កំពង់ឆ្នាំង ៖ ក្រោយពីអាជ្ញាធរស្រុកជលគីរីបានផ្សព្វផ្សាយសេចក្តីណែនាំលេខ០៩ ស.ជ.ណ ចុះថ្ងៃទី១៤ ខែមករា ឆ្នាំ២០១៥ របស់លោក ឈួរ ច័ន្ទឌឿន អភិបាលខេត្ត ស្ដីពីការចាត់វិធានការណ៍លុបបំបាត់ឧបករណ៍ឆក់ត្រីរួចមក អាំងវែកទ័រឆក់ត្រីចំនួន១២៣គ្រឿង ត្រូវបានប្រជាពលរដ្ឋស្ម័គ្រចិត្តប្រគល់ជូនអាជ្ញាធរស្រុកជលគីរី តែឧបករណ៍ឆក់ត្រីរបស់ប្រជាពលរដ្ឋមួយចំនួនធំទៀតនៅលាក់លៀមមិនទាន់បានប្រគល់ជូននៅឡើយ។
លោក យិន សាវ៉េន អភិបាលនៃគណៈអភិបាលស្រុកជលគីរីបាននិយាយឲ្យដឹងតាមទូរស័ព្ទនៅម៉ោង១១និង១០នាទី ថ្ងៃទី០៥ ខែកុម្ភៈ ឆ្នាំ២០១៥នេះថា ក្នុងការចាត់វិធានការលុបបំបាត់ឧបករណ៍ឆក់ត្រីតាមសេចក្តីណែនាំលេខ០៩របស់ឯកឧត្តមអភិបាលខេត្ត អាជ្ញាធរស្រុកបានចាត់វិធានការ គឺការចុះផ្សព្វផ្សាយក្នុងវេទិកាគោលនយោបាយភូមិ/ឃុំមានសុវត្ថិភាព ដែលបានធ្វើរួចចំនួន២០លើក លើ២៦ភូមិ មានអ្នកចូលរួមចំនួន៩០២នាក់ និងបានចុះចែកសេចក្តីណែនាំជូនប្រជាពលរដ្ឋតាមផ្ទះ និងមុខសញ្ញាឆក់ត្រីចំនួន៣.១២៥សន្លឹក។ ក្នុងនោះដែរ លោកបានឲ្យនគរបាលប៉ុស្តិ៍រដ្ឋបាលសហការជាមួយសមត្ថកិច្ចជំនាញជលផលចុះស្រង់មុខសញ្ញាដែលមានឧបករណ៍ឆក់ត្រី មាន២៨៧នាក់ ក្នុងនោះមានឃុំព្រៃគ្រី មាន២៤មុខសញ្ញា ឃុំកោះថ្កូវ មាន៧៦មុខសញ្ញា ឃុំពាមឆ្កោក១២០មុខសញ្ញា ឃុំកំពង់អុស ២៣មុខសញ្ញា ឃុំជលសា និងមាន៤៤មុខសញ្ញា។
ក្រោយពីអាជ្ញាធរស្រុកបានអនុវត្តចលនាប្រជាពលរដ្ឋតាមខ្លឹមសារលិខិតនែនាំដែលបានចែកជូនរួចមក អាំងវែកទ័រឆក់ត្រីចំនួន១២៣គ្រឿង ត្រូវបានប្រជាពលរដ្ឋក្នុង៤ឃុំ ស្ម័គ្រចិត្តយកមកប្រគល់ជូនអាជ្ញាធរ និងសមត្ថកិច្ចរបស់ស្រុកជលគីរី។
លោកអភិបាលស្រុកបានបញ្ជាក់ឲ្យដឹងទៀតថា នៅរសៀលថ្ងៃទី០៤ ខែកុម្ភៈ ឆ្នាំ២០១៤ គណៈបញ្ជាការឯកភាពរដ្ឋបាលស្រុកជលគីរី បានបើកកិច្ចប្រជុំមួយដើម្បីបូកសរុប និងលើកវិធានការសម្រាប់អនុវត្តបន្ត ទី១-គឺគណៈបញ្ជាការឯកភាពរដ្ឋបាលស្រុក ត្រូវប្រើប្រាស់កម្លាំងសរុប វិធានការសរុប មធ្យោបាយសរុប ដោយសហការជាមួយកម្លាំងទាំងអស់ដែលនៅក្នុងស្រុកបន្តអនុវត្តឲ្យបានខ្លាំងក្លា និងផុលផុសតាមសេចក្តីណែនាំលេខ០៩របស់លោកអភិបាលខេត្ត។ ទី២-គឺត្រូវចុះជួបមុខសញ្ញាផ្ទាល់ដល់ផ្ទះតែម្តង និងធ្វើកិច្ចសន្យាឲ្យបញ្ឈប់ការប្រព្រឹត្តបទល្មើសនេសាទ។ ទី៣-គឺត្រូវប្រើវិធានការឃ្លាំមើលទាំងមុខសញ្ញាដែលបានប្រគល់ឲ្យ ហើយនឹងមុខសញ្ញាដែលកំពុងលាក់ទុកឧបករណ៍ឆក់។
វិធានការណ៍ទាំង៣ចំណុចខាងលើនេះ អាជ្ញាធរស្រុកនឹងបន្តអនុវត្តចាប់ពីថ្ងៃទី០៥ រហូតដល់ថ្ងៃទី១០ ខែកុម្ភៈ ឆ្នាំ២០១៥ នឹងធ្វើការបូកសរុបម្តងទៀត ដើម្បីដឹងថាតើការស្ម័គ្រចិត្តរបស់ប្រជាពលរដ្ឋក្នុងការប្រគល់នូវឧបករណ៍ល្មើសនេះបានប៉ុន្មានភាគរយ ហើយអ្នកដែលកំពុងប្រព្រឹត្តនូវបទល្មើសឆក់នេះនឹងត្រូវទទួលទោសតាមបញ្ញត្តិច្បាប់ជាប់គុកពី១ឆ្នាំដល់៣ឆ្នាំ ព្រោះថាបទល្មើសឆក់ត្រីនេះធ្វើឲ្យប៉ះពាល់យ៉ាងធ្ងន់ធ្ងរដល់ពូជមច្ឆាជាតិ ព្រមទាំងអាចគ្រោះថ្នាក់ដល់ជីវិតមនុស្សក្នុងមូលដ្ឋានទៀតផង៕
( ឈៀង ថារិទ្ធ )
0 Comments