ស្វាយរៀង ៖ ឯកឧត្តម គឹម ធា ប្រធានក្រុមប្រឹក្សាខេត្ត ឯកឧត្តម ជៀង អំ អភិបាលខេត្តស្វាយរៀង នៅព្រឹកថ្ងៃទី១១ ខែកុម្ភៈ ឆ្នាំ២០១៥ បានអញ្ជើញជាអធិបតីនៅក្នុងអង្គសន្និបាតបូកសរុបលទ្ធផលការងារប្រចាំឆ្នាំ២០១៤ និងទិសដៅការងារឆ្នាំ២០១៥ របស់រដ្ឋបាលខេត្តស្វាយរៀងដែលមានរយៈពេលមួយថ្ងៃ។ ពិធីនេះបានប្រព្រឹត្តទៅនាសាលប្រជុំសណ្ឋាគារ ទន្លេវ៉ៃគោ ក្រុងស្វាយរៀង ខេត្តស្វាយរៀង ព្រមទាំងមានការអញ្ជើញចូលរួមផងដែរពីសំណាក់ ឯកឧត្តម លោក ជំទាវ ជាសមាជិកក្រុមប្រឹក្សាខេត្ត/ក្រុង/ស្រុក ឯកឧត្តម លោកជំទាវ ជាអភិបាលរងខេត្ត អភិបាលក្រុង ស្រុក មេឃុំ ចៅសង្កាត់ កងកម្លាំងប្រដាប់អាវុធទាំងបីប្រភេទ រួមនឹងមន្ត្រីដែលមានការពាក់ព័ន្ធនានានៅទូទាំងខេត្តប្រមាណជាង៥០០នាក់។ ឯកឧត្តម គឹម ធា ប្រធានក្រុមប្រឹក្សាខេត្តស្វាយរៀងបានអាននូវសុន្ទរកថា បើកសន្និបាតបូកសរុបលទ្ធផលការងារប្រចាំឆ្នាំ២០១៤ និងទិសដៅការងារឆ្នាំ២០១៥របស់រដ្ឋបាលខេត្តស្វាយរៀង ដោយអនុវត្តតាមកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាលកម្ពុជាដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាប្រមុខដឹកនាំប្រកបដោយគតិបណ្ឌិតដែលបានបន្តជំរុញការកែទម្រង់រដ្ឋស៊ីជម្រៅនិងទូលាយលើវិស័យសំខាន់ៗដើម្បីធានាអភិបាលកិច្ចល្អ និងការអភិវឌ្ឍសេដ្ឋកិច្ច សង្គមប្រកបដោយចីរភាព ពិសេសការកែទម្រង់រដ្ឋបាលសាធារណៈការ កែទម្រង់ការគ្រប់គ្រងហិរញ្ញវត្ថុសាធារណៈ ការកែទម្រង់វិមជ្ឈការ និងវិសហមជ្ឈការ ការពង្រឹងសមត្ថភាពមន្ត្រីរាជការធ្វើឲ្យមន្ត្រីរាជការមានភាពស្វាហាប់ក្នុងការងារ ប្រកាន់ខ្ជាប់នូវឥរិយាបថវប្បធម៌ សេវាសាធារណៈ ឆន្ទៈម្ចាស់ការ ភក្ដីភាព និងមនសិការវិជ្ជាជីវៈ ខិតខំបំពេញការងារ ពិសេសការផ្តល់សេវាសាធារណៈប្រកបដោយគុណផល មានតម្លាភាព និងគណនេយ្យភាព សំដៅពង្រឹង ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិឲ្យកាន់តែមានភាពរឹងមាំនិងប្រកបដោយចីរភាព។ តាមរយៈគណៈបញ្ជាការឯកភាពគ្រប់ថ្នាក់អាជ្ញាធររដ្ឋបាលដែនដី បានយកចិត្តទុកដាក់បន្តជំរុញចលនា នៃការអនុវត្តគោលនយោបាយ ភូមិ/ឃុំ មានសុវត្ថិភាពឲ្យមាននិរន្តរភាព និងសកម្មនៅគ្រប់មូលដ្ឋានសំដៅធានារក្សាសន្តិសុខ សណ្ដាប់ធ្នាប់សាធារណៈនៅគ្រប់មូលដ្ឋាន និងស្ថិរភាព នយោបាយល្អប្រសើរធ្វើឲ្យប្រជាជនរស់នៅប្រកបដោយសុភមង្គល សុខដុមរមនា ទាំងក្នុងគ្រួសារ ទាំងក្នុងសហគមន៍ ក៏ដូចជាក្នុងខេត្តស្វាយរៀងទាំងមូល ជាពិសេសបានធ្វើឲ្យដំណើរការនៃការបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក អាណត្តិទី២ បានប្រព្រឹត្តទៅដោយរលូន ត្រឹមត្រូវ គ្មានអំពើហិង្សាស្របតាមគោលការណ៍លទ្ធិប្រជាធិបតេយ្យសេរីពហុបក្ស៕
គឹម សេង
){kind=link}
0 Comments