បាល់ទាត់ ៖ សហព័ន្ធកីឡាបាល់ទាត់កម្ពុជា (ស.ប.ក) បានរៀបចំព្រឹត្តិការណ៍ប្រកួតបាល់ទាត់ជើងឯកយុវជនអាយុក្រោម១៧ឆ្នាំ (U17) និងពានរង្វាន់យុវជនក្រោមអាយុ១៥ឆ្នាំ (U15) និងបាល់ទាត់នារី ប្រចាំឆ្នាំ២០១៨-១៩ ដោយពិធីបើកបានធ្វើឡើងពីថ្ងៃសៅរ៍ ទី៨ ខែធ្នូ ឆ្នាំ២០១៨ថ្មីៗនេះ លើទីលានត្បែងមានជ័យ ក្នុងខេត្តព្រះវិហារ។
សម្រាប់ប្រកួតបើកឆាកក្នុងពានរង្វាន់ U15 គឺ ក្រុមសាលាតម្រង់ទិសវិទ្យាល័យត្បែងមានជ័យ ព្រះវិហារ ចាញ់ក្រុមសាលាតម្រង់ទិសខេត្តសៀមរាប ១ទល់៤ លើទីលានវិទ្យាល័យត្បែងមានជ័យ។
ចំណែកពានរង្វាន់ U17 វិញ ក្រុមសាលាតម្រង់ទិសវិទ្យាល័យត្បែងមានជ័យ ខេត្តព្រះវិហារ បានប្រកួតស្មើគ្នាជាមួយក្រុមសាលាតម្រង់ទិសខេត្តសៀមរាប ៣ទល់៣ លើទីលានជាមួយគ្នា។ ចំណែកក្រុមបាល់ទាត់នារីកម្រិតទី១ ក្រុមខេត្តបាត់ដំបង ឈ្នះស្វាយរៀង ២ទល់១ នៅលើទីលានជាមួយគ្នានេះដែរ។
នេះជាឆ្នាំទី២ ដែលពានរង្វាន់ដដែលនេះ រៀបចំឡើងវិញដែលជាគោលដៅរបស់សហព័ន្ធកីឡាបាល់ទាត់កម្ពុជា ក្នុងទិសដៅដើម្បីត្រៀមខ្លួនសម្រាប់ក្រុមជម្រើសជាតិក្នុងព្រឹត្តិការណ៍កីឡាស៊ីហ្គេមឆ្នាំ២០២៣ ដែលកម្ពុជាធ្វើម្ចាស់ផ្ទះ។
យ៉ាងណាក្តី ក្រុមដែលបានចូលរួម គឺមានតំណាងរាជធានី-ខេត្ត នឹងមានក្រុម១ ចូលរួមជាដាច់ខាតដូចឆ្នាំកន្លងទៅ ដែលចេញពីថ្នាល នៃសាលាតម្រង់ទិសប្រចាំរាជធានី-ខេត្តនីមួយៗ។ សម្រាប់កម្មវិធីប្រកួតបន្ត នឹងធ្វើឡើងនៅចុងខែធ្នូ ខាងមុខនេះ ដោយមានតាមការកំណត់របស់សហព័ន្ធរួចរាល់លើ៤ពានរង្វាន់ផ្សេងគ្នានេះ។
គួររំលឹកដែរថា កាលពីរដូវកាល២០១៧-២០១៨ កន្លងទៅ សម្រាប់ពានយុវជនអាយុក្រោម១៦ឆ្នាំ (U16) ចំណាត់ថ្នាក់ជើងឯកបានទៅក្រុមសាលាបាល់ទាត់ជាតិបាទី ជើងឯករងបានទៅខេត្តស្វាយរៀង និងលេខ៣ បានទៅក្រុមខេត្តកោះកុង។ ចំពោះពានយុវជនអាយុក្រោម១៤ឆ្នាំ (U14) វិញ ចំណាត់ថ្នាក់ជើងឯកបានទៅក្រុមខេត្តព្រៃវែង ហើយក្រុមជើងឯករងបានទៅខេត្តកោះកុង ខណៈក្រុមចំណាត់ថ្នាក់លេខ៣ បានទៅក្រុមខេត្តកំពង់ស្ពឺ។
ដោយឡែកពានរង្វាន់បាល់ទាត់នារី ជើងឯកបានទៅក្រុមខេត្តបាត់ដំបង ជើងឯករងបានទៅលើខេត្តកំពង់ស្ពឺ និងលេខ៣ បានទៅក្រុមខេត្តកំពង់ឆ្នាំង៕
Source: Kampuchea Thmey Daily
0 Comments