុទ្ធប្រឆាំងក្រុមឧទ្ទាម Huthi នៅប្រទេសយេមែនបានកើតឡើងស្របពេលដែលបេសកជនអង្គការសហប្រជាជាតិលោក Martin Griffiths កំពុងស្ថិតនៅក្នុងរដ្ឋធានី Sanaa ដែលកាន់កាប់ដោយពួកឧទ្ទាមដើម្បីជំរុញកិច្ចចរចាដែលបានគ្រោងទុក។
រដ្ឋមន្ត្រីក្រសួងការបរទេសអារ៉ាប់រួមលោក Anwar Gargash បាននិយាយនៅក្នុងសេចក្តីថ្លែងការណ៍មួយថា “ការជម្លៀសអ្នកប្រយុទ្ធ Huthi ដែលរងរបួសចេញពីទីក្រុង Sanaa ជាថ្មីម្តងទៀតបានបង្ហាញពីការគាំទ្ររបស់រដ្ឋាភិបាលយេមែននិងក្រុមចម្រុះអារ៉ាប់ដើម្បីសន្តិភាព”។
ពួកឧទ្ទាមរងរបួសចំនួន៥នាក់បានចាកចេញតាមយន្តហោះដែលជួលដោយអង្គការសហប្រជាជាតិកាលពីថ្ងៃចន្ទទៅកាន់ប្រទេសអូម៉ង់សម្រាប់ការព្យាបាលនៅក្នុងអ្វីដែលត្រូវបានគេចាត់ទុកថាជាវិធានការ “កសាងទំនុកចិត្ត” មុនកិច្ចពិភាក្សា។
ជម្លោះដែលផ្ទុះឡើងនៅចុងឆ្នាំ២០១៤បាននាំអោយប្រទេសក្រីក្រមួយនេះធ្លាក់ចូលក្នុងគ្រោះទុរ្ភិក្សហើយអង្គការសហប្រជាជាតិបានចាត់ទុកប្រទេសយេមែនថាជាគ្រោះមហន្តរាយមនុស្សធម៌ដ៏អាក្រក់បំផុតរបស់ពិភពលោក។
អង្គការសុខភាពពិភពលោកបាននិយាយថា មនុស្សជិត១០,០០០នាក់ត្រូវបានសម្លាប់ចាប់តាំងពីក្រុមចម្រុះគាំទ្ររដ្ឋាភិបាលដែលដឹកនាំដោយប្រទេសអារ៉ាប៊ីសាអ៊ូឌីតបានធ្វើអន្តរាគមន៍ ក្នុងជម្លោះនៅដើមឆ្នាំ២០១៥។
ទោះបីជាយ៉ាងណាក៏ដោយ ក្រុមសិទិ្ធមនុស្សភ័យខ្លាចថា ចំនួនពិតប្រាកដអាចខ្ពស់ជាងនេះ។
មិនទាន់មានកាលបរិច្ឆេទណាមួយត្រូវបានកំណត់សម្រាប់កិច្ចចរចាដែលគ្រោងនឹងប្រព្រឹត្តទៅនៅប្រទេសស៊ុយអ៊ែតនៅឡើយទេប៉ុន្តែមានក្តីសង្ឃឹមកាន់តែខ្លាំងឡើងថា ពួកគេអាចដំណើរការទៅបាននៅសប្តាហ៍នេះ៕ AFP
Source: Kampuchea Thmey Daily
0 Comments