រដ្ឋាភិបាលអ៊ីស្រាអែលបានសម្រេចកាលពីថ្ងៃចន្ទដើម្បីរៀបចំការបោះឆ្នោតមុនពេលកំណត់មួយនៅខែមេសាខណៈលោកនាយករដ្ឋមន្ត្រី Benjamin Netanyahu កំពុងតស៊ូដើម្បីរក្សាសំឡេងភាគច្រើននៅក្នុងសភាស្របពេលដែលគាត់ប្រឈមនឹងការចោទប្រកាន់ពីបទអំពើពុករលួយ។
ថ្វីបើនយោបាយនិងច្បាប់របស់លោក Netanyahu មានបញ្ហានាពេលថ្មីៗនេះក៏ដោយក៏ការស្ទង់មតិបានបង្ហាញថា លោកនឹងនៅតែជានាយករដ្ឋមន្ត្រីដដែលបន្ទាប់ពីការបោះឆ្នោតថ្មីដែលនឹងធ្វើឲ្យគាត់ក្លាយទៅជានាយករដ្ឋមន្ត្រីកាន់តំណែងយូរបំផុតរបស់ប្រទេសអ៊ីស្រាអែល។
សេចក្តីថ្លែងការណ៍មួយបាននិយាយថា ប្រមុខគណបក្សនៅក្នុងក្រុមចម្រុះរបស់លោក Netanyahu បានព្រមព្រៀងគ្នារៀបចំការបោះឆ្នោតនៅដើមខែមេសា។
រដ្ឋមន្ត្រីក្រសួងយុត្តិធម៌លោកស្រី Ayelet Shaked បាននិយាយថា រដ្ឋាភិបាលកំពុងរៀបចំសេចក្តីព្រាងច្បាប់មួយដើម្បីរំលាយរដ្ឋសភានិងរៀបចំការបោះឆ្នោតនៅថ្ងៃទី៩ខែមេសា។
ទោះបីជាយ៉ាងណាក៏ដោយ ការបោះឆ្នោតមិនត្រូវបានគេកំណត់ទេរហូតដល់ខែវិច្ឆិកាប៉ុន្តែមានការរំពឹងទុកថា ក្រុមចម្រុះនេះនឹងមិនមានរយៈពេលយូរនោះទេ។
លោក Netanyahu បានបង្ហាញពីអ្វីដែលគាត់មើលឃើញថាជាសមិទ្ធផលរបស់គាត់ហើយបាននិយាយថា គាត់សង្ឃឹមសម្រាប់ក្រុមចម្រុះមួយស្រដៀងទៅនឹងក្រុមចម្រុះបច្ចុប្បន្នដែលត្រូវបានគេមើលឃើញថាជាក្រុមស្តាំនិយមបំផុតនៅក្នុងប្រវត្តិសាស្ត្ររបស់ប្រទេសអ៊ីស្រាអែល។
លោកបាននិយាយថា “យើងសុំឲ្យមានអាណត្តិច្បាស់លាស់មួយពីអ្នកបោះឆ្នោតដើម្បីបន្តដឹកនាំប្រទេសអ៊ីស្រាអែលតាមរបៀបរបស់យើងផ្ទាល់”។
ការសម្រេចចិត្តនេះបានធ្វើឡើងខណៈក្រុមចម្រុះកំពុងព្យាយាមដើម្បីយល់ព្រមលើសេចក្តីព្រាងច្បាប់ដ៏សំខាន់មួយទាក់ទងនឹងពួកជ្វីហ្វជ្រុល Orthodox ដែលបម្រើនៅក្នុងជួរកងទ័ព។
គណបក្សជ្រុល Orthodox មានអាសនៈចំនួន១៣ក្នុងចំណោមអាសនៈទាំង៦១របស់ក្រុមចម្រុះដែលផ្តល់ឲ្យពួកគេនូវឥទ្ធិពលដ៏សំខាន់៕ AFP
Source: Kampuchea Thmey Daily
0 Comments