ប្រធានាធិបតីអាមេរិកលោក Donald Trump បានអំពាវនាវកាលពីថ្ងៃចន្ទឲ្យដាក់ពន្ធនាគាររយៈពេលយូរដល់អតីតមេធាវីរបស់គាត់គឺលោក Michael Cohen ដែលបានសារភាពនិយាយកុហកទៅសភាអំពីការបន្តកិច្ចព្រមព្រៀងអចលនទ្រព្យមួយជាមួយប្រទេសរុស្ស៊ីជំនួសមុខឲ្យលោក Trump ក្នុងអំឡុងពេលយុទ្ធនាការឃោសនាបោះឆ្នោតឆ្នាំ២០១៦។
លោក Trump ក៏បានសរសើរអតីតទីប្រឹក្សាម្នាក់ទៀតគឺលោក Roger Stone ផងដែរសម្រាប់ការបដិសេធផ្តល់សក្ខីកម្មប្រឆាំងនឹងរូបលោកដែលជាហេតុបង្កឲ្យមានការចោទប្រកាន់ពីបទរារាំងសាក្សីនិងការបង្អាក់ដោយខុសច្បាប់ចំពោះការស៊ើបអង្កេតស្តីពីការឃុបឃិតជាមួយរុស្ស៊ីរបស់រដ្ឋអាជ្ញាពិសេសលោក Robert Mueller ។
លោក Trump បានចោទប្រកាន់លោក Cohen ថាបានប្រឌិតរឿងរ៉ាវស្តីពីកិច្ចសន្យារុស្ស៊ីរបស់គាត់ដើម្បីកាត់បន្ថយការកាត់ទោសរបស់គាត់ទៅលើការគេចពន្ធ ការលួចបន្លំហិរញ្ញវត្ថុនិងការរំលោភបំពានហិរញ្ញវត្ថុនៃយុទ្ធនាការជាច្រើនករណី។
កាលពីសប្តាហ៍មុន លោក Cohen ក៏បានសារភាពផងដែរថា បាននិយាយកុហកក្នុងការផ្តល់សក្ខីកម្មអំពីទំនាក់ទំនងជាមួយមន្ត្រីក្រុងមូស្គូដែលមានអំណាចលើការសាងសង់អគារ Trump Tower មួយនៅទីក្រុងមូស្គូ។
លោក Trump ដែលទើបតែត្រឡប់មកពីកិច្ចប្រជុំកំពូល G20 ក្នុងទីក្រុង Buenos Aires វិញបានបញ្ចេញកំហឹងរបស់គាត់នៅក្នុង Twitter។
លោកបានសរសេរថា “អ្នកមានន័យថា គាត់អាចធ្វើបានទាំងអស់ដែលមិនទាក់ទងទៅនឹង Trump។ អ្វីៗពាក់ព័ន្ធទៅនឹងការក្លែងបន្លំ ប្រាក់កម្ចីធំៗនិងគេចពន្ធជាដើមហើយនោះមិនត្រូវជាប់ពន្ធនាគាររយៈពេលយូរទេឬ?”។
លោក Trump បានបន្ថែមថា “គាត់បាននិយាយកុហកចំពោះលទ្ធផលនេះ ហើយខ្ញុំគិតថា ការកាត់ទោសទាំងស្រុងនិងពេញលេញគួរតែត្រូវបានផ្តន្ទាទោស”។
គួរបញ្ជាក់ថា លោក Cohen បានក្លាយជាសាក្សីដ៏សំខាន់ម្នាក់នៅក្នុងការស៊ើបអង្កេតរបស់លោក Mueller អំពីថាតើយុទ្ធនាការរបស់លោក Trump បានឃុបឃិតជាមួយរុស្ស៊ីនៅក្នុងឆ្នាំ២០១៦ដែរឬក៏អត់៕ AFP
Source: Kampuchea Thmey Daily
0 Comments