កំពង់ឆ្នាំង ៖ ការភ្ញាក់ផ្អើលមួយបានកើតឡើងដោយសារបុរសម្នាក់បានចង.ក សម្លាប់ខ្លួនចោលកូនតូចៗ២នាក់ ព្រោះតែតូចចិត្តនឹងប្រពន្ធរត់ចោលទៅមានប្រុសថ្មីជាង១ឆ្នាំទៅហើយ មិនព្រមវិលមកវិញសោះ។ ហេតុការណ៍ភ្ញាក់ផ្អើលនេះបានកើតឡើងនៅវេលាម៉ោង៧និង៣០នាទីព្រឹក ថ្ងៃទី០៥ ខែកុម្ភៈ ឆ្នាំ២០១៥ នៅក្នុងភូមិដូនទយ ឃុំសែប ស្រុកកំពង់ត្រឡាច។
លោក ហ៊ុល វាសនា អធិការនគរបាលស្រុកកំពង់ត្រឡាចបានឲ្យដឹងថា បុរសធ្វើអត្តឃាតនេះមានឈ្មោះ ហាត ស៊ីថា អាយុ៣៧ឆ្នាំ មានស្រុកកំណើតនៅខេត្តកំពង់ធំ តែបានមករស់នៅជាមួយប្រពន្ធនៅភូមិ/ឃុំកើតហេតុខាងលើ។ ប្រពន្ធមានឈ្មោះ មាច មុំ អាយុ៣៤ឆ្នាំ គ្រួសារក្រីក្រនេះមានកូន២នាក់ កូនប្រុសបង អាយុ១១ឆ្នាំ និងកូនស្រីប្អូន អាយុ៨ឆ្នាំ។
បុរសខាងលើនេះជាអ្នកផឹកស្រឹងរាល់ថ្ងៃ និងតែងរករឿងប្រពន្ធកូនកាលពីជាង១ឆ្នាំមុន ដោយទ្រាំមិនបានប្រពន្ធរបស់បុរសរូបនោះបានរត់ចោលទៅមានប្ដីថ្មីនៅខេត្តប៉ៃលិន ដោយបន្សល់ទុកកូន២នាក់ឲ្យប្ដីជាអ្នកមើលថែ ហើយយូរៗម្តងបានមកលេងផ្ទះយកប្រាក់មកឲ្យកូន។ នៅពេលប្ដីមកផ្ទះម្តងៗ ប្ដីតែអង្វរប្រពន្ធឲ្យត្រឡប់មកវិញ តែប្រពន្ធមិនព្រមឡើយ ។
ពេលគ្មានប្រពន្ធនៅជាមួយបុរសរូបនោះមិនចោលទម្លាប់ផឹកស្រាឡើយ និងពេលស្រវឹងម្តងៗគេតែងវាយធ្វើបាបកូន ធ្វើឲ្យកូនៗមិនហ៊ានដេកជាមួយ លួចទៅដេកជាមួយអ្នកស្រុកអ្នកជិតខាង។ នៅថ្ងៃកើតហេតុគេមិនបានដឹងថា បុរសរូបនោះបានចង.កសម្លាប់ខ្លួនកាលពីពេលណានោះទេ ស្រាប់តែព្រឹកថ្ងៃទី០៥ ខែកុម្ភៈ អ្នកជិតខាងបានឲ្យកូនៗទៅហៅឪពុកប្រាប់ថាទៅរកត្រី ពេលនោះកូនៗបានទៅហៅឪពុកដេកនៅលើផ្ទះ ស្រាប់តែឃើញឪពុកខ្លួនចង.កស្លាប់បានទៅហើយ ទើបស្រែកឆោឡោ។ បុរសរូបនោះបានចង.កស្លាប់នៅផ្ទះឪពុកក្មេក ដែលខ្លួនមកដេករាល់ថ្ងៃ តែជាផ្ទះឪពុកក្មេកគាត់ទៅធ្វើការនៅប្រទេសថៃ គ្មានមនុស្សរស់នៅ ចំណែកផ្ទះខ្លួនឯងដំបូលជញ្ជាំងធ្លុះធ្លាយមិនអាចរស់នៅបានទេ។
នៅព្រឹកថ្ងៃទី០៥ ខែកុម្ភៈ ឆ្នាំ២០១៥នេះ សមត្ថកិច្ចមូលដ្ឋានបានចុះទៅពិនិត្យសពបុរសធ្វើអត្តឃាតដល់កន្លែងកើតហេតុ និងក្រោយពីបានពិនិត្យដឹងថាពិតជាករណីធ្វើអត្តឃាតមែន បន្ទាប់មកសពបុរសរូបនោះសមត្ថកិច្ចបានប្រគល់ជូនអ្នកជិតខាងក្នុងភូមិជួយរៀបចំធ្វើបុណ្យទានតាមប្រពៃណី។ ជាមួយគ្នានេះដែរ អាជ្ញាធរមូលដ្ឋាន សូមអំពាវនាវដល់សាច់ញាតិបុរសរូបនោះដែលនៅខេត្តកំពង់ធំ និងប្រពន្ធដែលកំពុងរស់នៅខេត្តប៉ៃលិន សូមប្រញាប់វិលមករៀបបុណ្យសពបុរសខាងលើនេះផង ព្រោះគ្មានសាច់ញាតិជិតស្និតទេ ហើយពេលនេះកូនៗទាំង២នាក់កំពុងតែរស់តែលតោលយ៉ាងកំសត់ទៀតផង៕ . ( ឈៀង ថារិទ្ធ )
0 Comments