កំពង់ឆ្នាំង ៖ មិទ្ទិញប្រារព្ធខួបលើកទី៣៦ ទិវាជ័យជំនះ៧មករា (៧មករា១៩៧៩.៧មករា២០១៥) បានប្រារព្ធធ្វើនៅស្រុកជលគីរីខេត្តកំពង់ឆ្នាំង នៅព្រឹកថ្ងៃទី៦ ខែមករា ឆ្នាំ២០១៥ ក្រោមអធិបតីភាពលោក ជួន ជឿន មេបញ្ជាការកងរាជអាវុធហត្ថខេត្តកំពង់ឆ្នាំង និងជាសមាជិកអចិន្ត្រៃយ៍គណបក្សប្រជាជនកម្ពុជាខេត្តកំពង់ឆ្នាំង ដោយមានការចូលរួមពីលោកអ៊ឹង លាងហួរ សមាជិកក្រុមប្រឹក្សាខេត្តនិងជាសមាជិកអចិន្ត្រៃយ៍គណបក្សប្រជាជនកម្ពុជាខេត្ត និងជាក្រុមការថ្នាក់ខេត្តចុះជួយស្រុកជលគីរី អាជ្ញាធរដែនដីគ្រប់លំដាប់ថ្នាក់ក្នុងស្រុកជីលគីរី លោកគ្រូអ្នកគ្រូសិស្សានុសិស្ស ព្រះសង្ឃនិងប្រជាពលរដ្ឋចូលរួមសរុបចំនួន១.២០០នាក់ យ៉ាងសប្បាយរីករាយផងដែរ។
លោកជួន ជឿន បានមានប្រសាសន៍លើកឡើង អំពីប្រវត្តិសាស្ត្រអតីតកាល ដែលប្រទេសកម្ពុជាបានធ្លាក់ចូលទៅក្នុងភ្នក់ភ្លើងសង្គ្រាម ដែលបណ្តាលឲ្យប្រទេសជាតិរងគ្រោះមហន្តរាយខូចខាតស្ទើរទាំងស្រុង នូវរាល់ហេដ្ឋារចនាសម្ព័ន្ធនានា ជាពិសេសគឺនៅក្នុងសម័យប៉ុលពត៣ឆ្នាំ៨ខែ២០ថ្ងៃ បានបង្ខំឲ្យប្រជាជនធ្វើការលើសកម្លាំងបង្អត់បាយសម្លាប់ជាតិសាសន៍ឯងជាង៣លាននាក់ និងបំផ្លិចបំផ្លាញ ប្រទេសជាតិខ្ទេចគ្មានសល់។
លោកជួនជឿន បានបន្តថា ក្រោយថ្ងៃរំដោះ៧មករា១៩៧៩ ប្រទេសបានទទួលជ័យជំនះទាំងស្រុង ហើយនៅក្រោមការដឹកនាំប្រកបដោយគតិបណ្ឌិតរបស់សម្តេចទាំងបីដែលជាប្រមុខដឹកនាំគណបក្សប្រជាជនកម្ពុជា បានកសាងឡើងវិញនូវរាល់ហេដ្ឋារចនាសម្ព័ន្ធនានា ការកសាងធនធានមនុស្ស ធ្វើឲ្យប្រទេសជាតិមានសុខសន្តិភាពពេញលេញនៅទូទាំងប្រទេស មានអ្នកវិនិយោគបង្កើតរោងចក្រសហគ្រាស បង្កើតការងារ ដើម្បីឲ្យកូនចៅរបស់ប្រជាពលរដ្ឋមានប្រាក់ខែ និងជីវភាពសមរម្យ ដើម្បីកាត់បន្ថយភាពក្រីក្រ និងធ្វើឲ្យប្រទេសជាតិមានការអភិវឌ្ឍន៍គ្រប់វិស័យដូចថ្ងៃនេះគឺ ដោយសារគុណថ្ងៃ៧មករា គ្មានថ្ងៃ៧មករា ១៩៧៩ គ្មានគណបក្សប្រជាជនកម្ពុជា ក៏គ្មានអ្វីៗដូចពេលនេះដែរ៕ .
0 Comments