ក្រុមចោរ ក្លែងឯកសណ្ឋានជាប៉ូលិសដើរគាស់ផ្ទះលួច ប្លន់ដ៏សកម្ម និងបំពុលឆ្កែ ត្រូវជាប់អន្ទាក់នគរបាលស្រុកសំរោង

កំពង់ស្ពឺ ៖ ក្រុមមុខសញ្ញាក្រុមចោរគាស់ផ្ទះលួចទ្រព្យសម្បត្តិ ស្ទាក់ប្លន់ និងបំពុលឆ្កែយ៉ាងសកម្ម ត្រូវបានកម្លាំងនគរបាល នៃអធិការនគរបាលស្រុកសំរោងទង ប្រតិបត្តិការបង្ក្រាបបាន២នាក់ និង២នាក់ទៀតរត់គេចខ្លួនបាត់ ខណៈពេលកម្លាំងចុះល្បាតតាមគោលដៅសំខាន់ៗងាយកើតមានបទល្មើស។

ក្រុមចោរ ដែលដើរធ្វើសកម្មភាពគាស់ផ្ទះប្រជាពលរដ្ឋ បំពុលឆ្កែលួចប្លន់ទ្រព្យសម្បត្តិប្រជាពលរដ្ឋ ក្នុងភូមិសាស្ដ្រខេត្ដកំពង់ស្ពឺ ត្រូវបានកម្លាំងនគរបាលស្រុកសំរោងទង ធ្វើការស្រាវជ្រាវ និងពួនស្ទាក់តាមផ្លូវលេខ១៤៣ ត្រង់ចំណុច ភូមិអន្លង់ស្នោរ ឃុំស្គុះ ស្រុកសំរោងទង ខេត្តកំពង់ស្ពឺ នាយប់ថ្ងៃចន្ទ ១១ រោច ខែកត្តិក ឆ្នាំច សំរឹទ្ធិស័ក ពុទ្ធសករាជ២៥៦២ វេលាម៉ោង ០២:១៥ នាទី រំលងអធ្រាត្រ ឈានចូលថ្ងៃទី០៣ ខែធ្នូ ឆ្នាំ២០១៨នេះ។

ប្រតិបត្តិការបង្ក្រាបមុខសញ្ញាដ៏សកម្មខាងលើដោយសារកើតមានបទល្មើសគាស់ផ្ទះបំពុលសត្វឆ្កែយកម៉ូតូកើតជាបន្ដបន្ទាប់ច្រើនករណីពេក ទើបកម្លាំងនគរបាលស្រុកសំរោងទង បានបែងចែកគោលដៅចុះធ្វើការល្បាត ក្នុងភូមិសាស្ត្រសំខាន់ៗជារៀងរាល់យប់។

ខណៈពេលកំពុងល្បាតកម្លាំងនគរបាលបានប្រទះឃើញមុខសញ្ញាសង្ស័យចំនួន ៤នាក់ បានឃាត់ដើម្បីសាកសួរ ប៉ុន្តែជនសង្ស័យចំនួន ០២នាក់ បានដឹងខ្លួនរត់គេចបាត់ដោយឃាត់ខ្លួនបានចំនួន២នាក់ រួមមាន៖ ១-ឈ្មោះ ដាំ សារិន ភេទប្រុស អាយុ ៤០ឆ្នាំ មុខរបរ ធ្វើស្រែ និងជាប្រជាការពារភូមិ ទីលំនៅភូមិអាយៀន ឃុំពាំងល្វា ស្រុកឧដុង្គ ( ឃាត់ខ្លួន )។

២-ឈ្មោះ ផាត រតនា ភេទប្រុស អាយុ ២២ឆ្នាំ មុខរបរ មិនពិតប្រាកដទីលំនៅភូមិឈើលំ ឃុំមហាឬស្សី ស្រុកគងពិសី និង២នាក់ទៀតរត់គេចខ្លួនបាត់ស្រមោល។

សមត្ថកិច្ចដកហូតសម្ភារៈវត្ថុតាង រួមមាន ៖ ថ្នាំសម្រាប់បំពុលឆ្កែចំនួន០១ថង់ ពណ៌ខ្មៅ, ទួរណឺវិស ០១ដើម, សាំង ០២ដប, ដង្កាប់តូច០១ដើម, ម៉ូតូ ០១គ្រឿង ម៉ាក C125 ស៊េរីឆ្នាំ២០១៣ ពណ៌ខ្មៅ។

បក្ខពួកក្រុមជនសង្ស័យបានឆ្លើយសារភាពថា ខ្លួន និងបក្ខពួកពិតជាបានធ្វើសកម្មភាពបំពុលឆ្កែគាស់ផ្ទះលួចម៉ូតូ និងលួចទ្រព្យសម្បត្តិនៅក្នុងភូមិសាស្ត្រខេត្តកំពង់ស្ពឺជាច្រើនលើកពិតប្រាកដមែន។

បន្ទាប់មានចម្លើយសារភាពរបស់ជនសង្ស័យទាំង២នាក់ លោកឧត្ដមសេនីយ៍ទោ សម សាមួន ស្នងការនគរបាលខេត្តកំពង់ស្ពឺ ដោយមានការសម្របសម្រួលនិតិវិធីពីលោកស្រី ចាត សូរស្មី ព្រះរាជអាជ្ញា អយ្យការអម សាលាដំបូងខេត្ដកំពង់ស្ពឺ កម្លាំងការិយាល័យព្រហ្មទណ្ឌខេត្ត និងអធិការនគរបាលស្រុកសំរោងទង សហការជាមួយកម្លាំងនគរបាលស្រុកអង្គស្នួល និងនគរបាលខណ្ឌពោធិ៍សែនជ័យ រាជធានីភ្នំពេញ នៅថ្ងៃចន្ទ ទី៣ ខែធ្នូ ឆ្នាំ២០១៨ បានចុះធ្វើការឆែកឆេរនៅផ្ទះរបស់ឈ្មោះ ណន វុទ្ទី ស្ថិតក្នុងភូមិត្មាតពង សង្កាត់បឹងធំ ខណ្ឌពោធិ៍សែនជ័យ និងផ្ទះរបស់ឈ្មោះ ថូ ថុន ហៅដា ហៅស្វិត នៅភូមិឈើលំ ឃុំមហាឬស្សី ស្រុកគងពីសី។

ប្រតិបត្តិការរុករកវត្ថុតាងនោះ រកឃើញសម្ភារៈដែលពាក់ព័ន្ធបទល្មើស រួមមាន៖ ស្លាកលេខម៉ូតូ ០៤សន្លឹក, ប្រដាប់កិបស្លាកលេខ និងឧបករណ៍កាត់ដែក និងឆាបសោម៉ូតូ, ថ្នាំបំពុលឆ្កែ ០៣កំប៉ុងធំ, ខ្នងកង់ម៉ូតូ ០៤វង់ និងសម្ភារៈកែច្នៃ ជួសជុលម៉ូតូមួយចំនួនទៀត។

ក្រៅពីវត្ថុតាងខាងលើ សមត្ថកិច្ចបានរកឃើញឯកសណ្ឋាននគរបាលជាតិ ដែលមានស្លាកឈ្មោះ អនុសេនីយ៍ទោ ដាំ សារិន អត្តលេខ ០១២៧៨ របស់ឈ្មោះ ដាំ សារិន និងបានឆ្លើយសារភាពថា ឯកសណ្ឋាននេះខ្លួនទិញពីគេនៅភ្នំពេញ រួមជាមួយសក្តិ និងធ្វើស្លាកឈ្មោះដោយក្លែងបន្លំធ្វើជានគរបាលជាតិ ដើម្បីធ្វើសកម្មភាពលួច ប្លន់ក្នុងភូមិសាស្ត្រ ខេត្តកំពង់ស្ពឺ។

បច្ចុប្បន្នមុខសញ្ញាចោរលួចទាំងពីរនាក់ត្រូវបានជំនាញកសាងសំណុំរឿងបញ្ជូនទៅស្ថាប័នអយ្យការ និងបន្ដស្វែងរកចាប់ខ្លួនមុខសញ្ញាគេចខ្លួនដើម្បីចាត់ការតាមនីតិវិធីច្បាប់៕