បាតុករបានវាយលុកតាមផ្លូវនៃទីក្រុងរបស់ប្រទេសបារាំងសាជាថ្មីម្តងទៀតនៅថ្ងៃសៅរ៍ដើម្បីកត់សម្គាល់ជារយៈពេលបីខែនៃការតវ៉ា “អាវកាក់ពណ៌លឿង” ខណៈការស្ទង់មតិមួយបានបង្ហាញថា ប្រជាជនភាគច្រើននៃប្រទេសនេះចង់ឲ្យពួកគេបញ្ឈប់។
ចំនួនអ្នកចូលរួមក្នុងការប្រមូលផ្តុំប្រចាំសប្តាហ៍បានធ្លាក់ចុះចាប់តាំងពីមនុស្ស២៨៧,០០០នាក់បានចេញមកតវ៉ាកាលពីថ្ងៃទី១៧ខែវិច្ឆិកាដែលជាថ្ងៃសៅរ៍ទីមួយនៃការតវ៉ា។
ហើយសម្រាប់ជាលើកដំបូង ការស្ទង់មតិមួយបានរកឃើញកាលពីថ្ងៃពុធថា ជាងពាក់កណ្តាលនៃអ្នកដែលត្រូវបានសាកសួរមានអារម្មណ៍ថា វាត្រូវដល់ពេលបញ្ចប់ការតវ៉ានេះហើយ។
កាលពីថ្ងៃទី៩ខែកុម្ភៈដែលជាចុងសប្តាហ៍លើកទី១៣នៃសកម្មភាពប្រឆាំងរដ្ឋាភិបាល, មនុស្សចំនួន៥១,០០០នាក់បានដើរតាមផ្លូវថ្វីបើអ្នករៀបចំការតវ៉ាបានដាក់តួលេខនៅចំនួន១១៨,០០០នាក់ក៏ដោយ។
អំពើហិង្សាបានរំខាងស្ទើរតែរាល់ការប្រមូលផ្តុំទ្រង់ទ្រាយធំ។
នៅទីក្រុងប៉ារីសដែលជាកន្លែងមនុស្សចំនួន៤ពាន់នាក់បានប្រមូលផ្តុំគ្នាកាលពីសប្ដាហ៍មុន, ការប៉ះទង្គិចគ្នាបានផ្ទុះឡើងនៅខាងក្រៅអាគារសភាជាតិដោយមានបាតុករម្នាក់បានបាត់បង់ដៃម្ខាងខណៈពេលដែលគាត់ព្យាយាមវាយគ្រាប់បែកបំភាំងស្មារតី។
ក្រុមសកម្មជនពាក់ម៉ាសបានព្យាយាមបំបែករបាំងដែលការពារសភាប៉ុន្តែត្រូវបានបង្ក្រាបដោយប៉ូលិសបាញ់ឧស្ម័នបង្ហូរទឹកភ្នែកនិងគ្រាប់បែក។
ខណៈដែលការហែក្បួននៅតែបន្តនោះ ជនបំផ្លាញទ្រព្យសម្បត្តិឯកជនឬសាធារណៈបានដុតធុងសំរាមនិងរថយន្តហើយបានកម្ទេចចំណតរថយន្តក្រុង ម៉ាស៊ីនដកប្រាក់និងបង្អួចហាងនៅតាមដងផ្លូវ។
ហាងប្រមាណ៥៥០ហាងត្រូវរងការខូចខាតដោយក្រុមអ្នកតវ៉ានៅក្នុងរដ្ឋធានីចាប់តាំងពីពាក់កណ្តាលខែវិច្ឆិកាមក៕ AFP
Source: Kampuchea Thmey Daily
0 Comments