ភ្នំពេញ ៖ សៀវភៅដែលមានចំណងជើងថា "លោកស៊ីជីនពីង ៖ អភិបាលកិច្ចនៃប្រទេសចិន" ត្រូវបានធ្វើការផ្សព្វផ្សាយនៅកម្ពុជាក្រោមការរៀបចំឡើងដោយរាជបណ្ឌិត្យសភាកម្ពុជា និងស្ថានទូតនៃសាធារណរដ្ឋប្រជាមានិតចិនប្រចាំកម្ពុជាកាលពីថ្ងៃទី២ ខែកុម្ភៈ ឆ្នាំ២០១៥ ដោយមានការអញ្ជើញចូលរួមពីសំណាក់ឯកឧត្តមបណ្ឌិតសភាចារ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី និងមន្ត្រីអង្គទូត រួមទាំងមន្ត្រីស្ថាប័នពាក់ព័ន្ធជាច្រើនរូបទៀត។
ឯកឧត្តមបណ្ឌិតសភាចារ សុខ អាន បានមានប្រសាសន៍ឲ្យដឹងថា ការប្រកាសផ្សព្វផ្សាយនៃសៀវភៅនេះ គឺមានបំណងផ្តល់ការយល់ដឹងកាន់តែស៊ីជម្រៅនៅកម្ពុជាអំពីចំណេះដឹងរបស់មេដឹកនាំ និងគំនិតរបស់គាត់នៅលើអភិបាលកិច្ចរបស់ចិន។
ឯកឧត្តមបណ្ឌិតសភាចារបានមានប្រសាសន៍បញ្ជាក់ថា «សៀវភៅដែលឆ្លុះបញ្ចាំងពីការប្ដេជ្ញាចិត្តរបស់ថ្នាក់ដឹកនាំនៃប្រទេសចិន មានគោលដៅឆ្ពោះទៅរកការធ្វើកំណែទម្រង់ស៊ីជម្រៅ និងការខិតខំប្រឹងប្រែងរបស់លោកប្រធានាធិបតីចិន ស៊ី ជិនពីង ស្ដីពីអភិបាលកិច្ចដ៏រឹងមាំរបស់លោក។ វានឹងធ្វើឱ្យពិភពលោកយល់ដឹងអំពីការអភិវឌ្ឍរបស់ប្រទេសចិន ក៏ដូចជាគោលនយោបាយក្នុងស្រុក និងបរទេស ដើម្បីឆ្លើយតបទៅនឹងការព្រួយបារម្ភរបស់សហគមន៍អន្តរជាតិ»។
លោកស្រី ពូ ជៀងហ្គ័រ (Bu Jianguo) ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំកម្ពុជា ជាមួយនឹងប្រសាសន៍ថ្លែងអំណរគុណចំពោះឯកឧត្តមបណ្ឌិតសភាចារ សុខ អាន និង រាជ្យបណ្ឌិតសភាកម្ពុជា ដែលបានគាំទ្រការផ្សព្វផ្សាយសៀវភៅ "លោកស៊ីជីនពីង ៖ អភិបាលកិច្ចនៃប្រទេសចិន" បានមានប្រសាសន៍ឲ្យដឹងថា សៀវភៅនេះ រួមបញ្ចូលនូវសុន្ទរកថា បទសម្ភាសន៍ និងសំណេររបស់ឯកឧត្តម ស៊ី ជិនពីង ចំនួន៧៩ ចន្លោះពីខែវិច្ឆិកា ឆ្នាំ២០១២ ដល់ខែមិថុនា ឆ្នាំ២០១៤ ដែលផ្តល់នូវការយល់ដឹងពីមេដឹកនាំរបស់ប្រទេសចិន នៅលើបញ្ហានយោបាយ និងរដ្ឋបាលនៃប្រទេស។ វាក៏រួមបញ្ចូលរូបថតរបស់លោកប្រធានាធិបតី ស៊ី ជិនពីង ចំនួន៤៥ ផងដែរ។
លោកស្រីឯកអគ្គរដ្ឋទូតចិនបានមានប្រសាសន៍ឲ្យដឹងថា សៀវភៅនេះបានផ្តល់ឲ្យមានការយល់ដឹងជាប្រព័ន្ធ ឆ្លើយតបយ៉ាងទូលំទូលាយទៅនឹងទ្រឹស្ដីជាចម្បង និងបញ្ហាអនុវត្តជាក់ស្តែង ក្នុងការអភិវឌ្ឍរបស់ប្រទេសចិន នៅក្នុងរយៈពេលនៃការផ្លាស់ប្ដូរដោយរួមបញ្ចូលនូវទស្សនវិជ្ជាមេដឹកនាំចិន និងយុទ្ធសាស្ត្រនៃអភិបាលកិច្ច។
លោកស្រីឯកអគ្គរដ្ឋទូតមានប្រសាសន៍បញ្ជាក់ថា «សៀវភៅនេះគឺជាបង្អួចសម្រាប់សង្គមអន្តរជាតិអាចចូលទៅកាន់ប្រទេសចិនដើម្បីស្វែងយល់ និងជាកូនសោដើម្បីផ្តល់ចម្លើយចំពោះបញ្ហាដែលពាក់ព័ន្ធនឹងប្រទេសចិនផងដែរ»។
សៀវភៅ "លោកស៊ីជីនពីង ៖ អភិបាលកិច្ចនៃប្រទេសចិន" បានបោះពុម្ពផ្សាយចំនួន៣,១៧លានក្បាល ក្នុងប្រាំបួនភាសា រួមមាន ចិន អង់គ្លេស បារាំង រុស្ស៊ី ភាសាអារ៉ាប់ ភាសាអេស្ប៉ាញ ព័រទុយហ្គាល់ អាល្លឺម៉ង់ និងជប៉ុន។
សម្រាប់កម្ពុជា លោកស្រី ពូ ជៀងហ្គ័រ បានសម្ដែងសុទិដ្ឋិនិយមថា សៀវភៅ "លោកស៊ីជីនពីង ៖ អភិបាលកិច្ចនៃប្រទេសចិន" នឹងផ្តល់នូវចំណេះដឹងដ៏មានប្រយោជន៍សម្រាប់មិត្តភក្ដិកម្ពុជា ដែលធ្វើឲ្យគេអាចគិតនិងការស្វែងរកនៅលើរឿងរ៉ាវរបស់ប្រទេសចិនដែលទទួលបានជោគជ័យនៃការអភិវឌ្ឍសេដ្ឋកិច្ច និងសង្គម"។
ឯកឧត្តមបណ្ឌិតសភាចារ សុខ អាន ក្រៅពីសង្ឃឹមថានឹងមានការបកប្រែជាភាសាខ្មែរ ដោយរាជបណ្ឌិត្យសភាកម្ពុជា ឯកឧត្តមបានឲ្យដឹងថាសៀវភៅនេះនឹងអាចរកទិញបាននៅក្នុងប្រទេសកម្ពុជា៕
0 Comments