ភ្នំពេញ ៖ អង្គការមូលនិធិថែទាំសុខភាពអ្នកជំងឺអេដស៍(AHF) បានរៀបចំយុទ្ធនាការទិវាពិភពលោកប្រយុទ្ធនឹងជំងឺអេដស៍ ក្រោមប្រធានបទ «រក្សាសន្យាប្រយុទ្ធនឹងមេរោគអេដស៍ និងជំងឺអេដស៍» នៅមជ្ឈមណ្ឌលកោះពេជ្រក្រោមអធិបតីភាពលោក អៀង មូលី ទេសរដ្ឋមន្ត្រី ប្រធានអាជ្ញាធរជាតិប្រយុទ្ធនឹងជំងឺអេដស៍ និងមានអ្នកចូលរួមយ៉ាងច្រើនកុះករ។
ព្រឹត្តិការណ៍នេះរៀបចំឡើងក៏ដើម្បីអបអរសាទរសមិទ្ធផលជាសកលរបស់ខ្លួន ដែលបានថែទាំគាំទ្រដល់អ្នករស់ជាមួយមេរោគអេដស៍ ១លាននាក់ ដែលសម្រេចបាននៅខែតុលានេះ ដែលសមិទ្ធផលនេះជាផ្នែកមួយនៃទិវាពិភពលោកប្រយុទ្ធនឹងជំងឺអេដស៍។
លោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ី បានឲ្យដឹងកាលពីល្ងាចថ្ងៃទី១ ខែធ្នូ ឆ្នាំ២០១៨ ថា បច្ចុប្បន្នមានមនុស្សប្រមាណជា ៦៧០០០នាក់នៅក្នុងប្រទេសកម្ពុជាកំពុងរស់នៅជាមួយមេរោគអេដស៍ ដោយមានកិច្ចសហប្រតិបត្តិការជាមួយរាជរដ្ឋាភិបាល ជាពិសេសមជ្ឈមណ្ឌលជាតិប្រយុទ្ធ នឹងជំងឺអេដស៍ សើស្បែក និងកាមរោគ យើងពិតជាមានមោទនភាពក្នុងការបង្ហាញជាសាធារណៈថា ក្នុងចំណោមអ្នករស់នៅជាមួយមេរោគអេដស៍ជាងពាក់កណ្តាលទទួលការថែទាំគាំទ្រដោយអង្គការ AHF កម្ពុជា។
ទន្ទឹមគ្នានោះដែរ លោកMichael Weinstein ប្រមុខដឹកនាំអង្គការ AHF ទូទាំងសកលបានលើកឡើងថា មនុស្សជិត ៣៧លាននាក់ ដែលអ្នករស់នៅជាមួយមេរោគអេដស៍ និងជំងឺអេដស៍នៅទូទាំងពិភពលោក គឺមានតែជាងពាក់កណ្តាល នៃអ្នកជំងឺទាំងនោះប៉ុណ្ណោះ ដែលបានទទួលការព្យាបាល នេះបញ្ជាក់យ៉ាងច្បាស់ថា ពិភពលោកនៅមិនទាន់បោះជំហានដើម្បីសម្រេចគោលដៅព្យាបាលជាសកលនៅឡើយទេ។
លើសពីនេះថវិកាសម្រាប់ការប្រយុទ្ធ នឹងជំងឺអេដស៍ បានធ្លាក់ចុះប្រមាណ ៣ពាន់លានដុល្លារក្នុងរយៈពេល៦ឆ្នាំចុងក្រោយនេះ។ ប្រសិនបើយើងពិតជាចង់រក្សា និងបន្តជោគជ័យទាំងអស់នេះ ថ្នាក់ដឹកនាំទូទាំងពិភពលោកត្រូវតែរក្សាសន្យាប្រយុទ្ធនឹងជំងឺអេដស៍ ដោយដាក់របៀបវារៈជាអាទិភាពក្នុងសុខភាពសាធារណៈ និងធ្វើឲ្យប្រាកដថាថវិកាមូលនិធិសកលត្រូវបានបំពេញយ៉ាងពេញលេញ។
លោក អៀង មូលី ទេសរដ្ឋមន្ត្រី ប្រធានអាជ្ញាធរជាតិប្រយុទ្ធនឹងជំងឺអេដស៍ បានថ្លែងថា ត្រឹមឆ្នាំ២០១៨នេះ មានអ្នកផ្ទុកមេរោគអេដស៍ប្រមាណជិត៦ម៉ឺននាក់កំពុងទទួលការព្យាបាលដោយឱសថប្រឆាំងមេរោគអេដស៍ដោយមិនបង់ប្រាក់។ ករណីរើសអើង និងមាក់ងាយទៅលើអ្នកផ្ទុកមេរោគអេដស៍ និងជំងឺអេដស៍ បានឈានទៅរកការលុបបំបាត់ទាំងស្រុងនាពេលអនាគតដ៏ខ្លី ព្រោះនៅក្នុងឆ្នាំ២០១៨ នេះគ្មានករណីណាមួយស្តីពីការរើសអើង និងមាក់ងាយត្រូវបានរាយការណ៍ទេនៅទូទាំងប្រទេស។ ព្រះរាជាណាចក្រកម្ពុជាត្រូវបានអង្គការ UNAIDS វាយតម្លៃថាជាប្រទេសមួយក្នុងចំណោមប្រទេសតែ៧ប៉ុណ្ណោះក្នុងពិភពលោក ដែលបានសម្រេចបានគោលដៅ ៩០ ៩០ ៩០ មុនកាលកំណត់ (ឆ្នាំ២០២០) នៅទីក្រុងប៉ារីស កាលពីខែកក្កដា ឆ្នាំ២០១៧។
លោក ទេសរដ្ឋមន្ត្រី បញ្ជាក់ទៀតថា វឌ្ឍនភាព ប្រសិទ្ធភាព និងសមិទ្ធផលក្នុងការប្រយុទ្ធនឹងជំងឺអេដស៍ដែលកម្ពុជាទទួលបាននាពេលនេះ គឺជាភស្តុតាងវិទ្យាសាស្ត្រមួយយ៉ាងពិតប្រាកដដែលបញ្ជាក់យ៉ាងច្បាស់ថា ទស្សនវិស័យរបស់យើងក្នុងការកសាងសង្គមមួយដែលគ្មានការគំរាមកំហែងពីមេរោគអេដស៍និងជំងឺអេដស៍ គឺពិតជាអាចធ្វើបាន។នេះមានន័យថាកម្ពុជាកំពុងតែស្ថិតនៅលើផ្លូវត្រូវដែលនឹងឈានទៅសម្រេចបាននូវគោលដៅ ៩៥.៩៥.៩៥. ដែលកំណត់ដោយអង្គការសហប្រជាជាតិយ៉ាងពិតប្រាកដ។
លោកបានបញ្ជាក់ថាក្នុងនាមអាជ្ញាធរជាតិប្រយុទ្ធនឹងជំងឺអេដស៍ និងអ្នករងគ្រោះដោយសារមេរោគអេដស៍ និងជំងឺអេដស៍ អង្គការជាតិ និងអង្គការអន្តរជាតិទាំងអស់ សូមសម្តែងនូវអំណរគុណយ៉ាងជ្រាលជ្រៅចំពោះការប្តេជ្ញាចិត្តដ៏មោះមុតប្រកបដោយគតិបណ្ឌិតយ៉ាងឧត្តុង្គឧត្តមបំផុត និងការផ្តល់ការគាំទ្រដែលមិនចេះរីងស្ងួតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ប៊ុន រានី ហ៊ុនសែន ប្រធានកាកបាទក្រហមកម្ពុជា ក្នុងការដាក់ចេញនូវគោលនយោបាយ ជាយុទ្ធសាស្ត្រប្រកបដោយប្រសិទ្ធភាពនិងការផ្តល់នូវការគាំទ្រថវិកាផងដែរ។ ជាពិសេសការបង្កើននូវថវិកាជាតិជារៀងរាល់ឆ្នាំ ដល់អាជ្ញាធរជាតិប្រយុទ្ធនឹងជំងឺអេដស៍ ដើម្បីមានលទ្ធភាពពង្រីកសមត្ថភាពការងាររបស់ខ្លួនបានជាប្រចាំ៕
Source: Kampuchea Thmey Daily
0 Comments