ភ្នំពេញ ៖ បន្ទាប់ពីទទួលរងនូវការនិយាយរិះគន់ពីមិត្តភក្ដិអំពីរឿងថា នាងមានដើមទ្រូងតូចមិនស្អាតនោះបានធ្វើឲ្យតារាសំដែង និងដើរម៉ូដកញ្ញា អេន យ៉ាដាវ ក្តៅស្លឹកត្រចៀកតូងតែម្តង រួចក៏បានធ្វើការឆ្លើយតបទាំងកំហឹងទៅវិញថា «ទោះតូចឬធំវាជាដើមទ្រូងពីធម្មជាតិរបស់នាង! មិនចាំបាច់មកឈឺឆ្អាលនោះទេ!»។
តារាសំដែងល្បីឈ្មោះបោះសំឡេងតាមរយៈរឿង «ថាខូចខូចមែន» រូបនេះនិយាយទៀតថា នាងមិនខ្វល់នឹងការនិយាយរិះគន់ពីមិត្តភក្ដិរួមអាជីពមួយចំនួននោះទេ ហើយនាងក៏មិនទៅកែកុនពង្រីកសុដន់ឲ្យធំនោះដែរ ពោលគឺអ្វីៗនៃទំរង់ខ្លួនរបស់នាង នាងចង់ឲ្យវាប្រែប្រួលទៅតាមបែបធម្មជាតិវិញប្រសើរជាង។ ម្យ៉ាងនាងខ្លាចមានការឈឺចាប់នៅពេលវះកាត់និងប៉ះពាល់ដល់សុខភាពរាងកាយនៅថ្ងៃក្រោយ ហើយក្រុមគ្រួសាររបស់នាងក៏មិនគាំទ្រដែរចំពោះការកែសម្រស់ដើមទ្រូងនេះដោយម៉ាក់របស់នាងហាមឃាត់ដាច់អហង្ការតែម្តង។
ទាក់ទងទៅនឹងទំហំដើមទ្រូងតូចឬធំនេះ តារាសិល្បៈកញ្ញា អេន យ៉ាដាវ និយាយដោយផ្ទុះមកជាមួយនូវសំណើចថា វាមិនបានប៉ះពាល់ដល់អាជីពសិល្បៈរបស់នាងនោះឡើយ ហើយការល្បីឬមិនល្បីនោះក៏មិនអាស្រ័យទៅលើអ្នកនោះមានដើមទ្រូងធំនោះដែរ ពោលគឺវាស្ថិតនៅលើទេពកោសល្យសិល្បៈជាចំបង។ យ៉ាដាវ និយាយទៀតថា «ដាច់ខាតនាងមិនរត់ទៅរកការកែច្នៃចំណុចណាមួយនៃខ្លួនប្រាណតាមបែបវិទ្យាសាស្ត្រនោះឡើយ ជាពិសេសត្រង់បរិវេណដើមទ្រូងនេះ ពីព្រោះស្រួលមិនស្រួលអាចក្លាយជាមហារីកសុដន់ក៏ថាបាន»។
តារាសំដែង និងដើរម៉ូដដ៏ស្រស់សោភារូបនេះនិយាយបញ្ជាក់ថា ចាប់តាំងពីចូលប្រឡូកសិល្បៈរហូតមកដល់ពេលនេះរូបរាងរបស់នាងទាំងមូលនៅមិនទាន់មានការកែកុនតាមក្បួនវិទ្យាសាស្ត្រទំនើបត្រង់កន្លែងណាមួយនៅឡើយ ដូចជា ច្រមុះ ចង្កា ថ្ពាល់ និងសុដន់ជាដើម។ ទោះយ៉ាងណានាងនៅតែប្រកាន់យកវិធីថែទាំតាមបែបធម្មជាតិវិញ ទើបសម្រស់យើងស្ថិតស្ថេរបានយូរ ហើយចង់នរណានិយាយស្អីក៏និយាយទៅ តែសូមកុំនិយាយឲ្យនាងឮជាលើកទី២ឲ្យសោះ។
យ៉ាដាវ បាននិយាយតបតទៅនឹងប្រភពដែលរិះគន់នាងដោយមិនបានបង្ហាញឈ្មោះទៀតថា «សម្រាប់អ្នកឯងក៏មិនមានអ្វីអស្ចារ្យជាងនាងប៉ុន្មាននោះដែរ! មិនចាំបាច់មកណែនាំគេនោះទេ ខ្ញុំមានដើមទ្រូងតូចជារឿងរបស់ខ្ញុំហើយ អ្នកឯងមានដើមទ្រូងធំក៏មានទៅ»៕
ឥន្ទ្រីយ៍ទេព
0 Comments