បន្ទាយមានជ័យ ៖ នៅព្រឹកថ្ងៃទី៥ ខែកុម្ភៈ ឆ្នាំ២០១៥ នៅមន្ទីរសុខាភិបាលខេត្តបន្ទាយមានជ័យ ស្ថិតនៅភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ។ លោកវេជ្ជបណ្ឌិត កែវ សុភ័ក្ត្រា ប្រធានមន្ទីរសុខាភិបាលខេត្តបន្ទាយមានជ័យបានកោះហៅមន្ត្រីពេទ្យជិត៥០០នាក់មកចូលរួមស្តាប់ការប្រជុំផ្សព្វផ្សាយច្បាប់របស់ក្រសួងមហាផ្ទៃ និងក្រសួងសុខាភិបាលស្តីអំពី ឱសថស្ថាន ឱសថស្ថានរង អគារលក់ឱសថបុរាណ មណ្ឌលថែសម្ផស្ស ផ្ទះលក់ឱសថ កន្លែងពិនិត្យព្យាបាលជំងឺមានលក់ឱសថ កន្លែងលក់គ្រឿងសំអាង និងកន្លែងលក់ផលិតផលបំប៉នសុខភាព លើផលិតផលសុខាភិបាលខុសច្បាប់គ្រប់ប្រភេទ ត្រូវតែចុះត្រួតពិនិត្យឲ្យបានត្រឹមត្រូវ។ ពិធីនេះមានការចូលរួមពីលោក អោម ចន្ថា អភិបាលរងខេត្តបន្ទាយមានជ័យ។
លោកបានព្រមានធ្ងន់ៗដល់មន្ត្រីពេទ្យទាំងអស់ថា ដើម្បីការពារ លើកកំពស់សុខភាពសាធារណៈ និងកាត់បន្ថយភាពក្រីក្ររបស់ប្រជាពលរដ្ឋ ក្រសួងមហាផ្ទៃនិងក្រសួងសុខាភិបាលបានដាក់ចេញនូវបទបញ្ជានិងវិធានការទប់ស្កាត់ការធ្វើចរាចរផលិតផលសុខាភិបាលខុសច្បាប់ និងសេវាសុខាភិបាលឯកជនខុសច្បាប់។ លោកបានបញ្ជាក់ទៀតថា នៅថ្ងៃខាងមុខនេះមន្ត្រីពេទ្យត្រូវចុះស្រង់ស្ថិតិ និងធ្វើការត្រួតពិនិត្យបន្ទប់ថែរក្សាជំងឺ បន្ទប់ព្យាបាលមាត់ធ្មេញ បន្ទប់ពិគ្រោះ ស្ត្រីមានផ្ទៃពោះ បន្ទប់សម្ភព និងបន្ទប់ជំងឺទូទៅនៅមានច្រើនទៀត។ លោកបានបន្តថា ត្រូវឃាត់ទុករាល់ឱសថខុសច្បាប់គ្រប់ប្រភេទដែលលក់នៅក្នុងទីផ្សារ ត្រូវត្រួតពិនិត្យទីតាំងផ្ទុក វេចខ្ចប់និងការដឹកជញ្ជូនដើម្បីធានាគុណភាពឱសថតាមស្តង់ដារ។ លោកបានបន្តថា ស្ថាប័នមានសមត្ថកិច្ចពាក់ព័ន្ធ ត្រូវចុះធ្វើការស្រាវជ្រាវ និងធ្វើការបង្ក្រាបឱសថក្លែងក្លាយ ឱសថនាំចូលដោយខុសច្បាប់ឲ្យខានតែបាន និងត្រូវយកម្ចាស់យកទៅដាក់ទោសទៅតាមផ្លូវច្បាប់ ជៀសវាងដាច់ខាតលើការសម្របសម្រួលនៅក្រៅប្រព័ន្ធច្បាប់ ត្រូវទប់ស្កាត់ចំពោះការឃោសនាគ្រប់រូបភាព និងការផ្សព្វផ្សាយណាពាក់ព័ន្ធនឹងឱសថដែលបំផ្លើសពីការពិត។ នៅក្នុងកិច្ចប្រជុំនោះដែរ លោក អោម ចន្ថា បានធ្វើការណែនាំ និងធ្វើដាស់តឿនដល់មន្ត្រីពេទ្យទាំងអស់ថា មន្ត្រីពេទ្យទាំងអស់ត្រូវគោរពក្រុមសីលធម៌ជាគ្រូពេទ្យឲ្យបានខ្ជាប់ខ្ជួន ត្រូវយកវិជ្ជាជីវៈដែលខ្លួនបានរៀនយកមកបម្រើប្រជាពលរដ្ឋឲ្យបានល្អ មិនត្រូវយកវិជ្ជាដែលខ្លួនបានរៀនចេះស្ទើរនិងមិនសុំច្បាប់ពីមន្ទីរអនុញ្ញាតិឲ្យដើរចាក់ថ្នាំប្រជាពលរដ្ឋធ្វើឲ្យប្រជាពលរដ្ឋស្លាប់បានយ៉ាងងាយ៕
គង្គា
0 Comments