ភ្នំពេញ ៖ ជនសង្ស័យ៤នាក់ពាក់ព័ន្ធករណីជួញដូរ និងប្រើប្រាស់គ្រឿងញៀន ត្រូវបានកម្លាំងនគរបាលព្រហ្មទណ្ឌដង្កោដឹកបញ្ជូនទៅកាន់សាលាដំបូងរាជធានីភ្នំពេញកាលពីថ្ងៃទី៥ ខែកុម្ភៈ ឆ្នាំ២០១៥ ដើម្បីផ្ដន្ទាទោសតាមច្បាប់។
ជនសង្ស័យពាក់ព័ន្ធករណីជួញដូរ និងប្រើប្រាស់គ្រឿងញៀនទាំង៤នាក់ ដែលត្រូវឃាត់ខ្លួន ទី១-ឈ្មោះ យ៉ុន សុភ័ណ ភេទប្រុស អាយុ២៩ឆ្នាំ មុខរបរមិនពិតប្រាកដ មានទីលំនៅភូមិ ព្រែកកំពិស សង្កាត់ព្រែកកំពិស ខណ្ឌដង្កោ ទី២-ឈ្មោះ សីហា ពុទ្ធារ៉ា ភេទប្រុស អាយុ២៣ឆ្នាំ មុខរបរសន្តិ សុខមណ្ឌលសុខភាពជើងឯក រស់នៅភូមិរលួស សង្កាត់ជើងឯក ខណ្ឌដង្កោ ទី៣-ឈ្មោះ អ៊ុង សិលា ភេទប្រុស អាយុ២១ឆ្នាំ មុខរបរជាងដាក់វាំងនន រស់នៅភូមិព្រែកប្រណាក សង្កាត់ជើងឯក ខណ្ឌដង្កោ និងទី៤-ឈ្មោះ ហឹម ណារ័ត្ន ភេទប្រុស អាយុ២៧ឆ្នាំ មុខរបរជាងសំណង់ ស្នាក់នៅភូមិទំនប់កប់ស្រូវ សង្កាត់គោករកា ខណ្ឌសែនសុខ។
មន្ត្រីនគរបាលព្រហ្មទណ្ឌខណ្ឌដង្កោប្រាប់ឲ្យដឹងថា ជនសង្ស័យទាំង៤នាក់ត្រូវបានឃាត់ខ្លួនជាក់ស្តែងនៅក្នុងផ្ទះមួយកន្លែង ស្ថិតនៅភូមិព្រែកកំពិស សង្កាត់ព្រែកកំពិស ខណ្ឌដង្កោ រាជធានីភ្នំពេញ កាលពីវេលាម៉ោង១៤រសៀល ថ្ងៃទី៣ ខែកុម្ភៈ ឆ្នាំ២០១៥ ដោយមានការបញ្ជាពីលោក យឹម សុជាតិ អធិការខណ្ឌដង្កោ ទើបកម្លាំងនគរបាលព្រហ្មទណ្ឌសហការជាមួយកម្លាំងនគរបាលប៉ុស្តិ៍រដ្ឋបាលព្រែកកំពិសចុះបង្ក្រាប ក្នុងនោះដកហូតបានថ្នាំញៀន០៧កញ្ចប់ ប្រដាប់ប្រើប្រាស់មួយចំនួន ដាវ កាំបិត ពូថៅ កន្ត្រៃ ជុំពុះទង់ និងវត្ថុតាងមួយចំនួនទៀត ព្រមទាំងម៉ូតូ០២គ្រឿង ក្នុងនោះម៉ូតូ ម៉ាកវ៉េវ០១គ្រឿង និងម៉ូតូម៉ាកស្តេប០១គ្រឿង។
មន្ត្រីនគរបាលព្រហ្មទណ្ឌខណ្ឌដង្កោប្រាប់បន្តថា ជនសង្ស័យទាំង៤នាក់ ក្នុងនោះម្នាក់ឈ្មោះ យ៉ុន សុភ័ណ គឺជាអ្នកជួញដូរ និងផ្តល់ទីតាំងឲ្យប្រើប្រាស់គ្រឿងញៀន ចំណែក៣នាក់ទៀត គឺជាអ្នកប្រើប្រាស់។ ការឃាត់ខ្លួនជនសង្ស័យពាក់ព័ន្ធករណីជួញដូរ និងប្រើប្រាស់គ្រឿងញៀនទាំង៤នាក់ គឺបន្ទាប់ពីទទួលបានព័ត៌មានសំងាត់ពីប្រជាពលរដ្ឋល្អ ទើបកម្លាំងព្រហ្មទណ្ឌខណ្ឌសហការជាមួយនគរបាលប៉ុស្តិ៍រដ្ឋបាលព្រែកកំពិសចុះបង្ក្រាប រួចនាំយកមកកាន់អធិការដ្ឋាននគរបាលខណ្ឌដង្កោដើម្បីចាត់ការតាមនីតិវិធីតែម្តង៕
រ៉ាវុទ្ធ
0 Comments