ក្លិបបាល់ទាត់ព្រះខ័នរាជស្វាយរៀង សមាជិកពានរង្វាន់លីគកំពូលកម្ពុជា Metfone Cambodian League បានប្រកាសចុះកិច្ចសន្យាជាមួយកីឡាករបរទេសមួយរូបទៀតដើម្បីត្រៀមរដូវកាលថ្មីគឺខ្សែការពារកណ្ដាលមួយរូបជាជនជាតិអាមេរិក Jonny Campbell (Jonathan Campbel) ដែលធ្លាប់មានបទពិសោធន៍ប្រកបអាជីពនៅភ្នំពេញក្រោន ក៏ដូចជាលីគលំដាប់ទី៣ប្រទេសថៃ និងប្រទេសអាមេរិក ជាស្រុកកំណើត។
កីឡាករវ័យ២៧ឆ្នាំរូបនេះ បានបញ្ជាក់ក្រោយចុះកិច្ចសន្យាក្លិបថ្មីលើទឹកដីប្រទេសកម្ពុជាថា «ខ្ញុំបានពិភាក្សាក្នុងការបន្តអាជីពនៅទីនេះ១រដូវកាលទៀតជាមួយព្រះខ័នរាជស្វាយរៀង។ ខ្ញុំជឿថាក្លិបនេះមានកីឡាករដែលមានសមត្ថភាពច្រើន ដែលអាចធ្វើរឿងពិសេសៗជូនអ្នកគាំទ្រក្នុងរដូវកាលនេះ។ ខ្ញុំសង្ឃឹមថា ខ្ញុំអាចជួយក្រុមទទួលបានជោគជ័យក្នុងឆ្នាំ២០១៩ខាងមុខនេះ។ អរគុណគ្រប់គ្នាដែលតែងតែគាំទ្រនិងលើកទឹកចិត្តខ្ញុំ ហើយសូមធ្វើរឿងនេះបន្តទៀត។ អរគុណលោកគ្រូបង្វឹកConor Nestor ដែលជម្រុះឲ្យខ្ញុំក្លាយជាកីឡាករកម្រិតខ្ពស់មួយទៀត»។
កីឡាករJonny Campbell ដែលជាកីឡាករដ៏មានទេពកោសល្យមួយរូបធ្លាប់លេងនៅក្លឹប Chachoengsao FC (លីគលំដាប់ទី៣ប្រទេសថៃ) ក្នុងឆ្នាំ២០១៧កន្លងទៅ។ កីឡាករសញ្ជាតិអាមេរិក រូបនេះធ្លាប់បានលេងជាមួយក្លិប Maimi City ឆ្នាំ២០១៦ ក្លឹប Charlotte Independence ឆ្នាំ២០១៥ និង ក្លិប Philadelphia Fury ឆ្នាំ២០១៤ នៅស្រុកកំណើតផងដែរ។
ខ្សែការពារ Jonny Campbell ជាកីឡាករបរទេសទី៤ហើយ ដែលក្លិបព្រះខ័នរាជស្វាយរៀង ប្រកាសចុះបញ្ជីត្រៀមរដូវកាលថ្មីបន្ទាប់ពីកីឡាករចាស់២រូបដែលក្លិបបន្តកិច្ចសន្យាក្រោយចប់កិច្ចសន្យាឆ្នាំចាស់នោះគឺកីឡាករអង់គ្លេស Harley Willard និងកីឡាករជប៉ុន Daisuke Kobayash និងកីឡាករកូរ៉េខាងត្បូង Gi Sung Yeon។ យោងតាមគោលការណ៍របស់សហព័ន្ធកីឡាបាល់ទាត់កម្ពុជា ស្របតាមសហព័ន្ធកីឡាបាល់ទាត់អាស៊ី កំណត់ថា ក្លិបជាសមាជិកលីគរបស់ខ្លួនអាចចុះបញ្ជីកីឡាករបរទេសបាន៥នាក់ ប៉ុន្តែក្នុងនោះត្រូវមានកីឡាករអាស៊ី ១រូប (រូបមន្ត ៤+១)។ ដូច្នេះព្រះខ័នរាជស្វាយរៀង អាចចុះបញ្ជីកីឡាករបរទេសបាន១រូបទៀតសម្រាប់រដូវកាលថ្មីខាងមុខ៕
Source: Kampuchea Thmey Daily
0 Comments