ក្នុងការត្រៀមចូលរួមប្រកួតកីឡា SEA Games លើកទី២៨ នៅប្រទេសសិង្ហបុរីដែលនឹងចាប់ផ្តើមនាខែមិថុនាខាងមុខនេះ ក្រសួងអប់រំយុវជន និងកីឡាក៏បានបញ្ជូន និងត្រៀមបញ្ជូនកីឡាចំនួន ៣ប្រភេទទៅប្រកួតនិងហាត់នៅក្រៅប្រទេសដែរ។
លោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡាបានឲ្យដឹងថា ៣ប្រភេទកីឡាដែលនឹងត្រូវចេញទៅប្រកួត និងហាត់នៅក្រៅប្រទេសនោះ រួមមានប្រភេទកីឡាសីប៉ាក់តាក្រ នឹងបញ្ជូនកីឡាករ-កីឡាការិនីសរុបចំនួន១០នាក់ទៅហ្វឹកហាត់នៅប្រទេសមីយ៉ាន់ម៉ា។ សម្រាប់ការចេញទៅហ្វឹកហាត់នេះ ក្រសួងអប់រំយុវជន និងកីឡាជួយឧបត្ថម្ភសំបុត្រយន្តហោះ និងប្រាក់ប្រចាំខែ។
ប្រភេទកីឡាទ្រីយ៉ាត្លុង(ហែលទឹក-រត់ ជិះកង់) នឹងបញ្ជូនកីឡាករចំនួន៦នាក់ទៅហាត់នៅប្រទេសថៃរយៈពេល១ខែ ដោយក្រសួងជួយឧបត្ថម្ភប្រាក់ប្រចាំខែ។ ចំពោះប្រភេទកីឡាវាយកូនបាល់បញ្ជូនទៅក្រៅប្រទេសចំនួន៥រូបដើម្បីហាត់និងប្រកួតនៅទីនោះ។ ក្នុងចំណោម៦នាក់នោះមានម្នាក់ទៅហាត់រយៈពេល២ខែនៅសហរដ្ឋអាមេរិក ម្នាក់ទៅហាត់ និងប្រកួតរយៈពេល២០ថ្ងៃនៅប្រទេសស្រីលង្កានិង៣នាក់ដែលជាយុវជនចេញទៅប្រកួតនៅប្រទេសវៀតណាម។
គួរបញ្ជាក់ថា ការប្រកួតកីឡា SEA Games ទី២៨ ដែលប្រទេសសិង្ហបុរីធ្វើជាម្ចាស់ផ្ទះនោះនឹងចាប់ផ្តើមពីថ្ងៃទី៥ ដល់ថ្ងៃទី១៦ ខែមិថុនា ឆ្នាំ២០១៥ ដែលមានប្រភេទកីឡាចំនួន៣៦ និងវិញ្ញាសាប្រកួតចំនួន៤០២ ត្រូវដាក់អោយប្រកួតនាពេលនោះ៕
វិសិទ្ធ(រូប១)
0 Comments