រដ្ឋាភិបាល ដែលស្ថិតនៅក្រោមសម្ពាធរបស់ប្រទេសអូស្ត្រាលីបានជួបប្រទះបញ្ហាប្រឈមទ្វេរដងនៅថ្ងៃចន្ទពីអង្គការសហប្រជាជាតិនិងក្រុមវេជ្ជបណ្ឌិតឈានមុខមួយលើការប្រព្រឹត្តដ៏ឃោរឃៅចំពោះជនភៀសខ្លួននៅជំរំកោះដាច់ស្រយាល។
មន្ត្រីជាន់ខ្ពស់មួយរូបរបស់ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) បានចោទប្រកាន់ “អ្នកការិយាធិបតេយ្យនិងអ្នកនយោបាយ” ថាបានប្រើអំណាចប្រឆាំងក្រុមវេជ្ជបណ្ឌិតនិងធ្វើឲ្យមានគ្រោះថ្នាក់ដល់អាយុជីវិតនៅក្នុងជំរំលើកោះ Nauru និង Manus ។
ប្រទេសអូស្ត្រាលីបានឃុំខ្លួនជនចំណាកស្រុកដែលគ្មានការអនុញ្ញាតដែលព្យាយាមទៅដល់ទ្វីបកោះតាមទូកនៅក្នុង “មណ្ឌលឃុំឃាំងឆ្នេរសមុទ្រ” ជាផ្នែកមួយនៃគោលនយោបាយដ៏តឹងរ៉ឹងមួយដែលត្រូវបានបង្កើតឡើងដើម្បីបង្អាក់អ្នកស្វែងរកសិទ្ធិជ្រកកោន។
លោកស្រី Catherine Stubberfield នៃ UNHCR បានរិះគន់គោលនយោបាយនេះហើយនិយាយថា ការផ្លាស់ប្តូរវាគឺជាបញ្ហានៃការព្យាបាលមនុស្សនិងសុភាវធម៌ជាមូលដ្ឋាននាពេលឥឡូវនេះ។
ស្របពេលជាមួយគ្នានោះ មហាវិទ្យាល័យវេជ្ជសាស្ត្ររ៉ូយ៉ាល់អូស្ត្រាលី (RACP) នៅថ្ងៃចន្ទក៏បានបញ្ចេញសំឡេងរបស់ខ្លួនផងដែរដោយអំពាវនាវឲ្យរដ្ឋាភិបាលផ្លាស់ប្តូរទិសដៅ។
មនុស្សប្រហែល១៦០នាក់នៅតែស្ថិតលើកោះ Nauru រួមទាំងស្ត្រីនិងកុមារផងដែរហើយគេជឿថាមានបុរសចំនួន៦០០នាក់កំពុងស្ថិតនៅមណ្ឌលអន្តរកាលលើកោះ Manus បន្ទាប់ពីជំរំដែលបើកដោយប្រទេសអូស្ត្រាលីបានបិទទ្វារកាលពីចុងឆ្នាំមុន។
រដ្ឋាភិបាលសំឡេងភាគតិចរបស់នាយករដ្ឋមន្ត្រី Scott Morrison បានយល់ព្រមដោយស្ងៀមស្ងាត់ក្នុងការផ្ទេរកុមារចេញពីកោះ Nauru ប៉ុន្តែកំពុងស្ថិតក្រោមសម្ពាធដ៏ធ្ងន់ធ្ងរឲ្យបិទវាទាំងស្រុង។
វេជ្ជបណ្ឌិតនិងសមាជិកសភាឯករាជ្យលោក Kerryn Phelps នៅថ្ងៃចន្ទបានដាក់ចេញនូវច្បាប់មួយដែលតម្រូវឲ្យមានការផ្ទេរជាបណ្ដោះអាសន្នពីកោះ Nauru ឬ Manus សម្រាប់នរណាម្នាក់ដែលត្រូវបានគេវាយតម្លៃថាត្រូវការការព្យាបាលក៏ដូចជាការផ្ទេរបណ្តោះអាសន្នសម្រាប់កុមារទាំងអស់និងក្រុមគ្រួសាររបស់ពួកគេចេញពីកោះ Nauru ផងដែរ៕ AFP
Source: Kampuchea Thmey Daily
0 Comments