កំពង់ឆ្នាំង ៖ អ្នកចែកចាយ និងប្រើប្រាស់គ្រឿងញៀនចំនួន៤នាក់ ត្រូវបានកងកម្លាំងសមត្ថកិច្ចនគរ បាលក្រុងកំពង់ឆ្នាំង និងខេត្តសហការគ្នាព័ទ្ធចាប់ខ្លួនបាននៅពេលដែលជនសង្ស័យទាំងនោះកំពុងធ្វើសកម្មភាពចែកចាយ និងប្រើប្រាស់ថ្នាំញៀន ដោយដកហូតថ្នាំញៀនបាន២កញ្ចប់ធំមានតម្លៃជាង១ពាន់ដុល្លារ។ ករណីបង្ក្រាបនេះបានធ្វើឡើងនៅម៉ោង២និង២០នាទីរសៀល ថ្ងៃ២៦ ខែកញ្ញា ឆ្នាំ២០១៥ នៅចំណុចភូមិត្រពាំងចឹកសារ សង្កាត់កំពង់ឆ្នាំង ក្រុងកំពង់ឆ្នាំង។
លោក ជុន ថារិទ្ឋ ស្នងការរងនគរបាលខេត្តកំពង់ឆ្នាំង ជាអ្នកដឹកនាំការបង្ក្រាបករណីជួញដូរនិងចែកចាយថ្នាំញៀនខាងលើបានឲ្យដឹងថា ដោយទទួលបានព័ត៌មានជាក់លាក់ថាមានសកម្មភាពចែកចាយថ្នាំញៀនខាងលើ សមត្ថកិច្ចនគរបាលខេត្ត និងក្រុងបានសហការគ្នាធ្វើការបង្ក្រាបបទល្មើសខាងលើនេះបានទាន់ពេលវេលា ក្នុងនោះចាប់ខ្លួនជនសង្ស័យចំនួន៤នាក់ គឺ៖ ១,ឈ្មោះ ឈួន ផល្លីន អាយុ២៤ឆ្នាំ។ ២,ឈ្មោះ អ៊ីម គឹមមួយ អាយុ១៨ឆ្នាំ ភេទស្រី គេទាំង២នាក់ជាប្តីប្រពន្ឋនឹងគ្នា និង៣,ឈ្មោះ ហុង គឹមស្រ៊ូ អាយុ៣៥ឆ្នាំ គេទាំង៣នាក់ មានទីលំនៅភូមិត្រពាំងចឹកសារ សង្កាត់កំពង់ឆ្នាំង និង៤,ឈ្មោះ ចាន់ លី ហៅវី អាយុ២៧ឆ្នាំ មានទីលំនៅភូមិព្រៃខ្មែរ ឃុំរលាប្អៀរ ស្រុករលាប្អៀរ។
លោកបានឲ្យដឹងទៀតថា ឈ្មោះ ចាន់ លី និងឈ្មោះ ឈួន ផល្លី កាលដើមគឺជាកូនកញ្ច្រែងចែកចាយថ្នាំញៀនតូចតាចនោះទេ តែក្រោយពីមេកញ្ច្រែងដែលហៅថាអ្នកចែកចាយធំជាងនេះត្រូវបានសមត្ថកិច្ចចាប់ខ្លួន និងពេលនេះកំពុងជាប់ក្នុងពន្ធនាគារនោះ ស្រាប់តែពីរនាក់នេះឡើងជាមេកញ្ច្រែងធំវិញម្តង។ ក្នុងនោះដែរ ចំពោះវត្ថុតាងដកហូតបានមានថ្នាំញៀន២កញ្ចប់ធំ(មានតម្លៃជាង១ពាន់ដុល្លារ) ទូរស័ព្ទ៣គ្រឿង វិទ្យុទាក់ទង២គ្រឿង ជញ្ជីងថ្លឹងថ្នាំញៀន២គ្រឿង ម៉ូតូ២គ្រឿង ថង់សម្រាប់ច្រករំលែកថ្នាំញៀនជាច្រើនថង់ កាំបិត ពូថៅ និងសម្ភារៈជក់គ្រឿងញៀនមួយចំនួនធំទៀតផងដែរ។ ជនសង្ស័យទាំង៤នាក់ត្រូវបានសមត្ថកិច្ចបញ្ជូនខ្លួន រួមទាំងវត្ថុតាងទៅកាន់តុលាការខេត្តចាត់ការបន្តតាមផ្លូវច្បាប់។
សមត្ថកិច្ចនគរបាលបាននិយាយឲ្យដឹងដែរថា កន្លងមកជនសង្ស័យ២នាក់ ១-ឈ្មោះ ចាន់ លី និង២-ឈ្មោះ ឈួន ផល្លី ក៏ធ្លាប់ជាប់ពន្ធនាគារខេត្តពីបទចែកចាយថ្នាំញៀននេះដែរ ក្នុងពេលនេះសមត្ថកិច្ចសំណូមពរដល់តុលាការខេត្តឲ្យដាក់ទោសទណ្ឌជនសង្ស័យខាងលើនេះឲ្យបានយូរតាមបញ្ញត្តិច្បាប់ផង ដើម្បីទប់ស្កាត់បានការចរាចរគ្រឿងញៀនក្នុងខេត្ត និងសន្តិសុខ សណ្ដាប់ធ្នាប់ ជូនប្រជាពលរដ្ឋនៅក្នុងក្រុង និងខេត្តកំពង់ឆ្នាំង៕
ឃាត់ខ្លួនមនុស្ស៤នាក់ ពាក់ព័ន្ធករណីគ្រឿងញៀន
0 Comments