កាលពីថ្ងៃចន្ទ លោកប្រធានាធិបតី Donald Trump និងជំទាវទីមួយ Melania បានគោរពវិញ្ញាណក្ខន្ធដល់អតីតប្រធានាធិបតី George H.W. Bush ដែលសាកសពរបស់គាត់ត្រូវបានតម្កល់ក្នុងអគាររដ្ឋនៅវិមានកាពីតូល។
លោក Trumps បានធ្វើដំណើរមួយភ្លែតទៅកាន់អគារដំបូលរាងមូលនៃវិមានកាពីតូលដែលជាកន្លែងមឈូសដែលដណ្តប់ដោយទង់ជាតិរបស់លោក Bush ត្រូវបានតម្កល់ទុកដើម្បីជាការគោរពដល់ប្រធានាធិបតីអាមេរិកទី៤១រូបនេះនិងរម្លឹកអំពីជីវិតដ៏មិនធម្មតារបស់គាត់។
លោក Bush បានទទួលមរណភាពកាលពីថ្ងៃសុក្រក្នុងអាយុ៩៤ឆ្នាំនៅឯផ្ទះរបស់គាត់ក្នុងទីក្រុងហ៊ូស្តុនដែលនេះជាមរណភាពមួយដែលនាំឲ្យជនជាតិអាមេរិកឆ្លុះបញ្ចាំងអំពីជីវិតនៃការបំពេញកាតព្វកិច្ចនិងការបម្រើរបស់គាត់ចំពោះប្រទេសក្នុងនាមជាមេដឹកនាំមួយរូប។
លោក Trump គ្រោងនឹងចូលរួមពិធីបុណ្យសពថ្នាក់រដ្ឋនៅថ្ងៃពុធនៅឯមហាវិហារជាតិក្រុងវ៉ាស៊ីនតោនដែលវាជាពិធីបុណ្យសពប្រធានាធិបតីដំបូងបង្អស់ចាប់តាំងពីលោក Gerald Ford ទទួលមរណភាពក្នុងឆ្នាំ២០០៦។
ប៉ុន្តែកាលពីថ្ងៃចន្ទ ក្រោយពេលសាច់ញាតិរបស់លោក Bush និងឥស្សរជនបានចាកចេញទៅ លោកប្រធានាធិបតីបានធ្វើដំណើរចាកចេញពីសេតវិមានទៅកាន់វិមានកាពីតូល។
អមជាមួយលោកជំទាវ, លោក Trump បានគោរពហើយពួកគេបានឈរជិតមឈូសរបស់លោក Bush ប្រហែលមួយនាទី។ ពួកគេបានចេញពីទីនោះដោយគ្មានពិធីអ្វីធំដុំឡើយ។
លោក Bush មិនដែលផ្តល់ភាពកក់ក្តៅដល់លោក Trump ឡើយហើយលោកបានបង្ហាញឲ្យគេដឹងថា លោកមិនបានបោះឆ្នោតឲ្យគាត់ទេនៅឆ្នាំ២០១៦។
ប៉ុន្តែកាលពីថ្ងៃចន្ទ លោក Trump បានសរសេរទៅកាន់សមាជិកសភាដើម្បីសរសើរលោក Bush ថាជាបុរសម្នាក់ដែលបានដឹកនាំជីវិតដើម្បីបង្ហាញពីអ្វីដែលពិតជាអស្ចារ្យសម្រាប់អាមេរិក។
លោកបានសរសេរថា “លោកប្រធានាធិបតី Bush បានធ្វើការក្នុងជីវិតដ៏វែងឆ្ងាយរបស់គាត់ដើម្បីនាំមកនូវពិភពលោកដែលមានយុត្តិធម៌និងសន្តិភាពយូរអង្វែង”៕ AFP
Source: Kampuchea Thmey Daily
0 Comments