ជនប៉ាឡេស្ទីន ដល់ទៅរាប់សិបនាក់រងរបួសនៅក្នុងការប៉ះទង្គិចគ្នាជាច្រើនលើក ជាមួយកងកម្លាំងអ៊ីស្រាអែល នៅថ្ងៃខួបនៃមរណភាពរបស់អតីតថ្នាក់ដឹកនាំប៉ាឡេស្ទីន លោក Yasser Arafat។ ក្រុមយុវវ័យបានគប់ដុំថ្ម ព្រមទាំងដុតកង់រថយន្ត ខណៈពេលដែលកងកម្លាំងសនិ្តសុខអ៊ីស្រាអែលវិញ បានតបតដោយបាញ់ឧស្ម័នបង្ហូរទឹកភ្នែក ព្រមទាំងបាញ់កាំភ្លើងគ្រាប់ពិតទៀតផង។
យ៉ាងហោចក៏មានជនប៉ាឡេស្ទីន៤នាក់ រងរបួសដោយសារតែគ្រាប់កាំភ្លើងនៅក្បែរតំបន់ Ramallah នៅ Al-Bireh នេះជាការលើកឡើងពីក្រសួងសុខាភិបាលបា៉ឡេស្ទីន។ មានមនុស្សម្នាក់ផ្សេងទៀតត្រូវបានគេរាយការណ៍ថា ស្ថិតក្នុងស្ថានភាពធ្ងន់ ហើយកំពុងស្ថិតនៅក្នុងការវះកាត់ បន្ទាប់ពីរងការបាញ់ត្រូវចំក្បាល។
ការប៉ះទង្គិចគ្នានៅ Al-Bireh បានកើតឡើង បន្ទាប់ពីមានជនប៉ាឡេស្ទីនជាច្រើនរយនាក់បានដើរសំដៅទៅរកកងកម្លាំងអ៊ីស្រាអែល ដែលនោះជាការប្រមូលផ្តុំគ្នា ដើម្បីជាការរំលឹកដល់ពេលរស់នៅរបស់លោក Yasser Arafat នោះ។
នៅកន្លែងមួយចំនួនទៀតនោះ ក្រុមយុវវ័យបានគប់ដុំថ្មទៅលើកងកម្លាំងការពារ IDF របស់អ៊ីស្រាអែល ព្រមទាំងដុតសំបកកង់ឡាន ហើយប្រមៀលទៅរកក្រុមបុគ្គលិកសនិ្តសុខទៀតផង។ ដោយឡែកក្រុម IDF ក៏បានតបតទៅវិញ ដោយបាញ់ឧស្ម័នបង្ហូរទឹកភ្នែកនិងបាញ់កាំភ្លើងដោយប្រើគ្រាប់ពិត។
នៅក្នុងការប៉ះទង្គិចគ្នានៅទីផ្សេងទៀតនោះ ក្នុងតំបន់ West Bank បានបណ្តាលឲ្យរងរបួសជនប៉ាឡេស្ទីន អស់៦នាក់ជាបន្ថែមទៀត នៅក្រុង Tulkarem។
សរុបមកមានជនប៉ាឡេស្ទីន ៦២នាក់រងរបួសដោយការបាញ់គ្រាប់ពិត និងគ្រាប់កៅស៊ូពេលមានការប៉ះទង្គិចគ្នាជាមួយអ៊ីស្រាអែល ដែលកាន់កាប់ក្រុង Tulkarem, Ramallah, Al.Bireh និង Bethlehem នេះជាការប្រកាសដោយក្រសួងសុខាភិបាល៕
RT
ជនប៉ាឡេស្ទីន រាប់សិបនាក់រងរបួសនៅក្នុងការប៉ះទង្គិចគ្នា នាខួបមរណភាពរបស់លោក Arafat
0 Comments