មេដឹកនាំក្រុមរដ្ឋឥស្លាមម្នាក់ដែលជាប់ពាក់ព័ន្ធនឹងការសម្លាប់បុគ្គលិកជំនួយអាមេរិកលោក Peter Kassig និងអ្នកទោសលោកខាងលិចដទៃទៀតត្រូវបានតម្រង់គោលដៅនៅក្នុងការវាយប្រហារមួយកាលពីថ្ងៃអាទិត្យដោយក្រុមចម្រុះប្រឆាំងនឹងពួកជីហាដនិយមដឹកនាំដោយអាមេរិកក្នុងប្រទេសស៊ីរី។
លោក Kassig ដែលមានអាយុ២៦ឆ្នាំនៅពេលគាត់ស្លាប់គឺស្ថិតក្នុងចំណោមអ្នកទោសមួយក្រុមដែលត្រូវបានកាត់ក្បាលដោយក្រុមជីហាដកាលពីខែវិច្ឆិកាឆ្នាំ២០១៤។ ការប្រហារជីវិតដ៏ធំនោះត្រូវបានបង្ហាញនៅក្នុងវីដេអូមួយដែលចេញផ្សាយដោយក្រុមនេះ។
លោក Sean Ryan អ្នកនាំពាក្យក្រុមចម្រុះដឹកនាំដោយអាមេរិកបាននិយាយថា “កងកម្លាំងសម្ព័ន្ធភាពបានបើកការវាយប្រហារជាក់លាក់ប្រឆាំងនឹងសមាជិកជាន់ខ្ពស់ម្នាក់នៃក្រុម ISIS ឈ្មោះ Abu al-Umarayn និងសមាជិក ISIS មួយចំនួនទៀតក្នុងតំបន់ Badiyah Desert នៃប្រទេសស៊ីរី”។
អ្នកនាំពាក្យបានបន្ថែមថា “លោក Al Umarayn បានផ្តល់ការចង្អុលបង្ហាញពីការគំរាមកំហែងដល់កងកម្លាំងចម្រុះហើយគាត់បានជាប់ពាក់ព័ន្ធក្នុងការសម្លាប់ប្រជាពលរដ្ឋអាមេរិកនិងអតីតទាហានអាមេរិកឈ្មោះ Peter Kassig ដែលត្រូវបានចាប់ពង្រត់ក្នុងប្រទេសស៊ីរីនៅឆ្នាំ២០១៣”។
លោក Ryan បន្តថា គាត់ក៏ជាប់ពាក់ព័ន្ធក្នុងការសម្លាប់អ្នកទោសជាច្រើននាក់ទៀតផងដែរ។
យោងតាមទីភ្នាក់ងារសារព័ត៌មាន Sana បានឲ្យដឹងថា រដ្ឋាភិបាលក្រុងដាម៉ាស់កាលពីថ្ងៃអាទិត្យបានចោទប្រកាន់ក្រុមចម្រុះថាបានបាញ់មីស៊ីលប្រឆាំងនឹងទីតាំងកងទ័ពស៊ីរី។
Sana បានរាយការណ៍ដោយដកស្រង់ប្រភពយោធាថា “នៅវេលាម៉ោង៨យប់ កងកម្លាំងចម្រុះអាមេរិកបានបាញ់មីស៊ីលជាច្រើនគ្រាប់ប្រឆាំងទីតាំងកងទ័ពមួយចំនួនរបស់យើងនៅជួរភ្នំ Ghorab ភាគខាងត្បូងតំបន់ Sukhna ប៉ុន្តែបង្កឲ្យមានការខូចខាតដល់តែឧបករណ៍ប៉ុណ្ណោះ”។
គួរបញ្ជាក់ថា លោក Peter Kassig បានបង្កើតអង្គការមនុស្សធម៌មួយក្នុងឆ្នាំ២០១២ដែលបានបណ្តុះបណ្តាលជនស៊ីវិលប្រមាណ១៥០នាក់ដើម្បីផ្តល់ជំនួយផ្នែកវេជ្ជសាស្ត្រដល់ប្រជាជននៅក្នុងប្រទេសស៊ីរី។ ក្រុមរបស់គាត់ក៏បានផ្តល់ស្បៀងអាហារ គ្រឿងសម្រាប់ចម្អិនម្ហូបអាហារ សម្លៀកបំពាក់និងថ្នាំពេទ្យដល់ជនក្រីក្រផងដែរ៕ AFP
Source: Kampuchea Thmey Daily
0 Comments