ប្រជាជន​កូរ៉េខាងជើង​សម្តែង​ការគោរព​ចំពោះ​ឪពុក​របស់លោក​គីម​ក្នុង​អាកាសធាតុ​ដ៏​ត្រជាក់

ទិវា Shining Star ត្រូវបាន​ប្រារព្ធ​ធ្វើឡើង​នៅក្នុង​ភាព​ត្រជាក់​នៅ​ទីក្រុង​ព្យុងយ៉ាង​។ ប៉ុន្តែ​ប្រជាជន​កូរ៉េខាងជើង​រាប់ពាន់នាក់​បាន​តម្រង់​ជួរ​នៅក្នុង​សីតុណ្ហភាព​ដក​៨​អង្សា​សេ​កាលពី​ថ្ងៃ​សៅរ៍​ដើម្បី​គោរព​ដល់​អតីត​មេដឹកនាំ​គីម​ជុងអ៊ីល​នៅ​ថ្ងៃ​ខួបកំណើត​របស់គាត់​។​

លោក​គីម​ដែល​ត្រូវជា​កូនប្រុស​របស់​ស្ថាបនិក​កូរ៉េខាងជើង​លោក​គីម​អ៊ី​ល​ស៊ុ​ង​និង​ជា​ឪពុក​របស់​មេដឹកនាំ​បច្ចុប្បន្ន​គីម​ជុង​អ៊ុន​បានកើត​នៅ​ថ្ងៃទី​១៦​ខែកុម្ភៈ​។​

យោងតាម​ជំនឿ​សាសនា​របស់​ទីក្រុង​ព្យុងយ៉ាង​បាន​ឲ្យ​ដឹងថា លោក​បានកើត​ក្នុង​ឆ្នាំ​១៩៤២​នៅក្នុង​ខ្ទម​ដែល​គ្របដណ្តប់​ដោយ​ព្រិល​នៅ​ជំរំ​សម្ងាត់​មួយ​នៅលើ​ជម្រាលភ្នំ Paektu ដែលជា​ទីកន្លែង​កំណើត​ខាង​សាសនា​របស់​ប្រជាជន​កូរ៉េ​និង​ជា​កន្លែង​ដែល​ឪពុក​របស់គាត់​ប្រយុទ្ធ​ប្រឆាំងនឹង​កងកម្លាំង​ជប៉ុន​។​

នេះ​ជា​ខួប​ដ៏​សំខាន់​មួយ​នៅក្នុង​ប្រទេស​ប្រដាប់អាវុធ​នុយក្លេអ៊ែរ​មួយ​នេះ​ដែល​ប្រជាពលរដ្ឋ​របស់ខ្លួន​ត្រូវបាន​បង្រៀន​ពី​កំណើត​ឲ្យ​គោរព​ដល់ “​ចរន្តឈាម Paektu” ដែល​គ្រួសារ​ត្រកូល​គីម​បាន​គ្រប់គ្រង​វា​អស់បី​ជំនាន់​។​

ដោយ​គេ​ចាត់ទុកថា​ជា​ទិវា Shining Star, ឱកាស​នេះ​ត្រូវបាន​គេ​ប្រារព្ធ​ដោយ​ការសម្តែង​ជិះ​ស្គី ការបង្ហាញ​ផ្កា​និង​គោរព​នៅក្នុង​ប្រព័ន្ធ​ផ្សព្វផ្សាយ​របស់​រដ្ឋ​។​
​អ្នកបើកបរ​ម្នាក់​ឈ្មោះ Kim Chol Jun អាយុ​៤២​ឆ្នាំ​បាន​នាំ​កូនប្រុស​ពីរ​នាក់​របស់គាត់​ទៅ​ភ្នំ Mansu ដែលជា​កន្លែង​នៃ​រូបសំណាក​ធំៗ​របស់លោក​គីម​អ៊ី​ល​ស៊ុ​ល​និង​គីម​ជុងអ៊ីល​ដើម្បី​គោរព​ដល់​ពួកគេ​និង​មេដឹកនាំ​បច្ចុប្បន្ន​។​

លោក​បាន​ប្រាប់ AFP ថា “​គ្មាន​កូនប្រុស​និង​កូនស្រី​ណា​ម្នា​ក់មាន​អារម្មណ៍​ធុញទ្រាន់​ទេ​នៅពេល​ពួកគេ​ទៅលេង​ឪពុកម្តាយ​របស់​ពួកគេ​។ មេដឹកនាំ​ដ៏​អស្ចារ្យ​ត្រូវបាន​គេ​ចាត់ទុកថា​ជា​ឪពុកម្តាយ​របស់​យើង​ដូច្នេះ​ខ្ញុំ​មក​ទីនេះ​ដើម្បី​ឱនក្បាល​មុខ​ឪពុកម្តាយ​របស់​យើង​ជាមួយ​កូនប្រុស​របស់ខ្ញុំ​”​។​

ប្រជាជន​កូរ៉េខាងជើង​សាមញ្ញ​តែងតែ​បង្ហាញ​ពី​ការគាំទ្រ​យ៉ាង​ពេញទំហឹង​ចំពោះ​ថ្នាក់ដឹកនាំ​និង​គោលនយោបាយ​របស់ខ្លួន​នៅពេល​និយាយ​ជាមួយ​ប្រព័ន្ធ​ផ្សព្វផ្សាយ​បរទេស​៕ AFP

​

Source: Kampuchea Thmey Daily