ភ្នំពេញ ៖ រដ្ឋមន្ត្រីការបរទេសកម្ពុជា ឯកឧត្ដមឧបនាយករដ្ឋមន្ត្រី ហោ ណាំហុង បានមានប្រសាសន៍ថា ឯកឧត្ដមមិននឹកស្មានថា អ្នកច្បាប់របស់ថៃឆោតដល់ថ្នាក់ហ្នឹងទេ នៅពេលតុលាការយុត្តិធម៌អន្តរជាតិទីក្រុងឡាអេរ (ICJ) សួរសម្រេចថ្ងៃចុងក្រោយថា ថៃប្រើផែនទីណា ហើយកម្ពុជាប្រើផែនទីណា ? នៅពេលនោះកម្ពុជាយើងបានបញ្ជាក់ថា យើងបានប្រើផែនទីឧបសម្ព័ន្ធ១ ដែលថៃទទួលស្គាល់ និងអន្តរជាតិទទួលស្គាល់ ស្រាប់តែថៃបានអះអាងថា ប្រើផែនទី ដែលគណៈរដ្ឋមន្ត្រីថៃកំណត់នៅខែកក្កដា ឆ្នាំ១៩៦២ គឺក្រោយតុលាការកាត់ក្ដី១ខែ ដូច្នេះយើងគិតថា អ្នកច្បាប់ថៃមិនគួរឆោតដល់ប៉ុណ្ណឹង ពីព្រោះតុលាការ ICJ បានសម្រេចរួចទៅហើយ ឲ្យកម្ពុជាឈ្នះ និងឲ្យថៃដកអ្វីៗចេញពីប្រាសាទព្រះវិហារ ស្រាប់តែអ្នកច្បាប់ថៃទៅយកផែនទីឯកតោភាគី ដែលទើបធ្វើក្រោយមកសំអាងទៅវិញ ប៉ុន្តែនេះប្រហែលជាទេវតាជួយយើង។
ឯកឧត្ដមឧបនាយករដ្ឋមន្ត្រី ហោ ណាំហុង មានប្រសាសន៍បែបនេះ ខណៈពេលដែលឯកឧត្ដមបានចូលរួមធ្វើបាឋកថានៅក្នុង “វេទិកាបាឋកថា ស្តីពីបទពិសោធន៍នៃយុទ្ធសាស្ត្រផ្លូវច្បាប់ ដើម្បីការពារប្រាសាទ និងតំបន់ប្រាសាទព្រះវិហារ នៅតុលាការយុត្តិធម៌អន្តរជាតិ (ICJ) នាពេលកន្លងមក” នៅវិទ្យាស្ថានបច្ចេកវិទ្យាកម្ពុជា (សាលាតិចណូ) កាលពីវេលាម៉ោង១១ និង២០ នាទី ព្រឹកថ្ងៃទី១០ ខែ វិច្ឆិកា ឆ្នាំ២០១៥ មុននេះ៕
រដ្ឋមន្ត្រីការបរទេសកម្ពុជាថា អ្នកច្បាប់របស់ថៃឆោត ក្នុងរឿងក្ដីប្រាសាទ ព្រះវិហារនៅឯតុលាការយុត្តិធម៌អន្តរជាតិ
0 Comments