ព្រៃវែង ៖ គ្រោះថ្នាក់ចរាចរណ៍មួយបង្កឡើងដោយម៉ូតូម៉ាកឌ្រីមសង់C125 ពណ៌ខ្មៅ ពាក់ស្លាកលេខ 1Cx9477 ជិះគ្នា៤នាក់ បានបុកជាមួយរថយន្តបែនដឹកដីបណ្ដាលឲ្យអ្នកបើកបរម៉ូតូរងរបួសធ្ងន់ និងអ្នករួមដំណើរ៣នាក់ទៀរងរបួសស្រាល។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីថ្ងៃទី៩ ខែវិច្ឆិកា ឆ្នាំ២០១៥ លើផ្លូវលំក្រាលគ្រួសក្រហមមួយខ្សែ ស្ថិតក្នុងភូមិជ្រៃ ឃុំជ្រៃស្រឡិត ស្រុកពារាំង ខេត្តព្រៃវែង ជាប់របងវត្តជ្រៃ នាវេលាម៉ោង១៣និង២០នាទីរសៀល។
ពាក់ព័ន្ធករណីគ្រោះថ្នាក់ចរាចរណ៍ខាងលើអ្នកឃើញហេតុការណ៍បានឲ្យអ្នកយកព័ត៌មានយើងដឹងថា មុនពេលកើតហេតុគេឃើញម៉ូតូខាងលើជិះគ្នា៤នាក់ ធ្វើដំណើរពីទិសខាងជើងទៅត្បូងពេលដែលមកដល់ចំណុចកើតហេតុខាងលើ ម៉ូតូបានរេចង្កូតទៅបុកនឹងរថយន្តបែនមួយគ្រឿងម៉ាកនីសាន់ដឹកដី ពណ៌ស គ្មានស្លាកលេខ បណ្ដាលឲ្យអ្នកបើកម៉ូតូរងរបួសយ៉ាងធ្ងន់ធ្ងរ។
ចំពោះករណីខាងលើនេះដែរ សមត្ថកិច្ចនគរបាលប៉ុស្តិ៍ជ្រៃស្រឡិតបានឲ្យអ្នកយកព័ត៌មានយើងដឹងដែរថា ជនរងគ្រោះដែលបើកបរម៉ូតូខាងលើឈ្មោះ ឈិន ឈាង អាយុ៣៥ឆ្នាំ រស់នៅភូមិស្វាយ ឃុំជ្រៃស្រឡិត ស្រុកពារាំង ខេត្តព្រៃវែង រងរបួសធ្ងន់ គឺបែកក្បាល ហើយត្រូវបានក្រុមគ្រួសារបញ្ជូនទៅសង្គ្រោះនៅឯមន្ទីរពេទ្យរាជធានីភ្នំពេញ និងអ្នករួមដំណើរ៣នាក់ទៀតរងរបួសស្រាលចំណែកឯអ្នកបើកបររថយន្ត ក្រោយពេលកើតហេតុបានគេចខ្លួនបាត់ តែត្រូវបានសមត្ថកិច្ចស្រាវជ្រាវដឹងថា អ្នកបើកបរនោះឈ្មោះ ហួ មានស្រុកកំណើតនៅឯខេត្តកំពង់ឆ្នាំង។ ក្រោយមក ម៉ូតូ និងរថយន្ត ត្រូវបានសមត្ថកិច្ចយកមករក្សាទុកនៅឯប៉ុស្តិ៍សមត្ថកិច្ចរង់ចាំដោះស្រាយតាមផ្លូវច្បាប់៕
ឌ្រីមសង់បុកឡានបែនដឹកដី របួសធ្ងន់ម្នាក់ និងស្រាល៣នាក់
0 Comments