យោងតាមរបាយការណ៍មួយនៅថ្ងៃសៅរ៍បានឲ្យដឹងថា ប្រទេសអាល្លឺម៉ង់បានបញ្ឈប់ដំណើរការការដាក់ពាក្យសុំសិទ្ធិជ្រកកោនមួយចំនួនដោយជនភៀសខ្លួនស៊ីរី ខណៈខ្លួនកំពុងរង់ចាំការវាយតម្លៃថ្មីស្តីអំពីស្ថានភាពសន្តិសុខនៅក្នុងប្រទេសដែលហែកហួរដោយសង្គ្រាមមួយនេះ។
ប្រព័ន្ធផ្សព្វផ្សាយអាល្លឺម៉ង់ Funke ដែលដកស្រង់ប្រភពក្រសួងមហាផ្ទៃបានរាយការណ៍ថា ការសម្រេចចិត្តលើការដាក់ពាក្យសុំសិទ្ធិជ្រកកោនមួយចំនួនពីជនជាតិស៊ីរីត្រូវបានពន្យារពេលខណៈការផ្លាស់ប្តូរត្រូវបានគេរំពឹងថានឹងអនុវត្តទៅតាមសេចក្តីណែនាំរបស់ក្រសួង។
ស្របពេលជាមួយគ្នានោះដែរ គណៈប្រតិភូមកពីប្រទេសអ៊ីរ៉ង់ រុស្ស៊ីនិងទួរគីបានជួបប្រជុំគ្នានៅប្រទេសកាហ្សាក់ស្ថានកាលពីថ្ងៃព្រហស្បតិ៍ដើម្បីស្វែងរកការបញ្ចប់ជម្លោះស៊ីរី។
Funke បានរាយការណ៍ថា ជាលទ្ធផលនៃការផ្អាកកម្មវិធីសុំសិទ្ធិជ្រកកោនរបស់អាល្លឺម៉ង់, បណ្តាអង្គការជនភៀសខ្លួនមានការភ័យខ្លាចថា រដ្ឋាភិបាលរបស់លោកស្រី Angela Merkel នឹងបដិសេធការដាក់ពាក្យសុំជាច្រើនទៀតពីប្រទេសស៊ីរីប្រសិនបើមិនមានជម្លោះប្រដាប់អាវុធនៅទីនោះបន្តទៀតទេនោះ។
យោងតាមរបាយការណ៍របស់ Funke បានបង្ហាញថា អ្នកដែលរងផលប៉ះពាល់គឺជាអ្នកស្វែងរកសិទ្ធិជ្រកកោនដែលទទួលបាន “ការការពារបន្ទាប់បន្សំ”។ ពួកគេគឺជាអ្នកដែលប្រឈមនឹងគ្រោះថ្នាក់ធ្ងន់ធ្ងរ សកម្មភាពសង្គ្រាម ទោសប្រហារជីវិតឬទារុណកម្មនៅក្នុងប្រទេសកំណើតរបស់ពួកគេ។
យោងតាមតួលេខរបស់រដ្ឋាភិបាលបានបង្ហាញថា ជនជាតិស៊ីរីចំនួន១៧,៤១១នាក់ត្រូវបានផ្តល់ឋានៈ “ការការពារបន្ទាប់បន្សំ” នៅក្នុងឆ្នាំ២០១៨។
ប្រទេសអាល្លឺម៉ង់បានទទួលការរិះគន់យ៉ាងខ្លាំងដោយការសម្រេចចិត្តឆ្នាំ២០១៥របស់លោកស្រីអធិការបតី Angela Merkel ក្នុងការបើកចំហព្រំដែនរបស់ប្រទេសនេះចំពោះពួកអ្នកដែលរត់ភៀសខ្លួនចេញពីជម្លោះនិងការធ្វើទុក្ខបុកម្នេញចំពេលវិបត្តិចំណាកស្រុករបស់អឺរ៉ុបបានឈានដល់កម្រិតកំពូល៕ AFP
Source: Kampuchea Thmey Daily
0 Comments