ជនសង្ស័យ​២​នាក់ ត្រូវ​ប៉ូលិស​ចាប់​វាយ​ខ្នោះ ពាក់ព័ន្ធ​ករណី​លួច​ខ្សែ.ក មាស ​និង​ទូរស័ព្ទ​ដៃ បញ្ជូន​ទៅ​តុលាការ​

រតនគិរី ៖ ជនសង្ស័យ​២​នាក់ ត្រូវ​សមត្ថកិច្ច​នគរបាល​ឃាត់ខ្លួន​ពាក់ព័ន្ធ​ករណី​លួច​ខ្សែ.ក មាស និង​ទូរស័ព្ទ​ដៃ គ្មាន​ស្ថាន​ទម្ងន់​ទោស។ ករណី​លួច​ទូរស័ព្ទ​ និង​មាស ​បាន​ធ្វើឡើង​កាលពី​វេលា​ម៉ោង​៩​និង​៣០​នាទី​យប់​ថ្ងៃ​ពុធ ៧​រោច ខែ​ផល្គុន ឆ្នាំច សំរឹទ្ធិស័ក ព​.​ស​២៥៦២ ត្រូវ​នឹង​ថ្ងៃ​ទី​២៧ ខែ​មីនា ឆ្នាំ​២០១៩ នៅ​ចំណុច​ផ្ទះ​លោក ស៊ិន សុខន (​អូរ​ចេង​) ស្ថិត​ក្នុង​ភូមិ​តា​អង​១ ឃុំ​តា​អង ស្រុក​កូន​មុំ​។​

សមត្ថកិច្ច​បាន​ឲ្យ​ដឹង​ថា ក្រោយពី​ធ្វើ​សកម្មភាព​រួច​ ជនសង្ស័យ​បាន​រត់គេច​មក​លាក់ខ្លួន​នៅផ្ទះ​សំណាក់​(​យីហោ​សុខ​)​ ក្នុង​ក្រុង​បាន​លុង ខេត្ត​រតនគិរី​។​

បន្ទាប់មក កម្លាំង​អធិការ​នគរបាល​ក្រុង​បាន​លុង សហការ​ជាមួយ​កម្លាំង​នគរបាល​ព្រហ្មទណ្ឌ​កម្រិត​ស្រាល​ នៃ​ស្នងការ​នគរបាល​ខេត្ត ចុះ​ស្រាវជ្រាវ​តាម​ប្រព័ន្ធ​ទូរស័ព្ទ​ដៃ​របស់​ជន​រង​គ្រោះ ពេលនោះ​សមត្ថកិច្ច​បាន​តេ​ចូល​លោត​សញ្ញា​នៅ​ទីតាំង​ខាងលើ។ ដោយមាន​ការ​សម្របសម្រួល​ពី​ លោក រ៉ា បូរ៉ាន់​ឌី ព្រះរាជអាជ្ញា​រង​អម​សាលាដំបូង​ខេត្ត​ចុះ​ឃាត់ខ្លួន​បាន​ជនសង្ស័យ​២​នាក់​តែម្ដង​។​

សមត្ថកិច្ច​បាន​បន្តថា ជនរងគ្រោះ ​ឈ្មោះ ស៊ិន សុខន ភេទ​ប្រុស អាយុ​៦២​ឆ្នាំ ជនជាតិខ្មែរ មាន​ទី​លំនៅ ភូមិ​ទេស​អន្លង សង្កាត់​បឹង​កន្សែង ក្រុង​បាន​លុង ខេត្ត​រតនគិរី​។​

សមត្ថកិច្ច​បាន​បន្ត​ទៀត​ថា ជនសង្ស័យ​២​នាក់ ១- ឈ្មោះ ឃុ​ត វិឆៃ ភេទ​ប្រុស អាយុ​១៧​ឆ្នាំ ជនជាតិ​ខ្មែរ មុខរបរ​មិន​ពិតប្រាកដ មាន​ទីលំនៅ​ភូមិ​ជ័យជំនះ សង្កាត់​ឡា​បាន​សៀក ក្រុង​បាន​លុង ខេត្ត​រតនគិរី​។ ២-ឈ្មោះ ហៀ​ង រត​នះ ភេទ​ប្រុស អាយុ​១៨​ឆ្នាំ ជនជាតិ​ខ្មែរ មុខរបរ​មិន​ពិតប្រាកដ មាន​ទី​លំនៅ​ជាមួយគ្នា​។​

ក្នុងនោះដែរ សមត្ថកិច្ច​បាន​ដកហូត​សម្ភារៈ​បាត់បង់​រួមមាន ៖​
១-ខ្សែ.ក មាស​ទម្ងន់​ជាង ៣​តម្លឹង​
២-បន្តោង​ព្រះអង្គ​ចំនួន​២
៣-​ទូរស័ព្ទ​ដៃ​ចំនួន​២​គ្រឿង ​ម៉ាក​(iphone x និង ​nokai)​។​

បច្ចុប្បន្ន ​ជនសង្ស័យ​ ត្រូវបាន​ឃាត់ខ្លួន​នៅ​ការិយាល័យ​ព្រហ្មទណ្ឌ​កម្រិត​ស្រាល​ នៃ​ស្នងការ​នគរបាល​ខេត្ត​ ដើម្បី​កសាង​សំណុំរឿង​បញ្ជូន​ទៅ​អយ្យការ​អម​សាលាដំបូង​ខេត្ត​ចាត់ការ​តាម​នីតិ​វិធី​ច្បាប់​៕



Source: Kampuchea Thmey Daily