ភ្នំពេញ ៖ កម្ពុជានិងចិននឹងរួមគ្នាធ្វើសមយុទ្ធហនុមានកងទ័ពជើងគោកឆ្នាំ២០១៩ជាលើកដំបូងនៅដើមខែឧសភាខាងមុខនេះនៅទីលានបាញ់គ្រាប់ពិត ហ៊ុន សែន ជុំគិរីស្ថិតនៅស្រុកជុំគិរី ខេត្តកំពត។
លោក ម៉ៅ ផល្លា អ្នកនាំពាក្យកងទ័ពជើងគោកបានថ្លែងប្រាប់សារព័ត៌មានក្នុងស្រុកកាលពីពេលថ្មីៗនេះថា សមយុទ្ធហនុមានឆ្នាំ២០១៩នេះនឹងចាប់ផ្តើមពីថ្ងៃទី៣រហូតដល់ថ្ងៃទី៦ខែឧសភាខាងមុខនេះដើម្បីបង្កើនសហប្រតិបត្តិការនិងផ្តល់បទពិសោធន៍លើវិស័យយោធាជើងគោកនៃប្រទេសទាំងពីរឲ្យកាន់តែប្រសើរឡើងថែមទៀត។
លោក ម៉ៅ ផល្លាបានបន្តថា សមយុទ្ធហនុមាននេះ គឺធ្វើដូចគ្នាទៅនឹងសមយុទ្ធនាគមាសឆ្នាំ២០ ១៩ដែលបានបិទបញ្ចប់កាលពីថ្ងៃទី២៥ខែមីនាឆ្នាំ២០១៩កន្លងទៅ ប៉ុន្តែមានលក្ខណៈទ្រង់ទ្រាយតូចជាងដោយសារមានការចូលរួមត្រឹមកំរិតកងទ័ពជើងគោកប៉ុណ្ណោះខណៈសមយុទ្ធនាគមាសធ្វើឡើងដោយអគ្គមេបញ្ជាការនៃប្រទេសទាំងពីរដោយមានប្រើរថពាសដែក រថក្រោះ កាំភ្លើងធំ កាំភ្លើង ត្បាល់ ឧទ្ធម្ភាគចក្រ អាវុធគាំទ្រពីលើអាកាសជាដើម។
តែយ៉ាងណាក៏ដោយ លោក អ្នកនាំពាក្យកងទ័ពជើងគោកបានឲ្យដឹងទៀតថា ចំពោះសកម្មភាពលំអិតនៅក្នុងសមយុទ្ធហនុមាននេះក្រសួងការពារជាតិនឹងចេញសេចក្តីលំអិតនៅពេលឆាប់ៗខាងមុខនេះដើម្បីផ្សព្វផ្សាយជាសាធារណៈដល់សាធារណជនបានដឹងកុំឲ្យមានការភ្ញាក់ផ្អើលពិសេសប្រជាពលរដ្ឋរស់នៅម្តុំទីលានបាញ់គ្រាប់ពិត ហ៊ុន សែន ជុំគិរី ដែលស្ថិតនៅស្រុកជុំគិរី ខេត្តកំពត។
សម្តេចពិជ័យសេនាទៀ បាញ់ ឧបនាយករដ្ឋមន្ត្រី និង រដ្ឋមន្ត្រីក្រសួងការពារជាតិធ្លាប់បានថ្លែងនៅពេលបិទសមយុទ្ធនាគមាសឆ្នាំ២០១៩នៅស្រុកជុំគីរី ខេត្តកំពតកាលពីថ្ងៃទី២៥ មីនា ឆ្នាំ២០១៩ថា ការធ្វើសមយុទ្ធពីមួយឆ្នាំទៅមួយឆ្នាំនឹងជួយឲ្យកងទ័ពនៃប្រទេសទាំងពីរកម្ពុជា ចិនទទួលបានការផ្លាស់ប្តូរចំណេះដឹង បទពិសោធន៍និងរៀនសូត្រពីគ្នាទៅវិញទៅមកព្រោះថាការហ្វឹកហ្វឺនបានដើរតួសំខាន់ណាស់សម្រាប់ពង្រឹងសមត្ថភាព ដល់កងយោធពលខេមរភូមិន្ទឲ្យមានវិជ្ជាជីវៈចំណេះដឹងនិងចំណេះធ្វើពិតប្រាកដដែលជាយុទ្ធសាស្ត្រយូរអង្វែង សំដៅលើកកម្ពស់ធនធានមនុស្សនិងថ្នាលកសាងមនុស្សបន្តវេនជំនាន់ក្រោយ៕
Source: Kampuchea Thmey Daily
0 Comments