ពានរង្វាន់​ស្វាយរៀង​ខាប់ ឆ្នាំ​២០១៨ ចាប់​គូប្រកួត​វគ្គ​១៦​ក្រុម​ចុងក្រោយ ​រួចរាល់​ហើយ​

​បាល់ទាត់ ៖ ពានរង្វាន់​បាល់ទាត់​មហាជន​ធំជាងគេ​ប្រចាំខេត្ត​ស្វាយរៀង​ ឈ្មោះថា ​«​ស្វាយរៀង ខាប់ (Svay Rieng Cup) លើក​ទី​៤ ឆ្នាំ​២០១៨ ដែល​រៀបចំឡើង​ដោយ​សហភាព​សហព័ន្ធ​យុវជន​កម្ពុជា​ខេត្តស្វាយរៀង បានបញ្ចប់​ដំណើរការ​ប្រកួត​ក្នុង​វគ្គ​១៦​ក្រុម​ចុងក្រោយ ហើយ​កាលពី​ចុង​សប្ដាហ៍​ថ្មីៗ​នេះ ក្រោយ​បញ្ចប់​វគ្គ​ប្រកួត​ក្នុង​វគ្គ​៣២​ក្រុម​ចុងក្រោយ ​ក៏ដូចជា​វគ្គ​ចែក​ពូ​ល​។​

​ពានរង្វាន់ Svay Rieng Cup ឆ្នាំនេះ​មាន​ក្រុម​ចូលរួម​ចំនួន​៥២​ក្រុម​ចែកជា​១៣​ពូ​ល​ផ្សេងគ្នា ​នៅ​កីឡដ្ឋាន​ខេត្ត​ ជាប់​ព្រំដែន​កម្ពុជា​-​វៀតណាម មួយ​នេះ​។ ក្រោយមក​គណៈកម្មការ​បាន​ស្វែង​រកឃើញ​ក្រុម​ខ្លាំងជាងគេ​ចំនួន​១៦​ក្រុម​មានឱកាស​ឡើងទៅ​វគ្គ​បន្ត​។

ជា​លទ្ធផល​នៅ​ថ្ងៃ​សៅរ៍ ទី​៨ ខែធ្នូ ឆ្នាំ​២០១៨ ក្រុម​ក្លិប​កីឡា​ពូ​ប្រុស​ជី​ភូ ចាញ់​ក្រុម​ស​.​ស​.​យ​.​ក ស្រុក​ស្វាយជ្រុំ ៣​ទល់​០ ខណៈ​ក្រុម Blue Dragon ឈ្នះ​ក្រុម​រាជសីហ៍​ផ្សា​ថូ​ម៉ាក់ ៥​ទល់​១ ហើយ​ក្រុម​ធា​រី​បាវិត ចាញ់​ក្រុម​សៀង​ហៃ​រី​ហ្សត​អេ​ហ្វ​ស៊ី ២ ​ទល់​១ ​និង​ក្រុម​អធិការនគរបាល​ក្រុង​បាវិត ឈ្នះ​ក្រុម Chong Prek FT ១០​ទល់​១​។​

​ចំណែក​លទ្ធផល​គូ​ផ្សេងទៀត​ដែល​ប្រកួត​នៅ​ថ្ងៃអាទិត្យ ទី​៩ ខែធ្នូ ឆ្នាំ​២០១៨ ក្រុម​ស​.​ស​.​យ​.​ក​ ស្រុក​រមាសហែក ឈ្នះ​ក្រុម​រដ្ឋ​ករ​ទឹក​ខេត្តស្វាយរៀង ៦​ទល់​១ ហើយ​ក្រុម​លីង​គួ​យ​អែ​ហ្វ​ស៊ី ចាញ់​ក្រុម​ស​.​ស​.​យ​.​ក​ក្រុង​បាវិត ៤​ទល់​២ ខណៈ​ក្រុម​អគ្គិសនី​ស្វាយរៀង​ចាញ់​ក្រុម​សុភ​ក្តិ​មូទ័រ FC ជី​ភូ ៤​ទល់​២ និង​ចុងក្រោយ​ក្រុម Panda FC ចាញ់​ក្រុម​ស​.​ស​.​យ​.​ក​ ក្រុង​បាវិត ៦​ទល់​៣​។​

​ការប្រកួត​ធ្វើឡើង​នៅលើ​ទីលាន​ស្មៅ​ធម្មជាតិ នៃ​កីឡដ្ឋាន​ខេត្តស្វាយរៀង​ជាប់ៗ​គ្នា ខណៈ​នេះ​ជា​លើក​ទី​៤​ បន្ទាប់ពី​បង្កើត​ចាប់តាំងពី​ឆ្នាំ​២០១៥ ​ដោយ​ត្រូវបាន​ផ្ដួចផ្ដើម​បង្កើត​ឡើង ដោយ​សហភាព​សហព័ន្ធ​យុវជន​កម្ពុជា​ខេត្តស្វាយរៀង ដែលមាន​ ឯកឧត្ដម ឌី វិជ្ជា ជា​ប្រធាន ស្របពេល​២​លើ​មុន​ដំបូង ក្រុមបាល់ទាត់ ស​.​ស​.​យ​.​ក ក្រុង​បាវិត ជា​ម្ចាស់​ជើងឯក​ទាំង​២​ឆ្នាំ​ជាប់ៗ​គ្នា​និង​ចុងក្រោយ​ក្រុម​ក្រុម​ធា​រី​លិញ​គួ​យ ជា​ម្ចាស់​ជើងឯក​ម្តង​៕

​

Source: Kampuchea Thmey Daily