ភ្នំពេញ ៖ លោក វេង សាខុន រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ បានថ្លែងប្រកាសគាំទ្រដល់អង្គការ KOICA (Korea International Cooperation Agency) ដែលគ្រោងបង្កើតផ្សារបោះដំ ផលិតផលកសិកម្ម និងការបង្កើតប្រព័ន្ធព័ត៌មានទីផ្សារ ដែលអាចជួយរកទីផ្សារបន្លែ ផ្លែឈើឲ្យកសិករ។
ការប្រកាសគាំទ្រនេះបានធ្វើឡើង ព្រឹកថ្ងៃពុធ ៣រោច ខែបុស្ស ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២៣ ខែមករា ឆ្នាំ២០១៩ នៅក្នុងជំនួបពិភាក្សាការងារទាក់ទងនឹងការសិក្សានិងវាយតម្លៃបឋមលើគម្រោងស្តីពីការអភិវឌ្ឍវិស័យកសិកម្មឲ្យមាននិរន្តរភាព តាមរយៈការបង្កើតផ្សារបោះដំផលិតផលកសិកម្ម និងការបង្កើតប្រព័ន្ធព័ត៌មានទីផ្សារ ជាមួយ លោក JEONG Yun Gilm នាយកអង្គការ KOICA (Korea International Cooperation Agency) នៅទីស្តីការក្រសួងកសិកម្ម រុក្ខាប្រមាញ់។
នាឱកាសនេះ លោក រដ្ឋមន្ត្រី បានសម្តែងអំណរគុណ និងវាយតម្លៃខ្ពស់ជូនចំពោះរាជរដ្ឋាភិបាលនៃសាធារណរដ្ឋកូរ៉េដែលបានគាំទ្រ និងជួយឧបត្ថម្ភទាំងបច្ចេកទេស និងហិរញ្ញវត្ថុសម្រាប់ការកសាង និងអភិវឌ្ឍកម្ពុជាឲ្យមានការរីកចម្រើនលើគ្រប់វិស័យ និងជាពិសេសវិស័យកសិកម្ម។ សមិទ្ធផលសំខាន់ៗជាច្រើនដែលកម្ពុជាសម្រេចបាននាពេលនេះគឺបានមកពីកិច្ចសហប្រតិបត្តិការយ៉ាងល្អប្រសើររវាងប្រទេសទាំងពីរ ហើយលោក រដ្ឋមន្ត្រីជឿជាក់ថា គម្រោងថ្មីនេះនឹងពង្រឹង និងពង្រីកសាមគ្គីភាព មិត្តភាព និងកិច្ចសហប្រតិបត្តិការរវាងប្រទេសទាំងពីរឲ្យកាន់តែល្អប្រសើរថែមមួយកម្រិតទៀត ជាប្រយោជន៍ដល់ប្រជាជននិងប្រជាកសិករកម្ពុជា។
ទាក់ទងនឹងប្រធានបទខាងលើ លោករដ្ឋមន្ត្រីបានសម្តែងនូវអំណរសាទរ ស្វាគមន៍ និងគាំទ្រចំពោះគម្រោងនេះ ព្រោះវានឹងជួយរកទីផ្សារបន្លែ ផ្លែឈើឲ្យកសិករ ជាកន្លែងផ្តល់ព័ត៌មានទាក់ទងអំពីទីផ្សារ តម្លៃ បរិមាណផ្គត់ផ្គង់ ដែលអ្នកបញ្ជាទិញត្រូវការ និងជាកន្លែងណាត់ជួបរវាងអ្នកបរិភោគ ឈ្មួញកណ្តាល ជាមួយអ្នកផ្គត់ផ្គង់ និងជាពិសេសវានឹងបង្កលក្ខណៈងាយស្រួលដល់មន្ត្រីជំនាញក្នុងការត្រួតពិនិត្យគុណភាព សុវត្ថិភាព អនាម័យ និងប្រភពទំនិញច្បាស់លាស់ ដើម្បីបង្កើយនូវជំនឿទុកចិត្ត និងការធានាត្រឹមត្រូវ។
ក្រសួងបានឲ្យដឹងថា កិច្ចប្រជុំនាព្រឹកនេះបានផ្តោតជាសំខាន់លើប្រធានបទ ទី១. ពិនិត្យ ពិចារណាឲ្យបានល្អិតល្អន់អំពីទីតាំងដែលត្រូវជ្រើសរើសសម្រាប់បង្កើតផ្សារ និងត្រូវបន្តជួបពិភាក្សាជាមួយគ្រប់ភាគីពាក់ព័ន្ធដូចជាមន្ត្រីជំនាញ វិស័យឯកជន សហគ្រាសខ្នាតតូច និងមធ្យម ដៃគូអភិវឌ្ឍ តាមអភិក្រម "រដ្ឋ-ឯកជន-ដៃគូអភិវឌ្ឍ-និងសហគមន៍"។ ទី២. បន្តជំរុញកិច្ចសហការជាមួយអគ្គនាយកដ្ឋានកសិកម្មលើការងារច្បាប់ និងបច្ចេកទេស៕
Source: Kampuchea Thmey Daily
0 Comments