បន្ទាយមានជ័យ ៖ ស្រមោលអតីតកាល ត្រូវបានយកមកលាតត្រដាងក្នុងអង្គពិធីមិទ្ទិញអបអរសាទរខួបអនុស្សាវរីយ៍លើកទី៣៦ទិវាជ័យជំនះ៧មករា ខេត្តបន្ទាយមានជ័យ ថ្ងៃទី៧ ខែមករា ឆ្នាំ១៩៧៩ -ថ្ងៃទី៧ ខែមករា ឆ្នាំ២០១៥ ក្នុងគោលបំណងបញ្ជាក់ឲ្យកូនខ្មែរជំនាន់ក្រោយបានដឹងពីប្រវត្តិដ៏ឃោរឃៅនាសម័យ៣ឆ្នាំ ៨ខែ ២០ថ្ងៃ ដែលគ្រប់គ្រងដោយរបបប៉ុលពតកន្លងទៅ។
មានប្រជាពលរដ្ឋជាច្រើន មិនថានៅទូទាំងប្រទេសកម្ពុជា ឬនៅក្នុងខេត្តបន្ទាយមានជ័យនោះទេ ដែលបងប្អូនទាំងនោះធ្លាប់បានឆ្លងកាត់នៅរបបដោយព្រៃផ្សៃមួយគ្រប់គ្រងដោយពួកប៉ុលពត អៀង សារី ,ខៀវ សំផន និងនួនជា កន្លងទៅបានប្រែក្លាយឲ្យសង្គមជាតិលើផ្ទៃប្រទេសទាំងមូល បានជួបនៅភាពអកុសលដ៏ឃោរឃៅបំផុតរហូតធ្វើឲ្យមនុស្សរាប់លាននាក់ ត្រូវបានកាប់សម្លាប់ដូចសត្វធាតុ ហើយទង្វើបែបនេះ ត្រូវបានគេយកមកបង្ហាញជូនយយុវវ័យជំនាន់ក្រោយ បានជ្រាបជាបន្តបន្ទាប់ រហូតមកដល់ពេលនេះ។
សូមបញ្ជាក់ដែរថា នៅព្រឹកថ្ងៃ៧ ខែមករា ឆ្នាំ២០១៥នេះ គេបានសម្គាល់ឃើញមានការធ្វើពិធីគំរប់ខួបអនុស្សាវរីយ៍លើកទី៣៦ ទិវាជ័យជំនះ៧មករា នៅទូទាំងខេត្តបន្ទាយមានជ័យ ដោយស្រុកក្រុងមួយចំនួនបានរៀបចំធ្វើពិធីនេះ ចាប់ពីថ្ងៃទី៥ និងទី៦មកម្ល៉េះ លុះដល់ថ្ងៃទី៧ ខែមករា ឆ្នាំ២០១៥ នៅឯទីស្នាក់ការគណបក្សប្រជាជនកម្ពុជាក៏ធ្វើពិធីនោះដែរ លុះដល់ពេលរសៀលថ្ងៃដដែល ពិធីបុណ្យថ្ងៃ៧មករា ត្រូវបានប្រារព្ធធ្វើពិធីខួបអនុស្សាវរីយ៍ទី៣៦ទិវាជ័យជំនះ៧មករា នៅឯក្រុងប៉ោយប៉ែតបន្តទៀត។
នៅក្នុងទិវាខាងលើនោះផងដែរ គឺមានការរៀបចំសម្ដែងសាច់រឿងឈុតខ្លីដែលមានចំណងជើងថា "ស្រមោលអតីតកាលទាក់ទិននិងការកាប់សម្លាប់យ៉ាងឃោរឃៅក្នុងរបប៣ឆ្នាំ ៨ខែ ២០ថ្ងៃ ដែលគ្រប់គ្រងដោយលោកប៉ុលពត អៀង សារី និងខៀវ សំផន'' ហើយឈុតឆាកខាងលើនោះ បានរម្លឹកឡើងវិញពីរបបព្រៃផ្សៃទុកជូនដល់យុវវ័យជំនាន់ក្រោយ បានដឹងពីការរស់នៅដ៏លំបាករបស់ក្រុមគ្រួសាររបស់គេនាសម័យខាងលើនោះ។
លោកអ៊ុង អឿន ប្រធានគណបក្សប្រជាជនកម្ពុជាខេត្តបន្ទាយមានជ័យ និងជាប្រធានក្រុមប្រឹក្សាខេត្ត បានបញ្ជាក់ជូនអង្គពិធីនេះថា បើគ្មានថ្ងៃ៧មករានេះទេ អ្វីៗគ្រប់យ៉ាងទាំងអស់ត្រូវបានរលាយសាបសូន្យ និងអាចក្លាយជាផេះក៏ថាបាន គឺនៅទូទាំងប្រទេសតែម្តង។
លោក អ៊ុង អឿនបានបន្តទៀតថា ឈុតឆាកដែលបានសម្ដែងមុននេះបន្តិច គឺវាជារឿងពិតក្នុងសង្គមជាតិរបស់យើង មិនមែនចេះតែច្នៃប្រឌិតដូចឈុតឆាករឿងផ្សេងៗនោះឡើយ។
លោក អ៊ុង អឿនបានបន្តទៀតថា ថ្ងៃ៧មករានេះហើយ គឺជាមាតាទី២របស់យើងគ្រប់ៗគ្នានៅទូទាំងប្រទេស ហើយជនណាមួយហ៊ានប្រមាទមើលងាយដល់ថ្ងៃ៧មករា គឺមិនទទួលស្គាល់ថ្ងៃ៧មករា ក្រោមការដឹកនាំរបស់សម្ដេចទាំង៣កន្លងទៅនោះ គឺជនទាំងនោះគឺមិនមែនជាមនុស្សឡើយ។ លោក អ៊ុង អឿន ក៏បានបន្ថែមទៀតថា គ្រប់ជំនាន់តទៅមុខទៀត គឺយុវវ័យទាំងអស់ដែលជាកូនខ្មែរ ត្រូវយល់ដឹងពីប្រវត្តិថ្ងៃ៧មករាឲ្យបានច្បាស់លាស់ មិនត្រូវប្រមាទមើលងាយថ្ងៃ៧មករានេះបានឡើយ៕
ពៅរី
0 Comments